kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^15
1 Pastaj Jezusit iu afruan disa farizenj dhe skribë nga Jeruzalemi dhe i thanë,
² "Përse po e shkelin dishepujt e Tu traditën e më të vjetërve? Sepse ata nuk bëjnë larjen e duarve kur hanë bukë."
³ Ai u përgjigj dhe u tha: "Po ju vetë, përse e shkelni urdhërimin e Perëndisë për hir të traditës suaj?
⁴ Sepse Perëndia ka thënë: ‘Ndero atin dhe nënën tënde’ dhe ‘ai që mallkon atin ose nënën, duhet të vritet.’
⁵ Kurse ju thoni që po t’i thotë dikush atit ose nënës: ‘Çdo gjë që mund të përfitonit prej meje, është dhuratë për Perëndinë,’
⁶ nuk është i detyruar të nderojë atin e vet me të. Me këtë e keni zhvlerësuar fjalën e Perëndisë për hir të traditës suaj.
⁷ Hipokritë! Mirë pati profetizuar Isaia për ju, kur thoshte,
⁸ ‘Me gojë më nderon ky popull; por me zemër janë shumë larg Meje.
⁹ Më kot më adhurojnë, duke dhënë mësime që janë urdhëresa njerëzish.’"
¹⁰ Pastaj thirri rreth vetes turmën dhe i tha: "Dëgjoni dhe merrni vesh!
¹¹ Çka hyn nga goja, nuk e përlyen njeriun, por çka del prej goje, ajo e përlyen njeriun."
¹² Pastaj dishepujt iu afruan dhe i thanë: "A e di që farizenjtë të kanë marrë mëri, kur dëgjuan atë që the?"
¹³ Ai u përgjigj dhe tha: "Çdo bimë që nuk e ka mbjellë Ati im qiellor, do të shkulet nga rrënjët.
¹⁴ Lërini ata; janë të verbër që u prijnë të verbërve. Kur i verbri i prin të verbrit, të dy do të bien në gropë."
¹⁵ Pjetri mori fjalën dhe i tha: "Na e shpjego këtë shëmbëlltyrë."
¹⁶ Ai tha: "A mos ju ka lënë mendja edhe ju?
¹⁷ A nuk e kuptoni që çdo gjë që hyn në gojë, shkon në bark dhe përfundon në gropën e zezë?
¹⁸ Por çka del prej goje, vjen nga zemra, dhe kjo e përlyen njeriun.
¹⁹ Sepse nga zemra vijnë mendimet e liga, vrasjet, tradhtia bashkëshortore, fëlliqësitë morale, vjedhjet, dëshmitë e rreme dhe blasfemitë.
²⁰ Këto janë ato që e përlyejnë njeriun; por të hash pa larë duart, nuk e përlyen njeriun."
²¹ Pastaj Jezusi doli prej andej dhe shkoi në krahinat e Tirit dhe të Sidonit.
²² Dhe ja, një grua kanaanite që kishte ardhur nga ato anë, filloi të thërriste, duke thënë: "Ki mëshirë për mua, o Zot, Bir i Davidit; ime bijë po mundohet keq nga demoni."
²³ Ai nuk i ktheu përgjigje. Dishepujt iu afruan dhe i thanë, duke e lutur: "Na e largo, sepse po na vjen pas duke thirrur."
²⁴ Ai u përgjigj dhe tha: "Jam dërguar vetëm për delet e humbura të shtëpisë së Izraelit."
²⁵ Por ajo erdhi dhe, duke rënë në gjunjë para Tij, tha: "Zot, ndihmomë!"
²⁶ Ai u përgjigj dhe tha: "Nuk është mirë të marrësh bukën e fëmijëve dhe tua hedhësh qenve."
²⁷ Ajo tha: "Po, Zot, por edhe qentë hanë nga thërrimet që bien nga tryeza e të zotit të tyre."
²⁸ Atëherë Jezusi u përgjigj dhe i tha: "Grua, i madh është besimi yt. U bëftë ashtu siç do ti." Dhe që nga ai çast vajza e saj u shërua.
²⁹ Pasi u largua prej andej, Jezusi shkoi buzë detit të Galilesë; pastaj u ngjit në mal dhe u ul atje.
³⁰ Turma të mëdha iu afruan, duke sjellë me vete të çalë, të verbër, ulokë e shumë të sëmurë të tjerë që i vendosën para këmbëve të Tij e Ai i shëroi,
³¹ aq sa turmat u mrekulluan, kur panë të pagojët që flisnin, ulokët të shëruar, të çalët që ecnin, të verbrit që shihnin dhe përlëvdonin Perëndinë e Izraelit.
³² Jezusi thirri dishepujt e Vet e tha: "Po më vjen keq për turmën, sepse ka tri ditë që po rrinë me Mua, dhe nuk kanë ç’të hanë. Nuk dua t’i largoj të uritur, se mos u bie të fikët rrugës."
³³ Dishepujt e Tij i thanë: "E ku të gjejmë aq shumë bukë në këtë vend të shkretë, sa të ngopim me bukë një turmë kaq të madhe?"
³⁴ Jezusi u tha: "Sa bukë keni?" Ata i thanë: "Shtatë bukë dhe disa peshq të vegjël."
³⁵ Ai i tha turmës të ulej përtokë.
³⁶ Mori shtatë bukët dhe peshqit dhe si tha lutjen e falënderimit, i theu dhe filloi t’ua jepte dishepujve të Vet dhe këta ia shpërndanë turmës.
³⁷ Të gjithë hëngrën dhe u nginjën. Pastaj dishepujt mblodhën ç’teproi nga copat në shtatë shporta të mbushura plot.
³⁸ Ata që hëngrën, ishin katër mijë burra, veç grave dhe fëmijëve.
³⁹ Pasi e kishte përcjellë turmën, Jezusi hipi në lundër dhe shkoi në krahinën e Magdalasë.