3
¹ Në të pesëmbëdhjetin vit të sundimit të Tiber Cezarit, kur Ponc Pilati ishte guvernator i Judesë, Herodi ishte tetrark i Galilesë, vëllai i tij Filipi ishte tetrark i Ituresë dhe i krahinës së Trakonitidës dhe Lisania tetrark i Abilenës,
² në ditët kur ishin kryepriftërinj Ana dhe Kaifa, fjala e Perëndisë i shkoi në shkretëtirë Gjonit, birit të Zakarisë.
³ Ai përshkoi gjithë zonën rreth Jordanit, duke predikuar pagëzimin e pendesës për faljen e mëkateve,
⁴ siç është shkruar në librin e thënieve të profetit Isaia: "Zëri i atij që thërret në shkretëtirë: ‘Përgatisni udhën e Zotit, të drejta bëjini shtigjet e Tij.
⁵ Çdo rrëpirë do të mbushet, e çdo mal e kodër do të sheshohet; udhët e shtrembra do të drejtohen dhe udhët me gropa do të bëhen të rrafshëta.
⁶ Çdo njeri do të shohë shpëtimin e Perëndisë’."
⁷ Prandaj u thoshte turmave që kishin dalë për t’u pagëzuar prej tij: "O pjella nepërkash, kush ju mësoi t’i ikni zemërimit që po vjen?
⁸ Tregojeni pra, me vepra, që jeni penduar, dhe mos filloni të thoni me veten tuaj: ‘Kemi atin tonë Abrahamin’; sepse po ju them që edhe prej këtyre gurëve Perëndia mund t’i nxjerrë fëmijë Abrahamit.
⁹ Sëpata është tashmë te rrënja e pemëve; çdo pemë që nuk bën fryt të mirë, do të pritet dhe do të flaket në zjarr."
¹⁰ Turmat e pyesnin e thoshin: "Ç’të bëjmë ne atëherë?"
¹¹ Ai, duke u përgjigjur, u thoshte: "Ai që ka dy tunika, t’ia japë njerën atij që nuk ka; dhe ai që ka për të ngrënë, të bëjë po ashtu."
¹² Edhe tagrambledhësit shkuan për t’u pagëzuar, dhe i thanë atij: "Mjeshtër, ç’të bëjmë?"
¹³ Ai u tha: "Asgjë më shumë mos kërkoni, veç atyre për të cilat ju kanë udhëzuar."
¹⁴ Edhe ushtarët e pyesnin, duke thënë: "Po ne, çfarë të bëjmë?" Ai u tha: "Asnjeri mos zhvatni, për askënd mos shpifni; kënaquni me pagat tuaja."
¹⁵ Ndërsa populli ishte në pritje me shpresë dhe të gjithë po mendonin në zemrat e veta për Gjonin, nëse ishte apo nuk ishte Krishti,
¹⁶ Gjoni u përgjigj duke u thënë të gjithëve: "Unë me të vërtetë po ju pagëzoj me ujë; por Një më i fuqishëm se unë po vjen, të cilit unë nuk jam i denjë as t’i zgjidh gjalmat e sandaleve; Ai do t’ju pagëzojë me Frymën e Shenjtë dhe me zjarr.
¹⁷ Në dorën e Tij është terplotja për të qëruar lëmin e Tij, dhe në grunar të Tij do ta mbledhë grurin; por kashtën do ta djegë me zjarrin që nuk shuhet."
¹⁸ Kështu, ai predikonte ungjillin në popull, duke u dhënë zemër njerëzve me këto dhe me shumë mënyra të tjera.
¹⁹ Por kur Gjoni e qortoi tetrarkun Herod për Herodiadën, gruan e vëllait të tij, dhe për të gjitha të këqijat që ai kishte bërë,
²⁰ atëherë Herodi shtoi edhe këtë mbi të gjitha të tjerat: e mbylli Gjonin në burg.
²¹ Dhe ndodhi që, kur po pagëzohej i gjithë populli, u pagëzua edhe Jezusi, dhe, kur Ai po lutej, qielli u hap.
²² Fryma e Shenjtë i trupëzuar si një pëllumb zbriti mbi Të, dhe një zë erdhi prej qielli: "Ti je Biri Im i dashur, te Ti kam gjetur kënaqësi."
²³ Vetë Jezusi, kur nisi veprën e Vet, ishte rreth tridhjetë vjeç. Ai ishte, siç mendohej, i biri i Jozefit, bir i Elit,
²⁴ bir i Matatit, bir i Levit, bir i Melkit, bir i Janait, bir i Jozefit,
²⁵ bir i Matatisë, bir i Amosit, bir i Naumit, bir i Eslit, bir i Nagait,
²⁶ bir i Maatit, bir i Matatisë, bir i Semenit, bir i Jozekut, bir i Jodës
²⁷ bir i Joananit, bir i Resait, bir i Zorobabelit, bir i Salatielit, bir i Nerit,
²⁸ bir i Melkit, bir i Adit, bir i Kosamit, bir i Elmadamit, bir i Erit,
²⁹ bir i Joseut, bir i Eliezerit, bir i Jorimit, bir i Matatit, bir i Levit,
³⁰ bir i Simeonit, bir i Judës, bir i Jozefit, bir i Jonamit, bir i Eliakimit,
³¹ bir i Meleas, bir i Menas, bir i Matatait, bir i Natanit, bir i Davidit,
³² bir i Jeseut, bir i Obedit, bir i Boozit, bir i Salait, bir i Naasonit,
³³ bir i Amenadabit, bir i Adminit, bir i Arniut, bir i Esromit, bir i Perezit, bir i Judës,
³⁴ bir i Jakobit, bir i Isakut, bir i Abrahamit, bir i Tarës, bir i Nakorit,
³⁵ bir i Serugut, bir i Ragaut, bir i Pelegut, bir i Heberit, bir i Salait,
³⁶ bir i Kainamit, bir i Arfaksadit, bir i Semit, bir i Noes, bir i Lamekut,
³⁷ bir i Matuzalait, bir i Enokut, bir i Jaretit, bir i Maleleelit, bir i Kainamit,
³⁸ bir i Enosit, bir i Setit, bir i Adamit, bir i Perëndisë.