16
¹ Me të kaluar e shtuna, Maria Magdalena, Maria, e ëma e Jakobit dhe Saloma, blenë vajëra aromatike, që të shkonin e ta lyenin me vaj.
² Ditën e parë të javës, shumë herët në mëngjes, kur kishte zbardhur, ato shkuan te varri,
³ dhe pyesnin njëra-tjetrën: "Kush do të na e rrokullisë gurin nga hyrja e varrit?"
⁴ Kur ngritën sytë lart, panë që gurin e kishin rrokullisur, megjithëse ishte tepër i madh.
⁵ Kur hynë në varr, panë një djalosh, ulur në të djathtë, që kishte veshur një petk të bardhë, dhe i zuri frika.
⁶ Por ai u tha: "Mos u frikësoni. Po kërkoni Jezus Nazaretasin, që është kryqëzuar. Ai është ngjallur, nuk është këtu. Ja vendi ku e vunë."
⁷ Por shkoni dhe u thoni dishepujve të Tij dhe Pjetrit: ‘Ai po shkon para jush në Galile; atje do ta shihni, ashtu siç ju ka thënë’."
⁸ Ato dolën dhe ikën prej varrit, sepse i kishin zënë të dridhurat dhe tmerri. Askujt nuk i thanë gjë, pasi kishin frikë.
⁹ Kur u ngjall, ditën e parë të javës herët në mëngjes, iu shfaq së pari Maria Magdalenës, nga e cila kishte dëbuar shtatë demonë.
¹⁰ Ajo shkoi dhe i lajmëroi ata që kishin qenë me Të, të cilët po mbanin zi e po qanin.
¹¹ Ata, kur dëgjuan që Ai ishte gjallë dhe që ajo e kishte parë, nuk e besuan.
¹² Pas kësaj, Ai iu shfaq në një formë tjetër dyve prej tyre, kur po shkonin në arë.
¹³ Ata u larguan dhe ua thanë lajmin edhe të tjerëve; as këta nuk i besuan.
¹⁴ Më vonë Ai iu shfaq të njëmbëdhjetëve, kur ishin shtruar për të ngrënë, dhe i qortoi për mosbesimin dhe ngurtësinë e zemrave të tyre, që nuk u besuan atyre që e kishin parë Atë të ngjallur.
¹⁵ Ai u tha: "Shkoni nëpër gjithë botën dhe predikojini lajmin e mirë çdo krijese.
¹⁶ Ai që beson dhe pagëzohet, do të shpëtohet, por ai që nuk beson, do të ndëshkohet.
¹⁷ Këto shenja do t’i shoqërojnë ata që besojnë: Në emrin Tim do të dëbojnë demonë; do të flasin në gjuhë të reja,
¹⁸ do të marrin gjarpërinj [në duart e tyre], dhe, po të pinë ndonjë gjë vdekjeprurëse, nuk do t’u bëjë keq, do të vënë duart mbi të sëmurët dhe këta do të shërohen."
¹⁹ Zoti Jezus, pra, pasi foli me ta, u mor lart në qiell dhe u ul në të djathtën e Perëndisë.
²⁰ Ata dolën dhe predikuan gjithkund, ndërsa Zoti i ndihmonte, duke vërtetuar fjalën nëpërmjet shenjave që i vinin pas. Amen.