12
¹ Ndërkaq, si u mblodh një turmë prej mijëra vetash, aq sa njerëzit shkelnin njëri-tjetrin, Jezusi filloi t’u thoshte së pari dishepujve të Vet: "Ruhuni prej majasë së farizenjve, që është hipokrizia.
² Nuk ka gjë të mbuluar që nuk do të zbulohet dhe gjë të fshehtë që nuk do të merret vesh.
³ Prandaj, çfarëdo që të keni thënë në errësirë, do të dëgjohet në dritë, dhe ajo që keni folur vesh më vesh nëpër dhoma të mbyllura, do të shpallet majë pullazeve.
⁴ Dhe po ju them, o miqtë e mi, mos kini frikë prej atyre që vrasin trupin, dhe pas kësaj nuk kanë ç’të bëjnë më.
⁵ Por, do t’ju tregoj se prej kujt duhet të keni frikë: të keni frikë Atë që, pasi ka vrarë trupin, ka pushtet për ta hedhur njeriun në ferr; vërtet, po ju them, Atij t’i trembeni.
⁶ A nuk shiten vallë pesë trumcakë për dy aspra? Dhe asnjë prej tyre nuk harrohet përpara Perëndisë.
⁷ Por edhe flokët e kokës suaj janë të gjithë të numëruar. Mos kini frikë. Ju vleni më tepër se shumë trumcakë.
⁸ Dhe po ju them, kushdo që do të më pranojë Mua para njerëzve, edhe Biri i Njeriut do ta pranojë atë para engjëjve të Perëndisë.
⁹ Por, ai që më mohon para njerëzve, do të mohohet para engjëjve të Perëndisë.
¹⁰ Dhe kushdo që do të flasë një fjalë kundër Birit të Njeriut, do të falet, por atij që do të flasë kundër Frymës së Shenjtë, nuk do t’i falet.
¹¹ Kur t’ju çojnë në sinagoga, para krerëve dhe autoriteteve, mos u shqetësoni se si ose çfarë do të përgjigjeni për t’u mbrojtur, ose çfarë do të thoni,
¹² sepse Fryma e Shenjtë do t’ju mësojë në po atë orë çfarë duhet të thoni."
¹³ Dhe dikush nga turma i tha: "Mjeshtër, i thuaj vëllait tim që ta ndajë trashëgiminë me mua."
¹⁴ Por Ai i tha: "O njeri, kush më vuri Mua gjykatës ose ndarës pasurie përmbi ju?"
¹⁵ Dhe u tha: "Shikoni dhe ruhuni prej çdo lloj lakmie; sepse jeta e njeriut nuk qëndron në teprinë e pasurive të tij."
¹⁶ Dhe u tregoi një shëmbëlltyrë, duke thënë: "Toka e një të pasuri dha shumë drithë.
¹⁷ Ai mendonte me vete e thoshte: ‘Çfarë të bëj, sepse nuk kam ku ta mbledh drithin tim?’
¹⁸ Dhe tha: ‘Do të bëj këtë: do të rrëzoj grunarët e mi e do t’i ndërtoj më të mëdhenj dhe aty do ta grumbulloj gjithë drithin dhe mallrat e mia.
¹⁹ Dhe do t’i them shpirtit tim: "O shpirt, ke shumë të mira dhe i ke siguruar për shumë vjet; qetësohu, ha, pi e gëzohu".’
²⁰ Por Perëndia i tha: ‘I marrë, këtë natë do të vijnë të kërkojnë shpirtin tënd; të kujt do të jenë ato që ke përgatitur?’
²¹ Kështu do të jetë për atë që mbledh thesare për veten e vet dhe që nuk është i pasur ndaj Perëndisë."
²² Dhe u tha dishepujve [të Vet]: "Prandaj po ju them, mos u merakosni për jetën, se çfarë do të hani; as për trupin, se çfarë do të vishni.
²³ Jeta vlen më shumë se ushqimi dhe trupi më shumë se veshja.
²⁴ Shikoni korbat; as nuk mbjellin e as nuk korrin; nuk kanë qilar, as grunar, dhe Perëndia i ushqen. Sa shumë më tepër se zogjtë vleni ju!
²⁵ Cili prej jush, sado të shqetësohet, a mund t’i shtojë një orë jetës së vet?
²⁶ Nëse ju pra, nuk mundeni të bëni as gjënë më të vogël, përse shqetësoheni për të tjerat?
²⁷ Shihni se si rriten zambakët; ata nuk robtohen, as nuk endin; por po ju them, as Solomoni në gjithë lavdinë e vet, nuk ishte i veshur si njëri prej tyre.
²⁸ Dhe nëse Perëndia e vesh kështu barin, që sot është në arë e nesër hidhet në furrë, sa shumë më tepër do t’ju veshë ju, o besëpakë!
²⁹ Mos kërkoni çfarë të hani e çfarë të pini dhe as mos u bëni merak.
³⁰ Sepse të gjitha këto gjëra i kërkon bota pagane; Ati juaj e di që ju keni nevojë për to.
