kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^12
1 Në atë kohë, Jezusi shkonte një të shtunë përmes të mbjellave; dishepujt e Tij i kishte marrë uria dhe filluan të këpusnin kallinj e të hanin.
² Kur farizenjtë e panë këtë, i thanë: "Ja, dishepujt e Tu po bëjnë atë që nuk e lejon ligji të shtunën."
³ Por Ai u tha: "A nuk e paskeni lexuar ç’bëri Davidi kur e mori uria atë dhe ata që e shoqëronin?
⁴ A nuk e paskeni lexuar që ai hyri në shtëpinë e Perëndisë dhe hëngri bukët e përkushtimit, të cilat nuk i lejohej t’i hante as atij, as atyre që ishin me të, me përjashtim vetëm të priftërinjve?
⁵ A nuk e paskeni lexuar në Ligj që të shtunave në tempull priftërinjtë e përdhosin këtë ditë, dhe megjithatë janë pa faj?
⁶ Por po ju them, që këtu ka një më të madh se tempulli.
⁷ Po ta dinit ç’do të thotë: ‘Dua mëshirë dhe jo flijim’, nuk do t’i kishit dënuar të pafajshmit.
⁸ Sepse Biri i Njeriut është Zot i së shtunës."
⁹ Pasi u largua prej andej, Ai shkoi në sinagogën e tyre.
¹⁰ Dhe ja, aty ishte një njeri që e kishte dorën të tharë. Ata e pyetën dhe i thanë: "A është e ligjshme të shërosh të shtunave?" Këtë e bënë që ta padisnin.
¹¹ Ai u tha: "Cili do të jetë ai njeri prej jush, që ka një dele, dhe po t’i bjerë në gropë të shtunën, nuk do ta kapë e ta ngrejë?
¹² Por sa shumë më i çmueshëm se delja është një njeri! Prandaj, të bësh mirë të shtunave, është e lejueshme."
¹³ Pastaj i tha atij njeriu: "Shtrije dorën." Ai e shtriu dhe dora iu ngjall e u bë e shëndoshë si tjetra.
¹⁴ Farizenjtë dolën jashtë dhe thurën një plan kundër Tij, si ta zhduknin.
¹⁵ Por kur Jezusi e mori vesh, u largua prej andej. Turma të mëdha i shkuan pas dhe Ai i shëroi të gjithë.
¹⁶ I porosiste në mënyrë të rreptë që të mos tregonin se kush ishte,
¹⁷ që të përmbushej ajo që ishte thënë nëpërmjet profetit Isaia,
¹⁸ "Ja, shërbëtori Im, që e kam zgjedhur, i dashuri Im, tek i cili gjen kënaqësi shpirti Im; do ta vë Frymën Time mbi Të dhe Ai do t’u shpallë kombeve drejtësinë.
¹⁹ Ai nuk do të grindet, as nuk do të bërtasë; askush nuk do t’ia dëgjojë zërin në rrugë.
²⁰ Kallam të thyer nuk do të copëtojë dhe fitil që nxjerr tym nuk do të shuajë, derisa t’i sigurojë fitoren drejtësisë.
²¹ Në emrin e Tij do t’i varin shpresat kombet."
²² Pastaj i sollën një njeri të pushtuar nga demonët, të verbër e të pagojë. Ai e shëroi, kështu që i pagoji mund të fliste dhe të shihte.
²³ E gjithë turma u mrekullua dhe tha: "A nuk është ky biri i Davidit?"
²⁴ Kur farizenjtë e dëgjuan, thanë: "Ky i dëbon demonët vetëm me anë të Beelzebulit, të parit të demonëve."
²⁵ Por Jezusi, duke ditur mendimet e tyre, u tha: "Çdo mbretëri e përçarë do të shembet dhe çdo qytet ose shtëpi e përçarë nuk do të qëndrojë dot.
²⁶ Por edhe sikur Satani të dëbojë Satanin, ai është i përçarë me veten e tij; si mund të qëndrojë pra, mbretëria e tij?
²⁷ Nëse Unë i dëboj demonët me anë të Beelzebulit, po bijtë tuaj, me anë të kujt i dëbojnë demonët? Prandaj, ata do të jenë gjykatësit tuaj.
