21
¹ Duke ngritur sytë, Jezusi pa pasanikët që po hidhnin dhuratat e tyre në arkën e thesarit.
² Pa edhe një vejushë të këputur që hodhi aty dy grosh.
³ Dhe tha: "Vërtet po ju them, që kjo vejushë e varfër ka hedhur më shumë se të gjithë.
⁴ Sepse të gjithë këta hodhën në arkën e dhuratave nga tepria e tyre, ndërsa ajo nga varfëria e saj hodhi gjithë ç’kishte për të jetuar."
⁵ Disa po flisnin për tempullin, që ishte stolisur me gurë të bukur e me dhurata kushtuar Perëndisë. Por Ai tha,
⁶ "Sa për këto që po shihni, do të vijnë ditët kur nuk do të mbetet gur mbi gur pa u përmbysur."
⁷ Ata e pyetën, duke thënë: "Mjeshtër, kur pra, do të ndodhin këto? Cila do të jetë shenja që këto gjëra do të ndodhin?"
⁸ Ai tha: "Shikoni se mos mashtroheni; sepse shumë do të vijnë në emrin Tim, duke thënë: ‘Unë jam Krishti’ dhe ‘Koha po afron’. Mos shkoni pas tyre.
⁹ Por kur të dëgjoni për luftëra e për trazira, mos u tmerroni; sepse këto duhet të ndodhin më parë, por fundi nuk do të vijë menjëherë."
¹⁰ Pastaj u thoshte: "Do të ngrihet kombi kundër kombit dhe mbretëria kundër mbretërisë.
¹¹ Do të bien tërmete të mëdha në vende të ndryshme, murtaja e zi buke; tmerre e shenja të mëdha do të vijnë nga qielli.
¹² Por përpara të gjitha këtyre, do të vënë dorë mbi ju e do t’ju përndjekin, duke ju dorëzuar nëpër sinagoga e burgje, duke ju sjellë para mbretërve e guvernatorëve për shkak të emrit Tim.
¹³ Kjo do t’ju japë rast që t’u dëshmoni.
¹⁴ Nguleni në mend mirë dhe mos u shqetësoni se çfarë do të thoni për t’u mbrojtur,
¹⁵ sepse Unë do t’ju jap gojë e mençuri, para të cilave të gjithë kundërshtarët tuaj nuk do të mund të qëndrojnë ose t’ju kundërshtojnë.
¹⁶ Do të tradhtoheni edhe prej prindërve, vëllezërve, të afërmve dhe miqve; disa prej jush do t’i vrasin.
¹⁷ Do të urreheni prej të gjithëve për shkak të emrit Tim.
¹⁸ Por as një fije floku nuk do të bjerë prej kokës suaj.
¹⁹ Me durimin tuaj do të fitoni shpirtrat tuaj.
²⁰ Dhe kur të shihni Jeruzalemin të rrethuar prej ushtrish, atëherë merreni vesh që shkretimi i tij është afër.
²¹ Pastaj, le të ikin ndër male ata që janë në Jude, le të dalin ata brenda qytetit, dhe ata që janë në fusha të mos hyjnë në qytet.
²² Sepse këto janë ditët e hakmarrjes, që të përmbushen të gjitha ato që janë shkruar.
²³ Por mjerë ato që janë me fëmijë në bark dhe ato që kanë fëmijë në gji në ato ditë, sepse brengë të madhe do të ketë mbi këtë tokë dhe zemërim mbi këtë popull.
²⁴ Do të bien nga tehu i shpatës dhe do të çohen robër nëpër të gjitha kombet; Jeruzalemi do të shkelet prej kombeve, derisa të përmbushet koha e kombeve.
²⁵ Do të ketë shenja në diell, në hënë e në yje; mbi tokë kombet do të jenë në ankth e të shastisur nga uturima e detit dhe e dallgëve;
²⁶ njerëzit do të meken nga frika dhe nga pritja e atyre që do të ndodhin mbi tokë, sepse fuqitë e qiejve do të shkunden.
²⁷ E pastaj do të shohin Birin e Njeriut duke ardhur në një re, me fuqi dhe lavdi të madhe.
²⁸ Kur të fillojnë të ndodhin këto, çohuni e ngrini kokat, sepse shpengimi juaj po afron."
²⁹ Dhe u tha një shëmbëlltyrë; "Shikoni fikun dhe të gjitha pemët.
³⁰ Kur të shihni që po mugullojnë, merreni vesh që vera tashmë është afër.
³¹ Po ashtu edhe ju, kur të shihni që po ndodhin këto gjëra, merreni vesh që mbretëria e Perëndisë po afron.
³² Me të vërtetë po ju them, që ky brez nuk do të kalojë derisa gjithçka të përmbushet.
³³ Qielli dhe toka do të kalojnë, por fjalët e Mia nuk do të kalojnë.
³⁴ Dhe ruajeni veten, që të mos rëndohen zemrat tuaja nga babëzia, dehja dhe shqetësimet e jetës dhe që ajo ditë të mos ju vijë papritur.
³⁵ Sepse do të bjerë si një lak mbi të gjithë ata që banojnë mbi faqen e tërë dheut.
³⁶ Pra, mbani sytë hapur e lutuni në çdo kohë, që të mund t’u shpëtoni të gjitha këtyre gjërave që kanë për të ndodhur dhe të qëndroni përballë Birit të Njeriut."
³⁷ Dhe gjatë ditës Ai i mësonte njerëzit në tempull; natën dilte dhe e kalonte jashtë, në malin e quajtur i Ullinjve.
³⁸ I gjithë populli vinte herët në mëngjes në tempull për ta dëgjuar.