kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^25
1 "Atëherë mbretëria e qiejve do t’u ngjajë dhjetë virgjëreshave, që morën kandilët e tyre dhe dolën për të pritur dhëndrin.
² Pesë prej tyre ishin mendjelehta dhe pesë të mençura;
³ mendjelehtat morën kandilët, por nuk morën vaj me vete.
⁴ Të mençurat morën enë me vaj së bashku me kandilët e tyre.
⁵ Meqë dhëndri po vonohej, të gjitha dremiteshin dhe i zuri gjumi.
⁶ Në mes të natës u dëgjua një britmë: ‘Ja dhëndri, dilini përpara!’
⁷ Atëherë të gjitha virgjëreshat u zgjuan dhe bënë gati kandilët e tyre.
⁸ Mendjelehtat u thanë të mençurave: ‘Na jepni nga vaji juaj, sepse po na fiken kandilët.’
⁹ Por të mençurat u përgjigjën dhe thanë: ‘Ndoshta nuk mjafton as për ne as për ju. Shkoni më mirë tek ata që shesin vaj e blini për veten tuaj.
¹⁰ Në kohën që ato shkuan për të blerë, erdhi dhëndri; ato që ishin gati, hynë bashkë me të në dasmë dhe dera u mbyll.
¹¹ Më vonë erdhën edhe virgjëreshat e tjera dhe thanë: ‘Zotëri, zotëri, na e hap derën!’
¹² Por ai u përgjigj dhe tha: ‘Vërtet po ju them, nuk ju njoh.’
¹³ Hapini sytë pra, sepse ju nuk e dini as ditën as orën.
¹⁴ Sepse do të jetë si puna e atij njeriu që do të merrte udhë të largët, thirri shërbëtorët e tij dhe ua besoi mallin e vet.
¹⁵ Njërit i dha pesë talenta, tjetrit dy e tjetrit një, secilit sipas aftësisë së tij, dhe u nis për udhë të largët.
¹⁶ Ai që mori pesë talentat, shkoi dhe i vuri menjëherë në përdorim dhe fitoi pesë të tjerë.
¹⁷ Po ashtu ai që mori dy talenta, fitoi dy të tjerë.
¹⁸ Ndërsa ai që mori një, shkoi dhe gërmoi një gropë në tokë dhe e fshehu paranë e të zotit të vet.
¹⁹ Pasi kishte kaluar një kohë e gjatë, erdhi i zoti i atyre shërbëtorëve dhe bëri llogaritë me ta.
²⁰ Ai që mori pesë talentat, iu afrua dhe i solli pesë talenta të tjerë dhe tha: ‘Zotëri, pesë talenta më besove. Shiko, fitova pesë talenta të tjerë.’
²¹ I zoti i tha: ‘Të lumtë, o shërbëtor i mirë dhe besnik. U tregove besnik në pak gjë, unë do të të besoj shumë gjëra. Merr pjesë në gëzimin e zotit tënd.
²² Ai që kishte marrë dy talentat, u afrua e tha: ‘Zotëri, dy talenta më besove. Shiko, fitova dy talenta të tjerë.’
²³ I zoti i tha: ‘Të lumtë, o shërbëtor i mirë dhe besnik. U tregove besnik në pak gjë, unë do të të besoj shumë gjëra. Merr pjesë në gëzimin e zotit tënd.’
²⁴ Pastaj erdhi ai që kishte marrë një talent dhe tha: ‘Zotëri, e dija që je njeri i ashpër, që vjel aty ku nuk ke mbjellë dhe mbledh aty ku nuk ke hedhur farë.
²⁵ Meqë kisha frikë, shkova dhe e fsheha talentin tënd në tokë. Ja ku e ke.’
²⁶ I zoti u përgjigj dhe i tha: ‘O shërbëtor i lig dhe i mefshtë. E dije, apo jo, që unë korr aty ku nuk kam mbjellë e mbledh aty ku nuk kam shpërndarë?
²⁷ Prandaj ti duhet t’i çoje paratë e mia te këmbyesit e parave, dhe, kur të vija unë, të merrja të miat bashkë me kamatën.
²⁸ Merrjani pra, talentin dhe jepjani atij që ka dhjetë talenta.
²⁹ Sepse gjithkujt që ka, do t’i jepet dhe ai do të ketë me tepri; por atij që nuk ka, do t’i merret edhe ajo që ka.
³⁰ Flakeni shërbëtorin e paaftë jashtë në errësirë. Aty do të ketë kujë dhe kërcëllimë dhëmbësh.’
³¹ Kur të vijë Biri i Njeriut me lavdinë e Tij dhe të gjithë engjëjt bashkë me Të, atëherë Ai do të ulet në fronin e lavdisë së Vet.
³² Të gjitha kombet do të mblidhen përpara Tij dhe Ai do t’i veçojë ato nga njëri-tjetri, ashtu si veçon bariu delet nga dhitë.
³³ Delet do t’i vërë nga e djathta e Vet, ndërsa dhitë nga e majta.
³⁴ Pastaj Mbreti do t’u thotë atyre nga e djathta e Vet: ‘Ejani, ju o të bekuar nga Ati Im, trashëgoni mbretërinë që është përgatitur për ju që nga themelimi i botës.
³⁵ Sepse isha i uritur dhe ju më dhatë për të ngrënë; kisha etje dhe ju më dhatë për të pirë; isha i huaj dhe ju më pritët;
³⁶ isha i zhveshur dhe ju më veshët; isha i sëmurë dhe ju u kujdesët për mua; isha në burg dhe ju erdhët tek Unë.
³⁷ Atëherë të drejtët do t’i përgjigjen, duke thënë: ‘Zot, kur vallë të pamë të uritur e të dhamë për të ngrënë, apo të pamë të etur e të dhamë për të pirë?
³⁸ Kur të pamë të huaj dhe të pritëm si mik apo të zhveshur e të veshëm?
³⁹ Kur të pamë të sëmurë apo në burg dhe erdhëm te Ti?’
⁴⁰ Mbreti do t’u përgjigjet e do t’u thotë: ‘Me të vërtetë po ju them, çfarëdo që të keni bërë për njërin nga këta vëllezërit e Mi më pak të rëndësishëm, e keni bërë për Mua.’
⁴¹ Pastaj do t’u thotë edhe atyre nga e majta: ‘Ikni prej Meje, ju o të mallkuar, në zjarrin e parreshtur, të përgatitur për djallin dhe engjëjt e tij.
⁴² Sepse isha i uritur dhe nuk më dhatë për të ngrënë; kisha etje dhe nuk më dhatë për të pirë.
⁴³ Isha i huaj dhe nuk më pritët; isha i zhveshur dhe ju nuk më veshët; isha i sëmurë e në burg dhe ju nuk erdhët të më shihni.’
⁴⁴ Pastaj edhe ata do të përgjigjen, duke thënë: ‘Zot, kur vallë të pamë të uritur, apo me etje, apo të huaj, apo të zhveshur, apo të sëmurë, apo në burg dhe nuk u kujdesëm për Ty?’
⁴⁵ Atëherë Ai do të përgjigjet dhe do t’u thotë: ‘Me të vërtetë po ju them, përderisa nuk e keni bërë për njërin prej këtyre më pak të rëndësishëm, as për Mua nuk e keni bërë.’
⁴⁶ Këta do të largohen për në ndëshkimin e përjetshëm, ndërsa të drejtët për në jetën e amshuar."