kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

2 Korintasve

^2
1 Kështu vendosa me veten time, që të mos vija te ju përsëri me hidhërim.
² Sepse po t’ju hidhëroj, atëherë kush do të më gëzojë veç atij që u hidhërua prej meje?
³ Dhe pikërisht këtë shkrova, që, kur të vija, të mos trishtohesha prej atyre që duhet të më bënin të gëzuar. Kisha besim te të gjithë ju, se gëzimi im ishte gëzim për ju të gjithë.
⁴ Ju kam shkruar në një çast mundimi dhe ankthi të madh në zemër e me shumë lot, jo që të hidhëroheni, por që ta dini dashurinë që kam veçanërisht për ju.
⁵ Por nëse dikush më ka hidhëruar, nuk më ka hidhëruar vetëm mua, por deri diku, pa e tepruar, të gjithë ju.
⁶ Për një të këtillë mjafton dënimi që i ka ardhur nga shumica.
⁷ Përkundrazi, ju duhet ta falni dhe ta ngushëlloni, që ky të mos humbasë farë nga një hidhërim kaq i fortë.
⁸ Prandaj, ju bëj thirrje të tregoheni të dashur me të.
⁹ Sepse edhe për këtë shkrova, që t’ju vija në provë, për të parë nëse jeni të bindur për gjithçka.
¹⁰ Atë që e falni ju, e fal edhe unë. Sepse, vërtet, atë që kam falur unë, nëse kam falur diçka, e kam bërë për ju përpara Krishtit,
¹¹ që të mos na e hedhë Satani, të cilit ia dimë mirë synimet.
¹² Kur shkova në Troadë për ungjillin e Krishtit, megjithëse pashë që Zoti ma kishte hapur një derë,
¹³ nuk gjeta prehje për shpirtin tim, sepse nuk takova atje Titin, vëllanë tim; kështu, si u ndava me ta, u nisa për në Maqedoni.
¹⁴ Por falënderuar qoftë Perëndia, që na bën të ngadhënjejmë gjithnjë në Krishtin dhe që përhap nëpërmjet nesh aromën e njohjes së Tij në çdo vend.
¹⁵ Sepse ne jemi era e këndshme e Krishtit për Perëndinë ndër ata që shpëtohen dhe ndër ata që humbasin;
¹⁶ për një palë kundërmim vdekjeje për vdekjen, ndërsa për palën tjetër erë jete për jetën. Por kush është i zoti për këto?
¹⁷ Sepse nuk jemi si shumë veta, që bëjnë tregti me fjalën e Perëndisë, por flasim në Krishtin përpara Perëndisë me sinqeritet, dhe si të dërguar nga Perëndia.