kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^23
1 Pastaj Jezusi i foli turmës dhe dishepujve të Vet
² dhe tha: "Skribët dhe farizenjtë u ulën në ndenjësen e Moisiut.
³ Pra, duhet të bëni dhe të zbatoni të gjitha ato që t’ju thonë, por mos bëni sipas veprave të tyre, sepse ata nuk i bëjnë ato që thonë.
⁴ Sepse ata lidhin barrë të rënda [e të vështira për t’u mbajtur] dhe i vënë mbi shpatullat e njerëzve, por ata vetë nuk duan t’i lëvizin as me gisht.
⁵ Të gjitha punët e tyre i bëjnë për t’u dukur para njerëzve: i zgjerojnë rripat e tyre të lutjes dhe i zgjasin thekët e petkave të tyre.
⁶ Duan vendin e nderit nëpër gosti dhe ndenjëset e para në sinagoga,
⁷ u pëlqejnë përshëndetjet në treg dhe duan që njerëzit t’i thërrasin: ‘Rabbi’.
⁸ Por ju nuk duhet t’ju thërrasin ‘Rabbi’, sepse Një është Mjeshtri juaj dhe ju të gjithë jeni vëllezër.
⁹ Askënd mos e thërrisni ‘atë’ mbi tokë, sepse Një është Ati juaj, që është në qiej.
¹⁰ As mjeshtër të mos thirreni, sepse Një është Mjeshtri juaj, Krishti.
¹¹ Por më i madhi mes jush do të jetë shërbyesi juaj.
¹² Kushdo që do ta lartësojë veten, do të përulet, dhe kushdo që do ta përulë veten, do të lartësohet.
¹³ Mjerë ju, skribë dhe farizenj, ju hipokritë! Sepse ju ua mbyllni njerëzve në fytyrë mbretërinë e qiejve. Sepse ju nuk hyni, as nuk i lini të hyjnë ata që përpiqen të hyjnë.
¹⁴ [Mjerë ju, skribë dhe farizenj, ju hipokritë! Sepse ju përlani shtëpitë e vejushave, dhe për sy e faqe bëni lutje të gjata; prandaj ju do të merrni dënim më të madh.]
¹⁵ Mjerë ju, skribë e farizenj, ju hipokritë! Sepse ju kaloni det e tokë për të bërë dikë të kthejë fe dhe, kur ai kthehet, ju e bëni pjellë të ferrit dy herë më shumë se veten tuaj.
¹⁶ Mjerë ju, o udhërrëfyes të verbër, që thoni: ‘Kushdo që bën be për tempullin, kjo nuk vlen, por kushdo që betohet për arin e tempullit, ka detyrim.’
¹⁷ Ju, o të marrë e të verbër! Ç’gjë është më e madhe, ari apo tempulli që ka shenjtëruar arin?
¹⁸ Gjithashtu thoni: ‘Kushdo që bën be për altar, kjo nuk vlen, por kushdo që betohet për dhuratën mbi altar, ka detyrim.’
¹⁹ O të verbër! Ç’gjë është më e madhe, dhurata apo altari që shenjtëron dhuratën?
²⁰ Pra, ai që bën be për altarin, betohet për të dhe për gjithçka mbi të.
²¹ Dhe ai që bën be për tempullin, betohet për të dhe për Atë që rri në të.
²² Ai që bën be për qiellin, betohet për fronin e Perëndisë dhe për Atë që është ulur në të.
²³ Mjerë ju, skribë e farizenj, ju hipokritë! Sepse ju jepni të dhjetën e mendrës, të koprës, të qimnonit dhe keni lënë pas dore çështjet më të rëndësishme të ligjit: gjykimin, dhembshurinë dhe besimin. Këto duhet të bënit, pa lënë edhe ato të tjerat.
²⁴ Ju, udhërrëfyes të verbër, që pastroni në kullesë mushkonjën dhe gëlltisni devenë.
²⁵ Mjerë ju, skribë e farizenj, ju hipokritë! Sepse ju e pastroni nga jashtë kupën dhe pjatën, por nga brenda ato janë plot plaçkitje e shfrenime.
²⁶ Ti, o farize i verbër, pastro më parë pjesën e brendshme të kupës, që edhe pjesa e jashtme e saj të jetë e pastruar.
²⁷ Mjerë ju, skribë e farizenj, ju hipokritë! Sepse ju ngjani me varret e lyera me gëlqere, që nga jashtë duken vërtet të bukura, por nga brenda janë plot eshtra të vdekurish e gjithë papastërti.
²⁸ Po kështu edhe ju, nga jashtë dukeni vërtet njerëz të drejtë, por nga brenda jeni plot hipokrizi dhe paudhësi.
²⁹ Mjerë ju, skribë e farizenj, ju hipokritë! Sepse ju ndërtoni varret e profetëve dhe stolisni përmendoret e të drejtëve
³⁰ dhe thoni: ‘Po të ishim në ditët e etërve tanë, nuk do të kishim marrë pjesë me ta në derdhjen e gjakut të profetëve.’
³¹ Kështu ju dëshmoni për veten tuaj se jeni bij të atyre që vranë profetët.
³² Mbusheni edhe ju masën e etërve tuaj!
³³ Ju gjarpërinj, pjella nepërkash, si do t’i shpëtoni dënimit në ferr?
³⁴ Prandaj ja, Unë ju dërgoj profetë, njerëz të mençur e skribë dhe disa prej tyre do t’i vrisni e do t’i kryqëzoni; të tjerët do t’i fshikulloni në sinagogat tuaja e do t’i përndiqni nga qyteti në qytet,
³⁵ që mbi ju të bjerë i gjithë gjaku i drejtë që është derdhur mbi tokë, nga gjaku i Abelit të drejtë deri te gjaku i Zakarisë, birit të Barakias, të cilin ju e vratë midis tempullit dhe altarit.
³⁶ Me të vërtetë po ju them, të gjitha këto do të bien mbi këtë brez.
³⁷ O Jeruzalem, Jeruzalem, që vret profetët e qëllon me gurë ata që dërgohen te ti, sa herë kam dëshiruar të mbledh fëmijët e tu së bashku, ashtu si mbledh pula zogjtë e vet nën krahë, por ju nuk deshët!
³⁸ Ja, shtëpia juaj ju ka mbetur e shkretë.
³⁹ Sepse po ju them se tani e tutje nuk do të më shihni më, derisa të thoni: "I bekuar është Ai që vjen në emër të Zotit!"