kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

^27
1 Me të ardhur mëngjesi, të gjithë kryepriftërinjtë dhe pleqtë e popullit thurën planin kundër Jezusit për ta vrarë.
² Pasi e lidhën, e nxorën jashtë dhe ia dorëzuan guvernatorit Pilat.
³ Atëherë Juda, ai që e tradhtoi, duke parë që Atë e dënuan, u pendua dhe ua ktheu të tridhjetë monedhat e argjendta kryepriftërinjve dhe pleqve
⁴ dhe tha: "Duke dorëzuar gjakun e pafajshëm, kam bërë mëkat." Ata i thanë: "Ç’lidhje ka kjo me ne? Ajo është puna jote."
⁵ Pasi hodhi monedhat e argjendta në tempull, u largua dhe shkoi e vari veten.
⁶ Kryepriftërinjtë morën monedhat e argjendta dhe thanë: "Nuk është e drejtë t’i shtiem në thesar, meqenëse është çmim gjaku.
⁷ Pasi e peshuan mirë punën, blenë me to arën e poçarit për të varrosur të huajt.
⁸ Prandaj ajo arë deri në ditët e sotme është quajtur ‘Ara e Gjakut.’
⁹ Atëherë u përmbush ajo që ishte thënë nëpërmjet profetit Jeremia: ‘Morën të tridhjetë monedhat e argjendta, çmimin e atij që ishte shitur, çmim të cilin e caktuan bijtë e Izraelit
¹⁰ dhe i dhanë ato për arën e poçarit, ashtu siç më kishte porositur Zoti’."
¹¹ Jezusi qëndroi para guvernatorit. Guvernatori e pyeti dhe tha,"Ti je Mbreti i judenjve?" Jezusi tha: "Ti po e thua."
¹² Ndërsa kryepriftërinjtë dhe pleqtë po e padisnin, Ai nuk jepte asnjë përgjigje.
¹³ Atëherë Pilati i tha: "A nuk i dëgjon të gjitha këto që ata po dëshmojnë kundër Teje?"
¹⁴ Ai nuk i ktheu asnjë përgjigje, aq sa e habiti jashtë mase guvernatorin.
¹⁵ Guvernatori e kishte zakon që për festa të lironte për popullin një të burgosur, kë të donin ata.
¹⁶ Në atë kohë kishin një të burgosur me nam, që quhej [Jezus] Baraba.
¹⁷ Prandaj, kur u mblodh turma, Pilati u tha: "Kë doni t’ju liroj, [Jezus] Barabanë apo Jezusin që quhet Krisht?"
¹⁸ Sepse ai e dinte që Atë e kishin dorëzuar nga smira.
¹⁹ Kur u ul në fronin e gjyqit, e shoqja i dërgoi fjalë, duke thënë: "Asnjë punë nuk ke me atë Njeri të drejtë, sepse sot kam vuajtur shumë në një ëndër për shkakun e Tij."
²⁰ Por kryepriftërinjtë dhe pleqtë e bindën turmën që të kërkonte Barabanë dhe të zhduknin Jezusin.
²¹ Guvernatori u përgjigj dhe u tha: "Cilin nga të dy doni t’ju liroj?" Ata thanë: "Barabanë."
²² Pilati u tha: "Ç’të bëj atëherë me Jezusin që quhet Krisht?" Ata të gjithë thanë: "Të kryqëzohet!"
²³ Ai tha: "Përse, ç’të keqe ka bërë?" Por ata po bërtisnin gjithnjë e më shumë, duke thënë: "Të kryqëzohet!"
²⁴ Pilati, duke parë që nuk po arrinte gjë, përkundrazi po bëhej rrëmujë më e madhe, mori ujë e lau duart përpara turmës, duke thënë: "Jam i pafajshëm për gjakun e Këtij njeriu. Kjo është punë për ju."
²⁵ I gjithë populli u përgjigj dhe tha: "Gjaku i Tij qoftë mbi ne dhe mbi fëmijët tanë!"
²⁶ Atëherë ai ua liroi Barabanë, dhe pasi e fshikulloi Jezusin, e dorëzoi që ta kryqëzonin.
²⁷ Pastaj ushtarët e guvenatorit e morën Jezusin në godinën e sundimtarit dhe mblodhën rreth Tij tërë truprojën.
²⁸ Pasi e zhveshën, i hodhën përsipër një rrobë të kuqe flakë.
²⁹ Thurën një kurorë me gjemba dhe ia vunë mbi kokë. I vunë një kallam në dorën e djathtë dhe, duke u ulur në gjunjë përpara Tij, filluan ta tallin, duke thënë: "Përshëndetje, o Mbret i judenjve!"
³⁰ Duke pështyrë mbi Të, ia morën kallamin dhe filluan ta godasin në kokë.
³¹ Pasi e përqeshën, i hoqën pelerinën, i veshën rrobën e Tij dhe e çuan për ta kryqëzuar.
³² Duke dalë, gjetën një njeri nga Kirenea, që quhej Simon, dhe e detyruan të mbante kryqin e Tij.
