8
¹ Në ato ditë, meqë turma ishte shumë e madhe e nuk kishin gjë për të ngrënë, Ai thirri dishepujt dhe u tha,
² "Më dhimbset turma, sepse ka tri ditë që po rrinë me Mua e nuk kanë gjë për të ngrënë.
³ Po t’i përcjell për në shtëpitë e tyre të uritur, do t’u bjerë të fikët gjatë rrugës; disa prej tyre kanë ardhur nga larg."
⁴ Dishepujt iu përgjigjën: "Si do të mund t’i nginjë njeriu me bukë këta njerëz këtu në shkretëtirë?"
⁵ Ai i pyeti: "Sa bukë keni?" Ata i thanë: "Shtatë."
⁶ Pastaj e urdhëroi turmën të ulej në tokë. Mori të shtatë bukët, falënderoi Perëndinë dhe, si i ndau, filloi t’ua jepte dishepujve që t’ua vinin njerëzve përpara dhe ata ashtu bënë.
⁷ Ata kishin edhe pak peshq. Si i bekoi, u tha që t’ua vinin edhe këta përpara.
⁸ Ata hëngrën e u ngopën; pastaj dishepujt mblodhën copat që mbetën, shtatë shporta plot.
⁹ Aty ishin rreth katër mijë veta; pastaj Ai i nisi njerëzit.
¹⁰ Pastaj, pa u vonuar, hipi në lundër me dishepujt e Vet dhe shkoi në krahinën e Dalmanutës.
¹¹ Farizenjtë dolën dhe filluan të diskutojnë me Të, duke i kërkuar ndonjë shenjë prej qielli, për ta vënë në provë.
¹² Por Ai, pasi psherëtiu thellë, tha: "Përse kërkon shenjë ky brez? Me të vërtetë po ju them, asnjë shenjë nuk do t’i jepet këtij brezi."
¹³ I la ata dhe hipi përsëri në lundër e u largua për në bregun tjetër.
¹⁴ Dishepujt kishin harruar të merrnin bukë, e nuk kishin më shumë se një bukë me vete në lundër.
¹⁵ Ai i porositi duke u thënë: "Shikoni, ruhuni nga majaja e farizenjve dhe nga majaja e Herodit."
¹⁶ Ata diskutonin me njëri-tjetrin, duke thënë: "Kjo ndodh ngaqë nuk kemi bukë."
¹⁷ Kur e mori vesh Jezusi, u tha: "Përse bëni fjalë, që nuk keni bukë? Ende nuk po kuptoni dhe s’po e merrni vesh? Kaq të ngurtësuara i paskeni zemrat?
¹⁸ Sytë i keni e nuk shihni? Veshët i keni e nuk dëgjoni? Dhe si nuk ju kujtohet?
¹⁹ Kur të pesë bukët i ndava midis pesë mijë vetave, sa shporta plot me copa mblodhët?" Ata i thanë: "Dymbëdhjetë."
²⁰ "Po kur i ndava të shtata midis katër mijë vetave, sa shporta plot me copa mblodhët?" Ata i thanë: "Shtatë."
²¹ Ai u thoshte: "Ende nuk po e kuptoni?"
²² Erdhën në Betsaidë; atje i sollën një të verbër dhe iu lutën që ta prekte.
²³ Si e mori të verbrin për dore, e nxori jashtë fshatit; i leu sytë me pështymë dhe, pasi vuri duart mbi të, e pyeti: "A sheh gjë?"
²⁴ Ai vështroi lart dhe tha: "Shoh njerëz, që më duken si pemë duke ecur."
²⁵ Pastaj i vuri përsëri duart mbi sytë e tij; atëherë sytë iu hapën, shikimi i erdhi dhe gjithçka e shikonte qartë.
²⁶ E nisi në shtëpi, duke i thënë: "Mos hyr në fshat."
²⁷ Jezusi dhe dishepujt e Vet dolën për në fshatrat e Cezaresë së Filipit; gjatë rrugës Ai i pyeste dishepujt, duke u thënë: "Kush thonë njerëzit se jam Unë?"
²⁸ Ata iu përgjigjën, duke thënë: "Gjon Pagëzori; disa të tjerë thonë Elia, por të tjerë thonë, një nga profetët."
²⁹ Ai i pyeti: "Po ju, kush thoni se jam Unë?" Pjetri, u përgjigj dhe i tha: "Ti je Krishti."
³⁰ Ai i paralajmëroi që të mos flisnin me njeri për Të.
³¹ Dhe pastaj filloi t’i mësonte se Birit të Njeriut i duhej të vuante shumë gjëra, të hidhej poshtë prej pleqve, prej kryepriftërinjve, prej skribëve; i duhej të vritej dhe pas tri ditësh të ngjallej përsëri.
³² Dhe fliste hapur për këtë. Atëherë Pjetri e mori mënjanë dhe filloi ta qortonte.
³³ Por Ai u kthye, vështroi dishepujt e Vet dhe e qortoi Pjetrin duke i thënë: "M’u hiq sysh, Satan; sepse nuk mendon për punët e Perëndisë, por për ato të njerëzve."
³⁴ Pastaj e thirri turmën bashkë me dishepujt e Vet, dhe u tha: "Nëse ndokush dëshiron të më vijë pas, duhet të mohojë veten, të marrë kryqin dhe të më ndjekë.
³⁵ Sepse kushdo që dëshiron të shpëtojë jetën e vet, do ta humbë atë; por kushdo që do ta humbë jetën e vet për hirin Tim e të Ungjillit, do ta shpëtojë atë.
³⁶ Sepse ç’dobi ka njeriu nëse fiton tërë botën dhe humbet shpirtin e vet?
³⁷ Sepse çfarë mund të japë njeriu si shkëmbim për shpirtin e vet?
³⁸ Sepse kushdo që do të ketë turp për Mua dhe për fjalët e Mia në këtë brez të përdalë e mëkatar, edhe Biri i Njeriut do të ketë turp për të, kur Ai të vijë në lavdinë e Atit të Vet me engjëjt e shenjtë."