15
¹ Me t’u gdhirë, kryepriftërinjë me pleqtë, skribët si edhe tërë këshilli morën menjëherë vendim; pasi e lidhën Jezusin, e morën dhe ia dorëzuan Pilatit.
² Pilati e pyeti: "Ti je Mbreti i judenjve?" Ai u pëgjigj dhe i tha: "Ti po e thua."
³ Kryepriftërinjtë e padisnin për shumë gjëra.
⁴ Pilati e pyeti përsëri dhe i tha: "Nuk paske ndër mend të përgjigjesh fare? Shiko për sa shumë gjëra po të padisin."
⁵ Por Jezusi përsëri nuk i dha asnjë përgjigje, aq sa Pilati po çuditej.
⁶ Tani në kohë feste, ai u lironte atyre një të burgosur, atë që kërkonin njerëzit.
⁷ Aty ishte edhe njëri që quhej Baraba, i burgosur bashkë me kryengritësit, të cilët kishin bërë vrasje gjatë trazirave.
⁸ Turma erdhi dhe filloi t’i kërkonte Pilatit që të vepronte si zakonisht me ta.
⁹ Atëherë Pilati iu përgjigj, duke thënë: "A doni t’ju liroj Mbretin e judenjve?"
¹⁰ Sepse ai e dinte që kryepriftërinjtë ia kishin dorëzuar Atë nga smira.
¹¹ Por kryepriftërinjtë e ndërsyen turmën që ta detyronte Pilatin t’u lironte më mirë Barabanë.
¹² Pilati u përgjigj përsëri dhe u tha: "Atëherë çfarë doni t’i bëj Atij që ju e quani Mbreti i judenjve?"
¹³ Ata bërtitën përsëri: "Kryqëzoje!"
¹⁴ Pilati u thoshte: "Përse, ç’të keqe ka bërë?" Por ata bërtisnin edhe më shumë: "Kryqëzoje!"
¹⁵ Pilati, duke dashur t’i bëjë qejfin turmës, ua liroi Barabanë dhe, pasi e fshikulloi Jezusin, e dorëzoi për ta kryqëzuar.
¹⁶ Ushtarët e çuan në pallat, domethënë në godinën e guvernatorit, dhe mblodhën tërë trupën e ushtarëve.
¹⁷ E veshën me një rrobë të purpurt dhe, pasi thurën një kurorë me gjemba, ia vunë Atij mbi kokë
¹⁸ dhe filluan ta përshëndesin: "Të falemi, o Mbret i judenjve!"
¹⁹ E godisnin në kokë me kallam, e pështynin dhe filluan t’i përulen e të binin në gjunjë para Tij.
²⁰ Pasi e përqeshën, i hoqën rrobën e purpurt dhe i veshën rrobën e Tij. Pastaj e nxorën për ta kryqëzuar.
²¹ Aty pranë po kalonte njëfarë Simoni nga Kirenea, i ati i Aleksandrit dhe i Rufit, që po kthehej nga ara. Ata e detyruan Simonin të mbante kryqin e Tij.
²² E çuan në një vend të quajtur Golgotë, që i përkthyer, do të thotë ‘Vendi i Kafkës’.
²³ I dhanë verë të përzier me mirrë, por Ai nuk e mori.
²⁴ E kryqëzuan dhe rrobat e Tij i ndanë, duke i hedhur në short, për të parë se ç’do të merrte secili.
²⁵ Ishte ora e tretë kur e kryqëzuan.
²⁶ Akuza e Tij ishte shënuar me mbishkrimin përsipër kryqit, MBRETI I JUDENJVE.
²⁷ Bashkë me Të kryqëzuan edhe dy vjedhës, njërin nga e djathta dhe tjetrin nga e majta e Tij.
²⁹ Ata që kalonin pranë, e shanin duke tundur kokat e duke thënë: "Hej, Ti që shkatërron tempullin dhe e ndërton në tri ditë,
³⁰ shpëto veten dhe zbrit nga kryqi."
³¹ Po ashtu edhe kryepriftërinjtë, duke e përqeshur midis tyre, thoshin bashkë me skribët: "Ka shpëtuar të tjerët; veten e Vet nuk mund ta shpëtojë dot.
³² Le të zbresë tani nga kryqi Krishti, Mbreti i Izraelit, që të shohim e të besojmë." Edhe ata që ishin kryqëzuar me të, e shanin.
³³ Kur erdhi ora e gjashtë, mbi tërë tokën u bë errësirë deri në orën e nëntë.
³⁴ Dhe në orën e nëntë, Jezusi thirri me zë të lartë: "Eloi, Eloi, lama sabaktani?", që po të përkthehet, do të thotë: ‘Perëndia Im, Perëndia Im, përse më braktise?’
³⁵ Disa prej atyre që rrinin aty pranë, kur e dëgjuan, thanë: "Ja, po thërret Elian."
³⁶ Dikush vrapoi e mbushi një sfungjer me uthull, e vuri në një kallam dhe ia dha Atij ta pinte, duke thënë: "Lëreni; të shohim a do të vijë Elia ta zbresë poshtë."
³⁷ Jezusi, pasi nxori një zë të fortë, dha shpirt.
³⁸ Perdja e tempullit u ça më dysh nga lart deri poshtë.
³⁹ Kryeqindësi, që po rrinte mu përpara Tij, kur pa se si dha shpirt, tha: "Vërtet, ky njeri ishte Biri i Perëndisë."
⁴⁰ Aty ishin edhe disa gra që po vështronin nga larg, midis të cilave ishte edhe Maria Magdalena dhe Maria, e ëma e Jakobit, të voglit dhe e Jozeut, si edhe Saloma,
⁴¹ të cilat, kur Ai ishte në Galile, i kishin vajtur pas dhe i kishin shërbyer; kishte edhe shumë të tjera që ishin ngjitur në Jeruzalem bashkë me Të.
⁴² Dhe tani në të ngrysur, meqë ishte dita e Përgatitjes, domethënë, dita para së shtunës,
⁴³ erdhi Jozefi nga Arimateja, këshilltar i nderuar, i cili edhe ai priste mbretërinë e Perëndisë; mori guximin të hynte te Pilati dhe i kërkoi trupin e Jezusit.
⁴⁴ Pilati u çudit kur dëgjoi që Ai tashmë kishte vdekur. Thirri kryeqindësin dhe e pyeti nëse kishte vdekur.
⁴⁵ Pasi e mori vesh këtë prej kryeqindësit, ia dha trupin Jozefit.
⁴⁶ Jozefi bleu një pëlhurë të linjtë, e zbriti Atë poshtë dhe e mbështolli me atë pëlhurë. Pastaj e vuri në një varr, që kishte qenë hapur në një shkëmb, dhe rrokullisi një gur në hyrje të varrit.
⁴⁷ Maria Magdalena dhe Maria e Jozeut panë se ku e vunë.