kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

2 Korintasve

^8
1 Tani, o vëllezër, duam t’ju bëjmë të ditur hirin që Perëndi që u është dhënë kishave të Maqedonisë.
² Pa marrë parasysh provën e gjatë të mundimit, gëzimi i tyre i madh dhe varfëria e tyre në kulm, janë shndërruar në pasurinë e bujarisë së tyre.
³ Sepse dëshmoj që ata kanë dhënë sipas mundësisë së tyre, madje më tepër sesa kishin mundësi. Këtë e bënë me dëshirën e tyre,
⁴ duke na u lutur me gjithë shpirt që t’u bëhej një nder duke i lejuar të merrnin pjesë në këtë shërbim në dobi të shenjtërve.
⁵ Madje, duke tejkaluar shpresat tona, ata iu dhanë më parë Zotit dhe pastaj neve sipas vullnetit të Perëndisë.
⁶ Kështu që ne iu lutëm Titit, që meqë e kishte filluar, ta përfundonte midis jush këtë vepër hiri.
⁷ Por siç dalloheni në gjithçka, në besim, në fjalë, në dije, në çdo përkujdesje dhe në dashurinë tuaj për ne, ashtu dallohuni edhe në këtë vepër bujarie.
⁸ Nuk po e them këtë si urdhër, por vetëm për të vënë në provë çiltërsinë e dashurisë suaj nëpërmjet kujdesit për të tjerët.
⁹ Sepse ju e dini hirin e Zotit tonë Jezus Krisht, që megjithëse ishte i pasur, u bë i varfër për ju, që ju të bëheshit të pasur nëpërmjet varfërisë së Tij.
¹⁰ Lidhur me këtë po jap mendimin tim, sepse kjo është për dobinë tuaj; një vit si sot ju ishit të parët që jo vetëm filluat të jepnit por edhe shprehët dëshirën për ta bërë këtë.
¹¹ Por tani përfundojeni atë që nisët, që siç ishit të gatshëm për të shprehur dëshirën, po ashtu të jeni të gatshëm për ta realizuar brenda mundësive tuaja.
¹² Sepse kur njeriu tregohet i gatshëm, kjo gjë është e mirëpritur sipas asaj që dikush ka, jo sipas asaj që nuk ka.
¹³ Nuk duam që disa të shtrëngohen për të lehtësuar të tjerët, por që të ketë barazi.
¹⁴ Tani për tani bollëku juaj të plotësojë nevojën e tyre, që edhe bollëku i tyre të plotësojë nevojën tuaj, në mënyrë që të ketë barazi,
¹⁵ siç është shkruar: "Ai që mblodhi shumë nuk kishte me tepri dhe ai që mblodhi pak nuk kishte mangësi."
¹⁶ Por i qofshim falë Perëndisë, që i shtiu në zemër Titit po atë përkujdesje për ju.
¹⁷ Sepse Titi jo vetëm që e pranoi lutjen tonë, por meqë ishte shumë i zellshëm, me dëshirën e vet doli për të ardhur te ju.
¹⁸ Bashkë me të dërguam vëllanë, i cili është lëvduar në të gjitha kishat për shërbimin e tij ndaj ungjillit;
¹⁹ dhe për më tepër, ai është zgjedhur prej kishave që të na shoqërojë në këtë vepër hiri, që ne po kryejmë për lavdinë e Vetë Zotit dhe për të treguar vullnetin tonë të mirë.
²⁰ Po marrim masa që askush të mos na qortojë për punën tonë në qeverisjen e kësaj dhurate të bollshme,
²¹ sepse ne kujdesemi që të bëjmë ç’është e mirë, jo vetëm para Zotit, por edhe para njerëzve.
²² Bashkë me ta kemi dërguar vëllanë tonë, zellin e të cilit e kemi provuar shpeshherë në shumë punë, por tani ai është më i zellshëm se asnjëherë, për shkak të besimit të madh që ka në ju.
²³ Sa për Titin, ai është bashkëpjesëtar me mua dhe bashkëpunëtor në shërbimin tuaj; sa për vëllezërit tanë, ata janë përfaqësues të kishave dhe lavdi e Krishtit.
²⁴ Prandaj tregojuni atyre hapur përpara kishave provën e dashurisë suaj dhe të mburrjes sonë për ju.