kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Marku

1
¹ Fillimi i ungjillit të Jezus Krishtit, Birit të Perëndisë.
² Siç është shkruar te profeti Isaia: "Ja, po dërgoj lajmëtarin Tim para Teje, që do të përgatisë udhën Tënde."
³ Zëri i atij që thërret në shkretëtirë: "Përgatisni udhën e Zotit, të drejta bëjini shtigjet e Tij."
⁴ Gjon Pagëzori erdhi në shkretëtirë duke predikuar pagëzimin e pendesës për faljen e mëkateve.
⁵ Gjithë treva e Judesë dhe jeruzalemasit dolën dhe shkuan tek ai; të gjithë, duke rrëfyer mëkatet e veta, pagëzoheshin prej tij në lumin Jordan.
⁶ Gjoni ishte veshur me lesh deveje dhe kishte një rrip lëkure rreth mesit; hante karkaleca dhe mjaltë bletësh të egra.
⁷ Predikonte duke thënë: "Një më i fuqishëm se unë po vjen pas meje, të cilit unë nuk jam i denjë të ulem e t’i zgjidh gjalmat e sandaleve.
⁸ Unë ju kam pagëzuar me ujë, por Ai do t’ju pagëzojë me Frymën e Shenjtë."
⁹ Dhe ndodhi që në ato ditë erdhi Jezusi nga Nazareti i Galilesë dhe u pagëzua prej Gjonit në lumin Jordan.
¹⁰ Dhe menjëherë, me të dalë nga uji, Ai pa qiejt të hapen dhe Frymën duke zbritur mbi Të si një pëllumb.
¹¹ Një zë erdhi nga qiejt: "Ti je Biri Im i dashur, te Ti kam gjetur kënaqësi."
¹² Menjëherë Fryma e nxori në shkretëtirë.
¹³ Ai qëndroi në shkretëtirë dyzet ditë, duke u tunduar nga Satani. Atje Ai ishte bashkë me bishat e egra, dhe engjëjt i shërbenin.
¹⁴ Pasi e burgosën Gjonin, Jezusi erdhi në Galile dhe predikonte lajmin e mirë të Perëndisë.
¹⁵ "Koha u plotësua", thoshte Ai. "Mbretëria e Perëndisë po afron. Pendohuni dhe besoni në lajmin e mirë".
¹⁶ Duke kaluar pranë detit të Galilesë, Ai pa Simonin dhe Andrenë, vëllanë e Simonit, që po hidhnin rrjetën në det, sepse ata ishin peshkatarë.
¹⁷ Jezusi u tha: "Ejani pas Meje, e do t’ju bëj peshkatarë njerëzish".
¹⁸ Ata lanë menjëherë rrjetat dhe i shkuan pas.
¹⁹ Duke shkuar pak më tutje, Ai pa Jakobin, të birin e Zebedeut, dhe Gjonin, vëllanë e tij, të cilët po ndreqnin rrjetat në lundër.
²⁰ I thirri menjëherë dhe ata lanë në lundër atin e tyre Zebedeun me mëditësit dhe i shkuan pas.
²¹ Hynë në Kapernaum; pa u vonuar, të shtunën Ai hyri në sinagogë e filloi të mësonte njerëzit.
²² Ata mrekulloheshin me mësimin e Tij, sepse i mësonte ata si ai që ka autoritet dhe jo si skribët.
²³ Po në atë kohë, në sinagogën e tyre ishte një njeri me frymë të papastër, i cili bërtiti,
²⁴ dhe tha: "Ç’punë ke Ti me ne, o Jezus i Nazaretit? Ke ardhur të na shkatërrosh? Të njoh se kush je, i Shenjti i Perëndisë."
²⁵ Jezusi e qortoi, duke thënë: "Hesht e dil prej tij!"
²⁶ Fryma e papastër, pasi e shkundi fort, lëshoi një britmë të madhe dhe doli prej tij.
²⁷ Të gjithë u mahnitën aq shumë, sa filluan të pyesnin njëri-tjetrin, duke thënë: "Ç’të jetë kjo vallë? Një lloj i ri mësimi me autoritet! Ai u jep urdhër edhe frymëve të papastra e ato i binden."
²⁸ Lajmi për Të u përhap menjëherë kudo në mbarë krahinën e Galilesë.
²⁹ Sapo dolën nga sinagoga, hynë bashkë me Jakobin dhe Gjonin në shtëpinë e Simonit e të Andreas.
³⁰ E vjehrra e Simonit dergjej me ethe, dhe ata i folën Jezusit menjëherë për të.
³¹ Ai iu afrua dhe e ngriti duke e marrë për dore; ethet e lanë dhe ajo filloi t’u shërbente.
³² Në të ngrysur, kur perëndoi dielli, i sollën Jezusit të gjithë ata që ishin të sëmurë, si edhe ata që ishin të pushtuar nga demonët.
³³ I tërë qyteti ishte mbledhur te dera.
³⁴ Ai shëroi shumë veta që vuanin nga sëmundje të ndryshme, dëboi shumë demonë dhe nuk i linte të flisnin, sepse ata e dinin kush ishte Ai.
³⁵ Herët në mëngjes, pa dalë drita e diellit, Jezusi u ngrit, doli nga shtëpia dhe u largua në një vend të shkretë, ku po lutej.
³⁶ Simoni, si dhe ata që ishin me të, shkuan ta kërkojnë.
³⁷ Kur e gjetën, i thanë: "Të gjithë po të kërkojnë".
³⁸ Ai u tha: "Shkojmë gjetkë në fshatrat fqinje, që të predikoj edhe atje, sepse për këtë kam dalë".
³⁹ Përshkoi gjithë Galilenë, duke predikuar në sinagogat e tyre dhe duke dëbuar demonët.
⁴⁰ Tek Ai shkoi një i gërbulur, që iu lut [duke i rënë në gjunjë] dhe i tha: "Po të duash, Ti mund të më pastrosh."
⁴¹ Duke ndier dhembshuri, Ai zgjati dorën, e preku dhe i tha: "Po, dua, qofsh i pastruar!"
⁴² Dhe menjëherë gërbula iu largua, dhe ai u pastrua.
⁴³ Si e paralajmëroi rreptas, e nxori menjëherë jashtë,
⁴⁴ duke i thënë: "Shiko, mos i thuaj gjë askujt; por shko e tregoja priftit dhe, si dëshmi për ata, sill për pastrimin tënd ato që ka porositur Moisiu."
⁴⁵ Por ai, me të dalë, filloi të fliste gjithandej, duke e përhapur kaq shumë lajmin, saqë Jezusi nuk mund të hynte më hapur në qytet, por rrinte jashtë në vende të shkreta; megjithatë tek Ai vinin njerëz nga të katër anët.