³¹ Por kërkoni mbretërinë e Tij, dhe këto gjëra do t’ju jepen si shtesë.
³² Mos ki frikë, o tufë e vogël; sepse Atit tuaj i ka pëlqyer t’ju japë juve mbretërinë.
³³ Shisni çka zotëroni dhe jepni lëmoshë; bëni për veten tuaj kuleta që nuk vjetrohen, një thesar të pashterueshëm në qiej, ku vjedhësi nuk afrohet dhe tenja nuk e bren.
³⁴ Sepse, ku është thesari juaj, aty do ta keni edhe zemrën.
³⁵ Ngjeshni një brez rreth mesit dhe mbani kandilat të ndezur.
³⁶ Dhe ju t’u ngjani njerëzve që presin zotërinë e tyre kur kthehet nga dasma, që kur të vijë e të trokasë, ata t’i hapin derën menjëherë.
³⁷ Lum ata shërbëtorë që, kur të vijë zotëria, do t’i gjejë zgjuar; me të vërtetë po ju them, se ai do të ngjeshë përparësen, do t’i shtrojë ata në tryeza dhe do të vijë e do t’u shërbejë.
³⁸ Dhe, po të vijë në kohën e rojës së dytë ose të tretë dhe t’i gjejë ata kështu, lum ata.
³⁹ Por ta dini, se po ta dinte i zoti i shtëpisë se në ç’orë vjen kusari, ai nuk do të lejonte t’i shpërthenin shtëpinë e vet.
⁴⁰ Edhe ju të jeni gati, sepse Biri i Njeriut do të vijë në atë orë që ju nuk e mendoni."
⁴¹ Pastaj Pjetri tha: "Zot, për ne po e thua këtë shëmbëlltyrë apo edhe për të gjithë?"
⁴² Dhe Zoti tha: "Cili pra, është ai kujdestar besnik dhe i mençur, të cilin zotëria e cakton mbi shërbëtorët e vet për t’u dhënë në kohën e duhur pjesën që u takon të ushqimit?
⁴³ Lum ai shërbëtor, të cilin zotëria i tij, kur të vijë, do ta gjejë duke vepruar kështu.
⁴⁴ Vërtet po ju them, që ai do ta caktojë atë mbi gjithë pasurinë e vet.
⁴⁵ Por, nëse ai shërbëtor thotë me vete: ‘Im zot po vonon e nuk po vjen’ dhe fillon t’i rrahë shërbëtorët e shërbëtoret, të hajë, të pijë e të dehet,
⁴⁶ zotëria i atij shërbëtori do të vijë në ditën që nuk e pret dhe në orën që nuk e di, do ta bëjë copë copë e do t’ia caktojë vendin me të pabesët.
⁴⁷ Dhe ai shërbëtor, që e dinte vullnetin e zotërisë së vet dhe nuk ishte përgatitur ose nuk kishte zbatuar vullnetin e tij, do të rrihet keqas.
⁴⁸ Por ai, që nuk e dinte dhe bëri gjëra që meritojnë ndëshkimin, do të rrihet më pak. Sepse kujtdo që i është dhënë shumë, do t’i kërkohet shumë, dhe atij që i është besuar shumë, do t’i kërkohet shumë më tepër.
⁴⁹ Unë kam ardhur të hedh zjarr mbi tokë dhe sa do të doja të ishte tashmë i ndezur!
⁵⁰ Por mua më duhet të pagëzohem me një pagëzim, dhe sa ankth të madh kam derisa të kryhet!
⁵¹ A mendoni se kam ardhur për të sjellë paqen mbi tokë? Aspak! Po ju them, përkundrazi, përçarjen.
⁵² Sepse që sot e tutje, pesë veta do të jenë të përçarë në një shtëpi, tre kundër dyve dhe dy kundër treve.
⁵³ Njerëzit do të përçahen, ati kundër të birit dhe i biri kundër të atit, nëna kundër së bijës dhe e bija kundër nënës, vjehrra kundër nuses dhe nusja kundër vjehrrës."
⁵⁴ Gjithashtu u thoshte turmave: "Kur shihni renë që ngrihet nga perëndimi, menjëherë thoni: ‘Do të bjerë shi i madh,’ dhe ashtu ndodh.
⁵⁵ Kur dëgjoni jugën që fryn, thoni: ‘Do të bëjë vapë,’ dhe ashtu ndodh.
⁵⁶ Hipokritë, ju dini të dalloni pamjen e dheut dhe të qiellit, por si nuk dini ta dalloni këtë kohë?
⁵⁷ Përse nuk gjykoni vetë ç’është e drejtë?
⁵⁸ Sepse, kur shkon me kundërshtarin tënd para gjykatësit, gjatë rrugës bëj ç’është e mundur të pajtohesh me të, që të mos të shpjerë te gjykatësi, dhe gjykatësi të të dorëzojë te roja dhe roja të të flakë në burg.
⁵⁹ Po të them që s’ke për të dalë prej andej derisa të mos kesh paguar edhe qindarkën e fundit."