kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^17
1 Pas gjashtë ditësh Jezusi mori me vete Pjetrin, Jakobin, Gjonin, të vëllanë e tij dhe i tërhoqi mënjanë në një mal të lartë.
² Atje Ai u shpërfytyrua para tyre; fytyra i ndriti si dielli dhe rrobat iu bënë të bardha si drita.
³ Dhe ja, para tyre u shfaq Moisiu dhe Elia, duke biseduar me Jezusin.
⁴ Pjetri u përgjigj dhe i tha Jezusit: "Zot, mirë është që ne të rrimë këtu. Po të duash, do të ngre këtu tri tenda, një për Ty, një për Moisiun dhe një për Elian."
⁵ Ndërsa ai fliste, ata i mbuloi një re e shndritshme, dhe ja, një zë erdhi nga reja që tha: "Ky është Biri Im i dashur, tek i cili gjej kënaqësi. Dëgjojeni!"
⁶ Dishepujt, me ta dëgjuar këtë, ranë me fytyrë përdhe dhe u tmerruan.
⁷ Jezusi u afrua, i preku dhe tha: "Ngrihuni e mos kini frikë!"
⁸ Kur ngritën sytë, ata nuk panë njeri tjetër veç Jezusit.
⁹ Ndërsa po zbrisnin nga mali, Jezusi i udhëzoi, duke u thënë: "Mos i thoni askujt për vegimin, derisa Biri i Njeriut të ngjallet nga të vdekurit."
¹⁰ Dishepujt e pyetën, duke i thënë: "Atëherë, përse thonë skribët se më parë duhet të vijë Elia?"
¹¹ Jezusi u përgjigj dhe u tha: "Po, vërtet, Elia vjen dhe do të vërë çdo gjë në vend,
¹² por, po ju them, që Elia tashmë ka ardhur dhe ata nuk e njohën dhe i punuan gjithë sa deshën. Po ashtu ka për të vuajtur prej tyre edhe Biri i Njeriut."
¹³ Pastaj dishepujt e kuptuan që e kishte fjalën për Gjon Pagëzorin.
¹⁴ Kur erdhën te turma, Atij iu afrua një njeri, i cili ra në gjunjë përpara Tij
¹⁵ dhe i tha: "Zot, ki mëshirë për tim bir, sepse i bie sëmundja e tokës dhe po vuan shumë; shpeshherë bie në zjarr dhe shumë herë në ujë.
¹⁶ Ua solla dishepujve të Tu dhe ata nuk mundën ta shërojnë dot."
¹⁷ Jezusi u përgjigj dhe tha: "O brez i pafe dhe i mbrapshtë! Edhe sa kohë do të jem me ju? Deri kur do t’ju duroj? Sillmani këtu!"
¹⁸ Jezusi e qortoi dhe demoni doli prej djalit; që nga ai çast ai u shërua.
¹⁹ Pastaj dishepujt iu afruan Jezusit vetëm për vetëm dhe thanë: "Përse nuk mundëm ta dëbonim ne?"
²⁰ Ai u tha: "Sepse ju keni kaq pak besim. Me të vërtetë po ju them, po të keni besim sa fara e sinapit, do t’i thoshit këtij mali: ‘Lëviz prej këtej e shko atje’ dhe ai do të lëvizte; asgjë nuk do të jetë e pamundur për ju.
²¹ [Por ky lloj nuk del me gjë tjetër, veç me lutje e agjërim.]"
²² Kur erdhën së bashku në Galile, Jezusi u tha: "Birin e Njeriut do ta dorëzojnë në duar të njerëzve,
²³ do ta vrasin dhe të tretën ditë do të ngjallet." Ata u mbushën me hidhërim të madh.
²⁴ Kur arritën në Kapernaum, ata që merrnin si tatim dy drahme, iu afruan Pjetrit dhe i thanë: "Po Mjeshtri juaj, nuk i paguan dy drahmet?"
²⁵ Ai tha: "Po." Kur erdhi në shtëpi, Jezusi i foli i pari dhe tha: "Çfarë mendon ti Simon? Kujt ia marrin mbretërit e dheut tatimin ose taksat? Fëmijëve të tyre apo të huajve?"
²⁶ Kur ai tha: "Të huajve", Jezusi i tha: "Atëherë pra, bijtë nuk hyjnë këtu.
²⁷ Por që të mos i fyejmë, shko në det, hidh grepin dhe merr peshkun e parë që do të zësh. Kur t’i hapësh gojën, do të gjesh aty një monedhë katërdrahmëshe. Merre dhe jepua për Mua e për vete."