kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^24
1 Jezusi doli nga tempulli dhe, kur po largohej, iu afruan dishepujt e Tij për t’i treguar ndërtesat e tempullit.
² Ai u përgjigj dhe u tha: "A nuk i shihni të gjitha këto gjëra? Me të vërtetë po ju them, nuk do mbesë këtu gur mbi gur pa u rrënuar."
³ Kur ishte ulur në Malin e Ullinjve, iu afruan dishepujt vetëm për vetëm dhe thanë: "Na thuaj, kur do të ndodhin këto gjëra? Cila do të jetë shenja e ardhjes Sate dhe e fundit të jetës?"
⁴ Jezusi u përgjigj dhe u tha: "Hapni sytë se mos ju mashtron njeri.
⁵ Sepse shumë do të vijnë në emrin Tim, duke thënë: ‘Unë jam Krishti’ dhe do të mashtrojnë shumë njerëz.
⁶ Do të dëgjoni luftëra e jehona luftërash. Shikoni të mos trembeni, sepse kështu duhet të ndodhë, por ky nuk është ende fundi.
⁷ Sepse kombi do të ngrihet kundër kombit dhe mbretëria kundër mbretërisë; vende-vende do të ketë zi buke dhe tërmete.
⁸ Por të gjitha këto janë fillimi i dhembjeve.
⁹ Pastaj do t’ju dorëzojnë për tortura e do t’ju vrasin dhe do të urreheni nga të gjitha kombet për hir të emrit Tim.
¹⁰ Atëherë shumë do të shkandullohen, do të tradhtojnë njëri-tjetrin dhe do të urrejnë njëri-tjetrin.
¹¹ Do të dalin shumë profetë të rremë dhe do të mashtrojnë shumë njerëz.
¹² Kur të vërshojë paudhësia, dashuria e shumë njerëzve do të ftohet.
¹³ Ai që qëndron deri në fund, ky do të shpëtohet.
¹⁴ Ky ungjill i mbretërisë do të predikohet në mbarë botën si dëshmi për të gjitha kombet dhe atëherë do të vijë fundi.
¹⁵ Pra, kur të shihni neverinë e shkretimit duke qëndruar në vend të shenjtë, për të cilën është folur nëpërmjet profetit Daniel (kush lexon, le ta kuptojë),
¹⁶ atëherë ata që janë në Jude, le t’ia mbathin ndër male.
¹⁷ Kush është mbi pullaz, të mos zbresë për të marrë plaçkat prej shtëpisë së vet.
¹⁸ Kush është në arë, të mos kthehet prapa për të marrë rrobën e vet.
¹⁹ Mjerë ato që janë shtatzëna dhe ato që japin gji në ato ditë!
²⁰ Lutuni që ikja juaj të mos ndodhë në dimër, as të shtunën,
²¹ sepse atëherë do të ketë mundim aq të madh, sa nuk ka ndodhur prej fillimit të botës deri tani dhe as që ka për të ndodhur kurrë.
²² Po të mos shkurtoheshin ato ditë, askush nuk do të shpëtohej, por për hir të të zgjedhurve, ato ditë do të shkurtohen.
²³ Pastaj, po t’ju thotë ndokush: ‘Ja, këtu është Krishti’, ose ‘Është atje’, mos e besoni,
²⁴ sepse Krishta të rremë e profetë të rremë do të dalin e do të bëjnë shenja të mëdha e mrekulli për të mashtruar, po të ishte e mundur, edhe të zgjedhurit.
²⁵ Ja, jua kam thënë që më parë.
²⁶ Prandaj, po t’ju thonë: ‘Ja, është në shkretëtirë’, mos dilni, ose ‘Ja ku është, brenda në shtëpi’, mos u besoni.
²⁷ Sepse ashtu si vetëtima që del nga lindja e flakëron deri në perëndim, ashtu do të jetë ardhja e Birit të Njeriut.
²⁸ Kudo që të ketë kërma, aty do të mblidhen korbat.
²⁹ Menjëherë pas mundimit të madh të atyre ditëve dielli do të errësohet, hëna nuk do të japë shkëlqimin e saj, yjet do të bien prej qiellit dhe fuqitë e qiejve do të tunden.
³⁰ Pastaj do të shfaqet shenja e Birit të Njeriut në qiell dhe atëherë të gjitha fiset e dheut do të vajtojnë e do të shohin Birin e Njeriut duke ardhur mbi retë e qiellit me fuqi e lavdi të madhe.
³¹ Ai do të dërgojë engjëjt e Vet me trumbetën e madhe dhe ata do të mbledhin të zgjedhurit e Tij nga të katër anët, nga njëri skaj i qiejve deri te tjetri.
³² Dhe tani, mësoni këtë shëmbëlltyrë nga fiku; sapo dega e tij bëhet e njomë dhe nxjerr gjethet, ju e merrni vesh që vera është afër.
³³ Po ashtu edhe ju, kur t’i shihni të gjitha këto, merreni vesh që është pranë, tek dera.
³⁴ Me të vërtetë po ju them, ky brez nuk do të kalojë pa ndodhur të gjitha këto gjëra.
³⁵ Qielli dhe toka do të kalojnë, por fjalët e Mia nuk do të kalojnë.
³⁶ Askush nuk di gjë për atë ditë dhe atë orë, as engjëjt e qiejve, as Biri, por vetëm Ati.
³⁷ Siç ishte në ditët e Noes, ashtu do të jetë ardhja e Birit të Njeriut.
³⁸ Sepse siç ishte në ato ditë para përmbytjes, njerëzit hanin e pinin, martoheshin dhe jepeshin për martesa, deri në ditën në të cilën Noeja hyri në arkë,
³⁹ dhe nuk e morën vesh derisa erdhi përmbytja dhe i përpiu të gjithë; ashtu do të jetë edhe ardhja e Birit të Njeriut.
⁴⁰ Atëherë dy njerëz do të jenë në arë, njëri do të merret e tjetri do të lihet.
⁴¹ Dy gra do të jenë duke bluar në mulli, njëra do të merret e tjetra do të lihet.
⁴² Hapni sytë, pra! Sepse nuk e dini në ç’ditë do të vijë Zoti juaj.
⁴³ Por merrni vesh këtë, që po ta dinte i zoti i shtëpisë në ç’orë të natës vjen vjedhësi, do të rrinte zgjuar e nuk do të linte t’i hynin për të vjedhur në shtëpinë e tij.
⁴⁴ Prandaj edhe ju të jeni gati, sepse në atë orë që ju nuk e mendoni, do të vijë Biri i Njeriut.
⁴⁵ Kush vallë është ai shërbëtor besnik dhe i mençur, të cilin i zoti e vuri përmbi shërbëtorët e shtëpisë, për t’u dhënë ushqimin në kohë?
⁴⁶ Lum ai shërbëtor, i cili, kur i vjen i zoti, e gjen duke vepruar kështu.
⁴⁷ Me të vërtetë po ju them, ai do t’i besojë atij gjithë pasurinë e vet.
⁴⁸ Por mendoni sikur ai shërbëtor i lig të thotë në zemrën e vet: ‘Im zot po vonohet’
⁴⁹ dhe të fillojë t’i rrahë shokët e vet dhe të hajë e të pijë me të dehurit.
⁵⁰ I zoti i atij shërbëtori do të vijë në një ditë kur ai nuk e pret dhe në orën që ai nuk e di.
⁵¹ Do ta bëjë copë-copë dhe do t’ia caktojë vendin bashkë me hipokritët; atje do të ketë kujë e kërcëllimë dhëmbësh."