kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^16
1 Farizenjtë dhe saducenjtë iu afruan dhe, për ta vënë në provë, i kërkuan t’u tregonte një shenjë nga qielli.
² Por Ai u përgjigj dhe u tha: "Kur ngryset, ju thoni: ‘Do të kemi mot të mirë, sepse qielli kuqëlon.’
³ Dhe në mëngjes thoni: ‘Do të kemi mot me stuhi sot, sepse qielli kuqëlon dhe është i vrenjtur.’ Sa mirë dini të dalloni pamjen e qiellit, ndërsa shenjat e kohëve nuk arrini t’i dalloni?
⁴ Ky brez i lig dhe kurorëshkelës dashka një shenjë, por asnjë shenjë nuk ka për t’iu dhënë, veç shenjës së Jonas." Dhe si i la ata pas, u largua.
⁵ Kur dishepujt kaluan në bregun tjetër, harruan të merrnin me vete bukët.
⁶ Jezusi u tha: "Kini kujdes e ruhuni nga majaja e farizenjve dhe e saducenjve."
⁷ Filluan ta shqyrtonin këtë midis tyre, duke thënë: "E thotë ngaqë nuk morëm bukë me vete."
⁸ Jezusi, që e mori vesh, tha: "O njerëz besëpakë, përse flisni midis jush, se nuk paskeni bukë?
⁹ Ende nuk e keni marrë vesh? A nuk ju kujtohen pesë bukët për pesë mijë vetat dhe sa shumë shporta mbushët?
¹⁰ As shtatë bukët e katër mijë vetave dhe sa shumë shporta mbushët?
¹¹ Si nuk e merrni vesh, se nuk ju fola për bukët? Por ruhuni nga majaja e farizenjve dhe e saducenjve."
¹² Pastaj ata e kuptuan që Ai nuk u kishte thënë të ruheshin nga majaja e bukës, por nga mësimi i farizenjve dhe i saducenjve.
¹³ Kur Jezusi erdhi në krahinën e Cezaresë së Filipit, i pyeti dishepujt e Vet: "Kush thonë njerëzit se është Biri i Njeriut?"
¹⁴ Ata thanë: "Disa thonë, Gjon Pagëzori; të tjerë, Elia; disa të tjerë, Jeremia ose njëri nga profetët."
¹⁵ Ai u tha: "Po ju, kush thoni se jam Unë?"
¹⁶ Simon Pjetri u përgjigj dhe tha: "Ti je Krishti, Biri i Perëndisë së gjallë."
¹⁷ Jezusi u përgjigj dhe i tha: "Lum ti, o Simon, bir i Jonës, sepse këtë nuk ta zbuloi mishi dhe gjaku, por Ati Im që është në qiej.
¹⁸ Edhe unë po të them, që ti je Pjetri; mbi këtë shkëmb do ta ndërtoj kishën Time dhe portat e ferrit nuk do ta mposhtin dot.
¹⁹ Ty do të t’i jap çelësat e mbretërisë së qiejve dhe çdo gjë që të lidhësh në tokë, do të jetë e lidhur në qiej, dhe çdo gjë që të zgjidhësh në tokë, do të jetë e zgjidhur në qiej."
²⁰ Pastaj i porositi dishepujt që të mos i thoshin askujt që Ai ishte Krishti.
²¹ Që nga ajo kohë Jezusi filloi t’u shpjegonte dishepujve të Vet se i duhej të shkonte në Jeruzalem, ku do të kalonte shumë vuajtje nga pleqtë, kryepriftërinjtë dhe skribët, do të vritej dhe të tretën ditë do të ngjallej.
²² Pastaj Pjetri e mori mënjanë dhe filloi ta qortonte, duke i thënë: "Mëshiroje Veten, o Zot! Kjo nuk do të ndodhë kurrë Ty."
²³ Por Ai u kthye dhe i tha Pjetrit: "M’u hiq sysh, Satan; ti je shkandull për Mua, sepse nuk e ke mendjen te punët e Perëndisë, por tek ato të njerëzve."
²⁴ Pastaj Jezusi u tha dishepujve të Vet: "Nëse ndokush dëshiron të vijë pas Meje, duhet të mohojë vetveten, të marrë kryqin e vet e të më ndjekë Mua.
²⁵ Sepse, kushdo që kërkon ta shpëtojë jetën e vet, do ta humbasë, dhe kushdo që e humbet jetën e vet për shkakun Tim, do ta gjejë atë.
²⁶ Sepse ç’dobi ka njeriu, nëse fiton gjithë botën dhe humbet shpirtin e vet? Ose ç’mund të japë njeriu si shkëmbim për shpirtin e vet?
²⁷ Sepse Biri i Njeriut do të vijë në lavdinë e Atit të Vet me engjëjt e Vet dhe atëherë do të shpërblejë secilin sipas veprave të tij.
²⁸ Me të vërtetë po ju them, ka disa nga ata këtu, që nuk kanë për ta shijuar vdekjen derisa të shohin Birin e Njeriut duke ardhur në mbretërinë e Tij."