³³ Kur erdhën në një vend që quhej Golgotë, që do të thotë "Vendi i Kafkës",
³⁴ i dhanë të pinte verë të përzier me vrer. Ai e provoi dhe nuk deshi ta pinte.
³⁵ Pasi e kryqëzuan, hodhën short dhe i ndanë në mes tyre rrobat e Tij.
³⁶ Pastaj u ulën e vazhduan t’i bënin rojë atje.
³⁷ I vunë mbi kokë mbishkrimin me padinë e Tij, KY ËSHTË JEZUSI, MBRETI I JUDENJVE.
³⁸ Bashkë me të, u kryqëzuan edhe dy vjedhës, njëri nga e djathta e tjetri nga e majta.
³⁹ Ata që kalonin pranë, e shanin duke tundur kokat
⁴⁰ dhe duke thënë: "Ti që shkatërron tempullin dhe e ndërton për tri ditë, shpëto Veten. Po të jesh Biri i Perëndisë, zbrit nga kryqi."
⁴¹ Po ashtu edhe kryepriftërinjtë e tallnin bashkë me skribët dhe pleqtë, duke thënë:
⁴² "Të tjerët i shpëtoi, por Veten nuk mund ta shpëtojë dot. Ai është mbret i Izraelit, le të zbresë tani nga kryqi dhe do të besojmë në Të.
⁴³ Ia besoi Veten Perëndisë; le ta çlirojë Perëndia tani, nëse e do, sepse Ai ka thënë: "Jam Biri i Perëndisë."
⁴⁴ Po ashtu e shanin edhe vjedhësit që ishin kryqëzuar me Të.
⁴⁵ Nga ora e gjashtë u bë errësirë në gjithë tokën deri në orën e nëntë.
⁴⁶ Rreth orës së nëntë Jezusi thirri me zë të lartë dhe tha: "Eli, Eli, lama sabaktani?", që do të thotë: ‘Perëndia Im, Perëndia Im, përse më ke braktisur?’
⁴⁷ Disa prej tyre që po rrinin atje, kur e dëgjuan, thanë: "Ky po thërret Elian."
⁴⁸ Njëri prej tyre vrapoi menjëherë dhe mori një sfungjer. Si e mbushi me uthull, e vuri në një kallam dhe ia dha Atij ta pinte.
⁴⁹ Të tjerët thoshin: "Lëre, të shohim a do të vijë Elia ta shpëtojë."
⁵⁰ Jezusi, pasi thirri edhe një herë me zë të lartë, dha shpirt.
⁵¹ Dhe ja, perdja e tempullit u ça më dysh nga maja deri në fund. Toka u lëkund dhe gurët u plasaritën.
⁵² Varret u hapën, dhe shumë trupa të shenjtërve që po flinin, u ngjallën.
⁵³ Pasi dolën nga varret, pas ngjalljes së Tij, hynë në qytetin e shenjtë dhe iu shfaqën shumë vetave.
⁵⁴ Kur kryeqindësi dhe ata që ishin me të duke ruajtur Jezusin, panë tërmetin dhe çfarë ndodhi, u trembën shumë dhe thanë: "Vërtet, ky ishte Biri i Perëndisë."
⁵⁵ Aty kishte shumë gra që po vështronin nga larg. Ato i kishin vajtur pas Jezusit që nga Galileja, duke i shërbyer Atij.
⁵⁶ Midis tyre ishte Maria Magdalena, Maria nëna e Jakobit dhe e Jozefit dhe nëna e bijve të Zebedeut.
⁵⁷ Në të ngrysur, erdhi një njeri i pasur nga Arimateja, me emrin Jozef, që kishte qenë edhe ai vetë dishepull i Jezusit.
⁵⁸ Ai shkoi te Pilati dhe i kërkoi trupin e Jezusit. Pilati urdhëroi të jepej trupi.
⁵⁹ Jozefi mori trupin dhe e mbështolli në një pëlhurë të pastër.
⁶⁰ E vuri në varrin e ri, që e kishte hapur për vete në një shkëmb, dhe pasi rrokullisi një gur të madh në hyrje të varrit, u largua.
⁶¹ Aty ishin Maria Magdalena, si edhe Maria tjetër, ulur përballë varrit.
⁶² Ditën tjetër, që ishte pas Ditës së Përgatitjes, kryepriftërinjtë dhe farizenjtë u mblodhën te Pilati
⁶³ dhe thanë: "Zotëri, na u kujtua çfarë tha ai mashtrues kur ishte gjallë: ‘Pas tri ditësh do të ngjallem.’
⁶⁴ Jep pra, urdhër që t’i sigurohet varri deri ditën e tretë, se mos vijnë dishepujt e Tij ta vjedhin e t’i thonë popullit: ‘U ngjall prej të vdekurve’ dhe mashtrimi i fundit do të jetë më i keq se i pari."
⁶⁵ Pilati u tha: "Rojën e keni. Shkoni dhe sigurojeni siç dini vetë."
⁶⁶ Ata shkuan dhe e siguruan varrin, duke vulosur gurin dhe duke vënë rojën.