22
¹ Po afrohej festa e Bukës së Ndorme, që quhej Pashkë.
² Kryepriftërinjtë dhe skribët po kërkonin mënyrën se si ta zhduknin Jezusin; sepse i druheshin popullit.
³ Pastaj Satani hyri te Juda i quajtur Iskariot, që ishte një nga të dymbëdhjetët.
⁴ Ai shkoi e bisedoi me kryepriftërinjtë dhe kryerojat, se si t’ua dorëzonte Jezusin atyre.
⁵ Ata u gëzuan dhe u morën vesh që t’i jepnin para.
⁶ Ai pranoi dhe kërkonte rastin për t’ua dorëzuar Jezusin, kur të ishte larg turmës.
⁷ Pastaj erdhi dita e Bukëve të Ndorme, në të cilën duhej flijuar qengji i Pashkëve.
⁸ Ai dërgoi Pjetrin dhe Gjonin, duke thënë: "Shkoni e na bëni gati Pashkët, që të hamë."
⁹ Ata e pyetën: "Ku dëshiron ta përgatisim?"
¹⁰ Ai u tha: "Ja, kur të hyni në qytet, do t’ju takojë një njeri, që mban një shtambë uji; i shkoni pas deri te shtëpia ku do të hyjë.
¹¹ Do t’i thoni të zotit të shtëpisë: ‘Mjeshtri të çon fjalë: "Ku është dhoma e miqve që të ha Pashkët bashkë me dishepujt e Mi?"’
¹² Ai do t’ju tregojë një dhomë sipër, të madhe e të shtruar; atje përgatiteni."
¹³ Ata shkuan dhe u doli siç u kishte thënë Ai; atje përgatitën Pashkët.
¹⁴ Kur erdhi ora, Ai u ul, e bashkë me Të edhe apostujt.
¹⁵ Jezusi u tha: "Kam dashur shumë të ha këtë Pashkë me ju, përpara se të fillojnë vuajtjet e Mia.
¹⁶ Sepse, po ju them, që nuk do ta ha më, derisa të përmbushet në mbretërinë e Perëndisë."
¹⁷ Pasi mori një kupë dhe falënderoi, tha: "Merreni këtë dhe ndajeni midis jush,
¹⁸ sepse po ju them, [se] që sot e tutje nuk do të pi më prej frytit të hardhisë, derisa të vijë mbretëria e Perëndisë."
¹⁹ Dhe pasi mori një bukë, falënderoi dhe e ndau. Pastaj ua dha atyre, duke thënë: "Ky është trupi im, që është dhënë për ju; bëjeni këtë për përkujtimin Tim."
²⁰ Po ashtu, pas darkës mori edhe kupën dhe tha: "Kjo kupë është besëlidhja e re në gjakun tim, që po derdhet për ju.
²¹ Por ja, dora e atij që më tradhton, është me Mua në tryezë.
²² Sepse, vërtet Biri i Njeriut, siç është përcaktuar, po shkon, por mjerë ai njeri, i cili po e tradhtohet Atë!"
²³ Ata filluan të pyesin njëri-tjetrin, se cili prej tyre mund të ishte ai që do ta bënte këtë gjë.
²⁴ E midis tyre pati edhe një debat, se cili prej tyre do të quhej më i madhi.
²⁵ Ai u tha: "Mbretërit e kombeve i sundojnë dhe ata që kanë pushtet mbi ta, quhen bamirës.
²⁶ Ndërsa ju nuk do të jeni kështu; por ai që është më i madhi midis jush, le të jetë si më i riu, dhe ai që udhëheq, si ai që shërben.
²⁷ Sepse kush është më i madh, ai që është shtruar në tryezë, apo ai që shërben? A nuk është ai që është shtruar në tryezë? Kurse Unë jam mes jush si ai që shërben.
²⁸ Por ju jeni ata që qëndruat me Mua në sprovat e Mia.
²⁹ Dhe Unë po ju jap mbretërinë, siç ma ka dhënë Mua Ati Im,
³⁰ që të hani e të pini në tryezën Time në mbretërinë Time dhe të uleni mbi frone, duke gjykuar të dymbëdhjetë fiset e Izraelit.
³¹ Simon, Simon, ja, Satani kërkon t’ju kalojë në shoshë si grurin.
³² Por Unë jam lutur për ty, që besimi yt të mos venitet dhe ti, kur të kthehesh, jepu forcë vëllezërve të tu."
³³ Pjetri i tha: "Zot, jam gati të shkoj me ty, si në burg ashtu edhe në vdekje."
³⁴ Dhe Ai tha: "Pjetër, po të them, këndesi nuk ka për të kënduar sot, derisa ti të kesh mohuar tri herë që më njeh."
³⁵ Jezusi u tha: "Kur ju dërgova pa kuleta, pa torba e pa sandale, a ju mungoi gjë?" Ata thanë: "Asgjë."
³⁶ Pastaj u tha: "Por tani, ai që ka kuletë, ta marrë me vete, si edhe torbën; ai që nuk ka shpatë, të shesë rrobën e vet e ta blejë.
