kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

2 Korintasve

^4
1 Prandaj, të ngarkuar me këtë shërbesë, që na u dha prej mëshirës së Perëndisë, nuk ligështohemi.
² Për më tepër, hoqëm dorë nga mënyrat e fshehta e të turpshme, nuk jetojmë me dinakëri, nuk shtrembërojmë fjalën e Perëndisë. Përkundrazi, duke shfaqur hapur të vërtetën, ne ia rekomandojmë veten çdo ndërgjegjeje njerëzore para Perëndisë.
³ Edhe sikur ungjilli ynë të mbetet i mbuluar, ai është i mbuluar për ata që po humbin.
⁴ Atyre që nuk besojnë perëndia i kësaj bote u ka verbuar mendjet, që ata të mos shohin dritën e ungjillit të lavdisë së Krishtit, i cili është shëmbëllimi i Perëndisë.
⁵ Sepse nuk predikojmë veten tonë, por Jezus Krishtin si Zot, ndërsa veten tonë si shërbyesit tuaj për hir të Jezusit.
⁶ Sepse Perëndia që tha: "Dritë do të ndriçojë nga errësira", është Ai që shkëlqeu në zemrat tona për të ndriçuar dijen e lavdisë së Perëndisë në fytyrën e Jezus Krishtit.
⁷ Por ne e kemi këtë thesar në enë prej balte, që fuqia e madhërishme të jetë nga Perëndia dhe jo nga ne.
⁸ Në çdo gjë jemi të munduar, por jo të shtypur, jemi në hall, por jo të dëshpëruar,
⁹ të përndjekur, por jo të braktisur, të rrëzuar, por jo të humbur;
¹⁰ Gjithmonë mbajmë me vete në trup vdekjen e Jezusit, që edhe jeta e Jezusit të shfaqet në trupin tonë.
¹¹ Sepse ne që jemi të gjallë, i dorëzohemi vazhdimisht vdekjes për shkak të Jezusit, që edhe jeta e Jezusit të shfaqet në mishin tonë të vdekshëm.
¹² Kështu te ne vepron vdekja, ndërsa te ju jeta.
¹³ Është shkruar: "Besova, prandaj fola." Kështu edhe ne, duke pasur të njëjtën frymë besimi, besojmë, prandaj edhe flasim,
¹⁴ sepse e dimë se Ai që ngjalli Zotin Jezus, do të na ngjallë edhe ne me Jezusin dhe do të na vërë pranë Tij bashkë me ju.
¹⁵ Sepse të gjitha janë për të mirën tuaj, që hiri që po arrin një numër të madh njerëzish, të bëjë që të shumëfishohen falënderimet për lavdinë e Perëndisë.
¹⁶ Prandaj ne nuk na lëshon zemra; edhe pse njeriu ynë i jashtëm po kalbet, megjithatë njeriu ynë i brendshëm po ripërtërihet nga dita në ditë.
¹⁷ Sepse mundimi ynë i lehtë dhe i përkohshëm po sjell për ne një lavdi të përjetshme, që peshon më shumë se çdo gjë tjetër,
¹⁸ për sa kohë ne vështrojmë jo gjërat që shihen, por ato që nuk shihen; sepse ato që shihen, janë të përkohshme, por ato që nuk shihen, janë të përjetshme.