kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

2 Korintasve

^6
1 Ne, si bashkëpunëtorë të Tij, ju bëjmë thirrje që të mos e merrni më kot hirin e Perëndisë,
² sepse Ai thotë: "Në çastin e volitshëm të dëgjova dhe në ditën e shpëtimit të ndihmova." Ja, tani është ‘çasti i volitshëm’, ja, tani është ‘dita e shpëtimit’.
³ Nga ana jonë nuk i japim askujt shkandull për ndonjë gjë, që shërbesa jonë të mos shahet,
⁴ por në gjithçka e tregojmë veten tonë si shërbyes të Perëndisë, me qëndresë të madhe, në mundime, në vështirësi, në ankthe,
⁵ në të rrahura, në burgime, në trazira, në mund, në pagjumësi, në uri,
⁶ me pastërti, me dije, me durim, me mirësi, me Frymë të Shenjtë, me dashuri të sinqertë,
⁷ me fjalë të së vërtetës, me fuqi të Perëndisë, me armët e drejtësisë në të djathtë dhe në të majtë,
⁸ me lavdi e në çnderim, me emër të keq e me emër të mirë, si mashtrues e megjithatë të vërtetë,
⁹ të panjohur e megjithatë të mirë-njohur, sikur po vdesim e megjithatë, ja tek po jetojmë, si të dënuar e megjithatë ende nuk na kanë vrarë,
¹⁰ të trishtuar, por gjithmonë të gëzuar, të varfër e megjithatë shumë veta i bëjmë të pasur, si njerëz që nuk kanë asgjë e megjithatë zotërojnë gjithçka.
¹¹ Kemi folur hapur me ju, o korintas, dhe zemrën jua kemi hapur krejt.
¹² Nuk ju kemi bërë ne zemërftohtë, por jeni ju vetë të ftohtë në zemrat tuaja.
¹³ Po ju flas si bijve të mi; më jepni diçka si shkëmbim: hapeni edhe ju zemrën tuaj.
¹⁴ Mos hyni nën një zgjedhë me ata që nuk besojnë; sepse ç’lidhje ka drejtësia me paudhësinë, ose ç’gjë të përbashkët ka drita me errësirën?
¹⁵ Çfarë ka Krishti që të përputhet me Beliarin, ose ç’lidhje ka besimtari me atë që nuk beson?
¹⁶ Çfarë ka të përbashkët tempulli i Perëndisë me idhujt? Sepse ne jemi tempulli i Perëndisë së gjallë. Siç e ka thënë Perëndia: "Do të banoj në mes tyre dhe do të eci midis tyre, do të jem Perëndia i tyre dhe ata do të jenë populli Im.
¹⁷ Prandaj dilni nga gjiri i tyre dhe veçohuni", tha Zoti. "Mos prekni asgjë të papastër dhe Unë do t’ju mirëpres.
¹⁸ Do të jem Atë për ju dhe ju do të jeni bij e bija për Mua", thotë Zoti i Gjithëfuqishëm.