³⁷ Sepse, po ju them, që kjo që është e shkruar, duhet të përmbushet tek Unë: ‘Dhe me shkelësit e ligjit u radhit’; sepse, vërtet, çdo gjëje që është shkruar për Mua, po i vjen koha të përmbushet."
³⁸ Ata thanë: "Zot, ja, këtu janë dy shpata." Ai u tha: "Mjaft."
³⁹ Dhe doli e shkoi, siç e kishte zakon, në Malin e Ullinjve; edhe dishepujt i shkuan pas.
⁴⁰ Kur arriti në vend, Jezusi u tha: "Lutuni që të mos bini në tundim."
⁴¹ Dhe u largua prej tyre sa një e hedhur guri; pastaj ra në gjunjë e po lutej,
⁴² duke thënë: "O Atë, po të duash, largoje këtë kupë prej Meje; megjithatë jo vullneti Im, por Yti u bëftë."
⁴³ Atij iu shfaq një engjëll prej qiellit për t’i dhënë forcë.
⁴⁴ Në ankth e sipër, Ai po lutej më me forcë; djersa iu bë si pika gjaku që binin përdhe.
⁴⁵ Pasi u ngrit prej lutjes, vajti te dishepujt dhe i gjeti duke fjetur, të këputur nga hidhërimi.
⁴⁶ Dhe u tha: "Përse po flini? Çohuni e lutuni, që të mos bini në tundim."
⁴⁷ Ndërsa ishte ende duke folur, ja ku u erdhi një turmë; u printe ai që quhej Juda, njëri prej të dymbëdhjetëve; ai iu afrua Jezusit për ta puthur.
⁴⁸ Por Jezusi i tha: "Judë, me një puthje po e tradhton Birin e Njeriut?"
⁴⁹ Ata që ishin rreth Tij, kur panë se çfarë do të ndodhte, thanë: "Zot, a t’u biem me shpatë?"
⁵⁰ Njëri prej tyre i ra shërbëtorit të kryepriftit dhe i këputi veshin e djathtë.
⁵¹ Jezusi, duke u përgjigjur, tha: "Lëreni, mjaft me kaq." I preku veshin dhe e shëroi.
⁵² Pastaj Jezusi u tha atyre që ishin të pranishëm, kryepriftërinjve, kryerojave të tempullit dhe pleqve: "Paskeni dalë me shpata e me shkopinj, si kundër një kusari?
⁵³ Kur isha çdo ditë me ju në tempull, ju nuk vutë dorë mbi Mua; por kjo është ora juaj, ku sundon errësira."
⁵⁴ Pasi e kapën, e çuan dhe e futën brenda në shtëpinë e kryepriftit. Pjetri po e ndiqte nga larg.
⁵⁵ Kishin ndezur një zjarr në mes të oborrit dhe ishin ulur së bashku; edhe Pjetri u ul në mes tyre.
⁵⁶ Një shërbyese, kur e pa që u ul pranë dritës së zjarrit, ia nguli sytë dhe tha: "Edhe ky ishte me Të."
⁵⁷ Por ai mohoi, duke thënë: "Moj grua, unë nuk e njoh Atë."
⁵⁸ Dhe pas pak, një tjetër, me ta parë, tha: "Edhe ti je një prej tyre." Pjetri tha: "Jo, o njeri, nuk jam."
⁵⁹ Pasi kishte kaluar rreth një orë, një tjetër nguli këmbë, duke thënë: "Me të vërtetë, edhe ky bashkë me Të ishte, sepse është galileas."
⁶⁰ Por Pjetri tha: "O njeri, nuk e di ç’po thua." Dhe menjëherë, ndërsa ai po fliste, këndoi këndesi.
⁶¹ Zoti u kthye dhe shikoi Pjetrin. Pjetrit iu kujtua fjala e Zotit, se si i kishte thënë: ‘Përpara se të këndojë këndesi sot, ti do të më mohosh tri herë’.
⁶² Pjetri, doli jashtë e qau me hidhërim.
⁶³ Dhe burrat që e kishin kapur Jezusin, po e përqeshnin dhe po e rrihnin.
⁶⁴ Pasi i mbuluan sytë, e pyesnin, duke thënë: "Gjeje me profeci, kush është ai që të goditi?"
⁶⁵ E shanin dhe thoshin shumë gjëra të tjera për Të.
⁶⁶ Dhe kur u bë ditë, u mblodhën pleqësia e popullit, kryepriftërinjtë e skribët dhe e çuan Jezusin në këshillin e tyre të lartë,
⁶⁷ dhe i thanë: "Nëse je Krishti, na thuaj." Dhe Ai u tha: "Po t’jua them, nuk do të besoni.
⁶⁸ Dhe po t’ju pyes, nuk do të përgjigjeni.
⁶⁹ Që tani e tutje, Biri i Njeriut do të ulet në të djathtë të fuqisë së Perëndisë."
⁷⁰ Pastaj të gjithë thirrën: "Ti, pra, je Biri i Perëndisë, apo jo?" Ai u tha: "Ju po e thoni që Unë jam."
⁷¹ Ata thanë: "Përse na u dashkan ende dëshmi? Sepse ne vetë e dëgjuam prej gojës së Tij."