²⁸ Nëse Unë i dëboj demonët me anë të Frymës së Perëndisë, atëherë te ju ka ardhur mbretëria e Perëndisë.
²⁹ Ose si mund të hyjë dikush në shtëpinë e të fortit e t’i grabisë plaçkat pa e lidhur më parë të fortin? Vetëm atëherë mund t’i plaçkisë shtëpinë.
³⁰ Kush nuk është me Mua, është kundër Meje; kush nuk mbledh me Mua, shkapërdan.
³¹ Prandaj po ju them, çdo mëkat e blasfemi do t’u falet njerëzve, por blasfemia kundër Frymës nuk do t’u falet.
³² Kujtdo që flet një fjalë kundër Birit të Njeriut, do t’i falet, por kujtdo që flet kundër Frymës së Shenjtë, nuk do t’i falet, as në këtë jetë, as në atë që do të vijë.
³³ Ose bëjeni pemën të mirë dhe fryti saj do të jetë i mirë, ose bëjeni pemën të kalbur dhe fryti i saj do të jetë i kalbur, sepse pema njihet nga fryti i saj.
³⁴ O pjella nepërkash, si mund të flisni gjëra të mira ju, që jeni të ligj? Sepse çka e mbush zemrën, atë e flet goja.
³⁵ Njeriu i mirë nxjerr gjëra të mira nga thesari i vet i mirë dhe njeriu i lig nxjerr gjëra të këqija nga thesari i vet i keq.
³⁶ Por po ju them, që për çdo fjalë boshe që do të thonë njerëzit, do të japin llogari në ditën e gjykimit.
³⁷ Sepse nga fjalët e tua do të përligjesh dhe nga fjalët e tua do të dënohesh."
³⁸ Pastaj, disa prej skribëve dhe farizenjve iu përgjigjën e thanë: "Mjeshtër, duam të shohim një shenjë prej Teje."
³⁹ Ai iu përgjigj dhe u tha: "Ky brez i lig dhe kurorëshkelës dashka një shenjë. Por asnjë shenjë nuk ka për t’iu dhënë, veç shenjës së profetit Jona.
⁴⁰ Sepse ashtu si qëndroi Jona tri ditë e tri net në bark të përbindëshit të detit, po ashtu edhe Biri i Njeriut do të rrijë tri ditë e tri net në zemër të dheut.
⁴¹ Njerëzit e Ninivës do të ngrihen në kohën e gjykimit me këtë brez dhe do ta dënojnë, sepse ata u penduan pas predikimit të Jonës dhe vërtet, këtu ka një më të madh se Jona.
⁴² Mbretëresha e Jugut do të ngrihet në kohën e gjykimit me këtë brez dhe do ta dënojë, sepse ajo kishte ardhur nga skajet e dheut për të dëgjuar mençurinë e Solomonit; dhe ja, këtu ka një më të madh se Solomoni.
⁴³ Kur fryma e papastër del nga njeriu, ajo endet nëpër vende të thata duke kërkuar prehje, por nuk e gjen.
⁴⁴ Pastaj thotë: ‘Do të kthehem në banesën time nga kam dalë’, dhe, kur vjen, e gjen atë të zbrazur, të pastruar e të rregulluar.
⁴⁵ Atëherë shkon dhe merr me vete shtatë frymë të tjera më të liga se vetja dhe hyjnë e zënë vend aty; gjendja e atij njeriu tani bëhet më e keqe se më parë. Po kështu do të ndodhë edhe me këtë brez të lig."
⁴⁶ Ndërsa vazhdonte t’i fliste turmës, ja, e ëma dhe vëllezërit e Tij po qëndronin jashtë dhe kërkonin të flisnin me Të.
⁴⁷ Dikush i tha: "Ja, nëna dhe vëllezërit e Tu janë jashtë e duan të flasin me Ty."
⁴⁸ Por Ai u përgjigj dhe i tha atij që i foli: "Kush është nëna Ime dhe kush janë vëllezërit e Mi?"
⁴⁹ Pastaj, duke shtrirë dorën drejt dishepujve të Vet, tha: "Ja, nëna Ime dhe vëllezërit e Mi.
⁵⁰ Sepse kushdo që bën vullnetin e Atit Tim që është në qiej, ai është për Mua vëlla, motër e nënë."