13
¹ Kur Jezusi po dilte nga tempulli, një nga dishepujt i tha: "Mjeshtër, shih sa gurë të mëdhenj e ç’ndërtesa të mëdha."
² Jezusi i tha: "A i sheh këto ndërtesa të mëdha? Nuk do të mbetet këtu gur mbi gur pa u shembur."
³ Me t’u ulur në Malin e Ullinjve kundrejt tempullit, Atë e pyetën veçan Pjetri, Jakobi, Gjoni e Andrea.
⁴ "Na thuaj, kur do të ndodhin këto gjëra? Cila do të jetë shenja që do të përmbushen të gjitha këto?"
⁵ Jezusi filloi t’u thoshte: "Shikoni se mos ju mashtron kush.
⁶ Sepse shumë do të vijnë në emrin Tim duke thënë: ‘Unë jam Ai’ e do të mashtrojnë shumë veta.
⁷ Kur të dëgjoni luftëra e jehona luftërash, mos u frikësoni; ato duhet të ndodhin, por ky nuk është ende fundi.
⁸ Sepse do të ngrihet kombi kundër kombit dhe mbretëria kundër mbretërisë; në vende të ndryshme do të bien tërmete, do të vijnë periudha zie buke; këto janë fillimi i dhimbjeve.
⁹ Por kini kujdes për veten tuaj; do t’ju dorëzojnë në kuvende e do t’ju rrahin në sinagoga; për shkakun Tim do të dilni para krerëve dhe mbretërve, si dëshmi për ta.
¹⁰ Ungjilli duhet të predikohet më parë nëpër gjithë kombet.
¹¹ Kur t’ju arrestojnë e t’ju çojnë në gjyq, mos u shqetësoni që më parë se çfarë do të flisni; por çfarëdo që t’ju jepet në atë orë, atë flisni, sepse nuk jeni ju që flisni, por Fryma e Shenjtë.
¹² Vëllai vëllanë do ta çojë në vdekje, dhe ati të birin; fëmijët do të ngrihen kundër prindërve e do t’i vrasin.
¹³ Do të jeni të urryer nga të gjithë për hir të emrit Tim, por ai që qëndron deri në fund, ai do të shpëtohet.
¹⁴ Por kur të shihni neverinë e shkretimit, duke qëndruar aty ku nuk i takon (le ta kuptojë ai që di të lexojë), atëherë ata që janë në Jude, le të marrin arratinë ndër male.
¹⁵ Kush është mbi pullaz, të mos zbresë, as të mos hyjë për të marrë ndonjë gjë prej shtëpisë së vet.
¹⁶ Kush është në arë, të mos kthehet prapa për të marrë rrobën e vet.
¹⁷ Por mjerë ato që janë shtatzëna dhe ato që japin gji në ato ditë!
¹⁸ Lutuni që kjo të mos ndodhë në kohë dimri,
¹⁹ sepse ato do të jenë ditë të një mundimi të atillë, që nuk ka ndodhur prej fillimit të krijimit, kur Perëndia krijoi botën deri tani, dhe as ka për të ndodhur kurrë.
²⁰ Po të mos i shkurtonte Zoti ato ditë, askush nuk do të shpëtohej, por për hir të të zgjedhurve, që Ai i ka zgjedhur, i ka shkurtuar ato ditë.
²¹ Pastaj, nëse dikush ju thotë: ‘Ja ky këtu është Krishti’, ose ‘Ja, ai atje’, mos e besoni,
²² sepse do të dalin Krishta të rremë e profetë të rremë e do të bëjnë shenja e mrekulli për të mashtruar, po të jetë e mundur, edhe të zgjedhurit.
²³ Ruhuni; të gjitha jua kam thënë që më parë.
²⁴ Por në ato ditë, pas asaj brenge, dielli do të errësohet dhe hëna nuk do të japë dritën e vet.
²⁵ Do të bien yjet prej qiellit dhe fuqitë që janë në qiej, do të pështjellohen.
²⁶ Atëherë njerëzit do të shohin Birin e Njeriut duke ardhur mbi re me shumë fuqi e lavdi.
²⁷ Dhe Ai do të dërgojë engjëjt e do të mbledhë të zgjedhurit [e Vet] nga të katër anët, nga skaji i dheut deri në skajet e qiellit.
²⁸ Dhe tani mësojeni këtë shëmbëlltyrë nga fiku; kur dega e tij është tashmë e njomë dhe çel gjethe, ta dini që vera është pranë.
²⁹ Po kështu edhe ju, kur të shihni që këto gjëra po ndodhin, dijeni që Ai është pranë, mu te dera.
³⁰ Me të vërtetë po ju them, ky brez nuk do të kalojë derisa të ndodhin të gjitha këto gjëra.
³¹ Qielli dhe toka do të kalojnë, por fjalët e Mia nuk do të shkojnë.
³² Askush nuk di gjë për atë ditë apo atë orë, madje as engjëjt në qiell, as Biri, veçse Ati.
³³ Kini kujdes, mbajini sytë hapur, sepse nuk e dini kur do të vijë koha.
³⁴ Ashtu si njeriu që mori një udhë të largët, la shtëpinë e vet, ua la shtëpinë në ngarkim shërbëtorëve, secilit i caktoi punën e tij dhe e porositi derëtarin t’i mbante sytë hapur.
³⁵ Prandaj të keni kujdes, sepse nuk e dini kur do të kthehet i zoti i shtëpisë, në mbrëmje, në mesnatë, në të gdhirë apo në mëngjes.
³⁶ Se mos vjen papritur e ju gjen duke fjetur.
³⁷ Dhe atë që po ju them juve, ua them të gjithëve: Mbani sytë hapur!"