kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

2 Korintasve

^9
1 Sa për shërbimin në dobi të shenjtërve është e tepërt për mua t’ju shkruaj,
² sepse e di mirë gatishmërinë tuaj dhe mburrem për të para maqedonasve, duke thënë që ju në Akai keni qenë gati për të dhënë që vjet dhe zelli juaj i ka nxitur shumë prej tyre.
³ Por vëllezërit i kam dërguar, që mburrja jonë për ju të mos dalë e kotë në këtë pikë, që, siç e kam thënë, ju të jeni të përgatitur;
⁴ se mos vijnë maqedonasit me mua dhe ju gjejnë të papërgatitur; dhe neve të na skuqet fytyra, për të mos thënë edhe juve, për këtë besimin tonë te ju.
⁵ Prandaj e pashë të domosdoshme t’u lutem vëllezërve që të vijnë para meje te ju dhe të përgatisin përpara dhuratën bujare të premtuar që më parë, që kjo të jetë gati si dhuratë bujare dhe jo si kërkesë prej nesh.
⁶ Këtë dua të them, ai që mbjell me koprraci, me koprraci do të korrë dhe ai që mbjell me bujari, me bujari do të korrë.
⁷ Secili të japë si ta ketë vendosur në zemrën e vet; jo me zemër të thyer ose me pahir, sepse Perëndia do atë që jep me gëzim.
⁸ Perëndia mund të bëjë që hiri të mbushullojë në ju, sepse duke pasur gjithmonë gjërat e nevojshme për gjithçka, të mund t’i kryeni me bujari veprat e mira.
⁹ Siç është shkruar: "Ai shpërndau, u dha të varfërve; drejtësia e Tij mbetet për jetë."
¹⁰ Ai që i jep farën atij që mbjell dhe bukën për ushqim, do të sigurojë dhe do të shumojë edhe farën tuaj dhe do të rritë frytin e drejtësisë suaj.
¹¹ Kështu do të jeni të pasur për çdo bujari, e cila pastaj do të bëjë që t’i ngrihet një himn falënderimi Perëndisë nëpërmjet nesh.
¹² Sepse kryerja e kësaj shërbese jo vetëm që i përmbush nevojat e shenjtërve, por gjithashtu ka vlerë më të madhe nëpërmjet falënderimeve të shumta Perëndisë.
¹³ Për shkak të provës që ka dhënë ky shërbim, ata i japin lavdi Perëndisë për bindjen që tregoni ndaj ungjillit të Krishtit dhe për bujarinë e ndihmesës suaj ndaj tyre dhe ndaj gjithë të tjerëve,
¹⁴ në një kohë kur edhe atyre, në lutjen që bënin për ju, u digjet zemra për ju për shkak të hirit tepër të madh që ju ka dhënë Perëndia.
¹⁵ I qofshim falë Perëndisë për dhuratën e Tij të parrëfyeshme!