kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^3
1 Në ato ditë arriti Gjon Pagëzori që predikonte në shkretëtirën e Judesë,
² duke thënë: "Pendohuni, sepse mbretëria e qiellit po afron.
³ Sepse ky është ai për të cilin u fol nëpërmjet profetit Isaia: "Ky është zëri i atij që thërret në shkretëtirë: ‘Përgatisni udhën e Zotit, të drejta bëjini shtigjet e Tij!’"
⁴ Vetë Gjoni ishte i veshur me lesh deveje dhe mbante një rrip lëkure rreth mesit; ushqimi i tij ishin karkalecat dhe mjaltë bletësh të egra.
⁵ Tek ai shkonte Jeruzalemi dhe gjithë Judeja, si dhe tërë krahina e Jordanit,
⁶ dhe pagëzoheshin prej tij në lumin Jordan, duke rrëfyer mëkatet e veta.
⁷ Kur pa se shumë prej farizenjve dhe saducenjve po vinin për t’u pagëzuar prej tij, u tha: "O pjella nepërkash, kush ju mësoi t’i ikni zemërimit që po vjen?
⁸ Jepni pra, fryt të denjë pendimi.
⁹ Të mos ju shkojë ndër mend të thoni me vete: ‘Kemi atin tonë Abrahamin’, sepse po ju them që edhe prej këtyre gurëve Perëndia mund të nxjerrë fëmijë për Abrahamin.
¹⁰ Sëpata është vënë tashmë te rrënja e pemëve; çdo pemë që nuk jep fryt të mirë, pritet dhe flaket në zjarr.
¹¹ Unë vërtet po ju pagëzoj me ujë për pendim, por Ai që vjen pas meje është më i fortë se unë, sandalet e të cilit unë nuk jam i denjë t’i mbaj. Ai do t’ju pagëzojë me Frymën e Shenjtë dhe me zjarr.
¹² Në dorë të Tij është terplotja; do ta qërojë lëmin dhe do ta mbledhë grurin e Tij në grunar, por kashtën do ta djegë me zjarr që nuk shuhet."
¹³ Pastaj Jezusi shkoi nga Galileja në Jordan te Gjoni, që të pagëzohej prej tij.
¹⁴ Por Gjoni u përpoq ta ndalonte, duke thënë: "Unë kam nevojë të pagëzohem prej Teje, kurse Ti vjen tek unë?"
¹⁵ Jezusi u përgjigj dhe i tha: "Lëre tani, sepse kështu na duhet të veprojmë që të përmbushet çdo drejtësi." Atëherë Gjoni e pranoi.
¹⁶ Jezusi, me t’u pagëzuar, u ngrit menjëherë nga uji dhe ja, qiejt u hapën dhe ai pa Frymën e Perëndisë duke zbritur si një pëllumb, që erdhi e qëndroi mbi Të.
¹⁷ Dhe ja, erdhi një zë nga qielli që thoshte: "Ky është Biri Im i dashur, tek i cili gjej kënaqësi."