kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^11
1 Dhe ndodhi që kur Jezusi mbaroi së udhëzuari të dymbëdhjetë dishepujt e Vet, u largua prej andej, që të japë mësim dhe të predikonte në qytetet e tyre.
² Kur Gjoni dëgjoi në burg për punët e Krishtit, dërgoi fjalë me anë të dishepujve të vet
³ dhe i tha: "A je Ti Ai që duhej të vinte, apo duhet të presim një tjetër?"
⁴ Jezusi u përgjigj dhe u tha: "Shkoni dhe i thoni Gjonit këto që dëgjoni dhe shikoni.
⁵ Të verbërve po u kthehet shikimi dhe të çalët po ecin, të gërbulurit po pastrohen dhe të shurdhërit po dëgjojnë, të vdekurit po ngjallen dhe të varfërve po u predikohet ungjilli.
⁶ Lum ai që nuk shkandullohet për shkakun Tim."
⁷ Kur ata u larguan, Jezusi filloi t’i fliste turmës për Gjonin: "Çfarë dolët për të parë në shkretëtirë? Një kallam që tundet nga era?
⁸ Pra, çfarë dolët për të parë? Një njeri të veshur me petka të buta? Sigurisht që jo, ata që mbajnë rroba të buta, rrinë në pallatet e mbretërve.
⁹ Pra, çfarë dolët për të parë? Një profet? Po, po ju them, madje shumë më tepër se një profet.
¹⁰ Sepse ky është ai për të cilin është shkruar: ‘Ja, Unë po dërgoj lajmëtarin Tim para Teje, i cili do të përgatisë udhën Tënde para Teje.’
¹¹ Me të vërtetë po ju them, midis atyre që kanë lindur prej gruaje, nuk ka dalë ndonjë më i madh se Gjon Pagëzori; por më i vogli në mbretërinë e qiejve është më i madh se ai.
¹² Që nga ditët e Gjon Pagëzorit deri tani mbi mbretërinë e qiejve është ushtruar dhunë dhe përdhunuesit e zaptojnë.
¹³ Sepse të gjithë Profetët dhe Ligji kanë profetizuar deri në ditët e Gjonit.
¹⁴ Dhe nëse doni ta pranoni, ai është Elia, i cili duhej të vinte.
¹⁵ Ai që ka veshë, le të dëgjojë.
¹⁶ Por me kë ta krahasoj këtë brez? U ngjan fëmijëve të ulur në sheshet e tregut, që u thërrasin vërsnikëve
¹⁷ dhe u thonë: ‘I ramë fyellit për ju dhe ju nuk hodhët valle; qamë me vaje dhe ju nuk derdhët lot.’
¹⁸ Erdhi Gjoni, që as nuk ha e as nuk pi, dhe thonë ‘Ka demon.’
¹⁹ Erdhi Biri i Njeriut, që ha e pi, dhe thonë: ‘Ja, një njeri grykës dhe i dhënë pas verës, mik me tagrambledhësit dhe me mëkatarët. Por urtësia përligjet nga veprat e veta."
²⁰ Pastaj filloi të qortojë qytetet ku janë kryer pjesa më e madhe e mrekullive të Tij, sepse ato nuk u penduan.
²¹ "Mjerë ti, o Korazin! Mjerë ti, o Betsaida! Sepse sikur mrekullitë që u kryen ndër ju, të kishin ndodhur në Tir e në Sidon, ata do të ishin penduar prej kohësh të veshur me grathore e me hi në kokë.
²² Megjithatë, po ju them se në ditën e gjykimit Tiri e Sidoni do ta kenë më të lehtë se ju për të duruar.
²³ Dhe ti, Kapernaum, mos vallë do të lartësohesh deri në qiell? Poshtë në ferr do të gremisesh, sepse sikur mrekullitë që janë kryer në ty, të ishin kryer në Sodomë, ajo do të ishte në këmbë edhe sot.
²⁴ Por po ju them, në ditën e gjykimit vendi i Sodomës do ta ketë më të lehtë se ty për të duruar."
²⁵ Në atë kohë Jezusi u përgjigj e tha: "Të lëvdoj Ty o Atë, Zot i qiellit dhe i dheut, sepse ua mbajte të fshehura këto gjëra të mençurve e të zgjuarve dhe ua zbulove fëmijëve të vegjël.
²⁶ Po, o Atë, sepse kështu të ka pëlqyer Ty.
²⁷ Gjithçka më është dhënë nga Ati Im; askush nuk e njeh Birin veç Atit; dhe askush nuk e njeh Atin përveç Birit dhe atij që dëshiron t’ia zbulojë Biri.
²⁸ Ejani tek Unë, të gjithë ju që jeni të sfilitur e të rënduar dhe Unë do t’ju bëj të preheni.
²⁹ Merrni mbi vete zgjedhën Time dhe mësoni prej Meje; sepse jam zemërbutë e i përvuajtur në zemër dhe do të gjeni prehje për shpirtrat tuaj.
³⁰ Sepse zgjedha Ime është e butë dhe barra Ime është e lehtë."