kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^9
1 A nuk jam i lirë? A nuk jam apostull? A nuk e kam parë Jezusin, Zotin tonë? A nuk jeni ju vepra ime në Zotin?
² Edhe po të mos jem apostull për të tjerët, të paktën jam për ju! Sepse ju jeni vula e apostullimit tim në Zotin.
³ Mbrojtja ime ndaj atyre që ngrenë padi kundër meje është kjo:
⁴ Mos vallë nuk kemi të drejtë të hamë e të pimë?
⁵ Mos vallë nuk kemi të drejtë të marrim me vete një grua besimtare, siç bëjnë apostujt e tjerë, vëllezërit e Zotit dhe Kefa?
⁶ Apo vetëm unë dhe Barnaba nuk kemi të drejtë të mos punojmë?
⁷ Kush ka shkuar ndonjëherë ushtar me shpenzimet e veta? Kush e mbjell vreshtin dhe nuk e ha frytin e tij? Apo, kush kujdeset për grigjën dhe nuk pi nga qumështi i saj?
⁸ Mos i flas këto si njeri? A nuk i thotë këto gjëra edhe Ligji?
⁹ Sepse është shkruar në Ligjin e Moisiut: "Mos i vërë gojëz kaut kur shin." Mos vallë Perëndia shqetësohet për qetë?
¹⁰ Apo e ka fjalën për të gjithë ne? Vërtet, për ne është shkruar, sepse ai që lëron, duhet të lërojë me shpresë dhe ai që shin, duhet të shijë me shpresë se do të marrë pjesën e vet.
¹¹ Nëse ne mbollëm te ju gjërat shpirtërore, mos është e tepërt po të korrim të mirat tuaja materiale?
¹² Nëse të tjerët marrin pjesë në këtë të drejtë mbi ju, a nuk e kemi edhe ne, madje më shumë? Por ne nuk e kemi përdorur këtë të drejtë; përkundrazi, i durojmë të gjitha, që të mos i krijojmë ndonjë pengesë ungjillit të Krishtit.
¹³ A nuk e dini se ata që kryejnë shërbime të shenjta, hanë gjëra nga tempulli dhe ata që kujdesen për altarin, kanë pjesën e tyre në altar?
¹⁴ Po kështu, edhe Zoti u dha porosi atyre që shpallin ungjillin që të rrojnë nga ungjilli.
¹⁵ Por unë nuk kam shfrytëzuar asnjë të drejtë nga këto. Dhe nuk po jua shkruaj këto me shpresën që të veprohet kështu me mua; sepse për mua është më mirë të vdes sesa të ma heqë njeri mburrjen time.
¹⁶ Sepse po të predikoj ungjillin, nuk kam përse të mburrem, sepse kjo është një detyrë e domosdoshme që më është ngarkuar; mjerë unë po të mos predikoj ungjillin.
¹⁷ Sepse kur e bëj këtë me dëshirë, kam shpërblim; por nëse e bëj kundër dëshirës, atëherë kam një detyrë që më është besuar.
¹⁸ Cili është pra shpërblimi im? Që, kur të predikoj ungjillin, ta paraqes atë falas, që të mos e shpërdoroj të drejtën time në predikimin e tij.
¹⁹ Sepse, edhe pse jam i lirë dhe nuk varem prej askujt, e kam bërë veten skllav ndaj të gjithëve, që të fitoj sa më shumë.
²⁰ Për judenjtë u bëra si jude, që të fitoja judenjtë; për ata që janë nën Ligj, u bëra si të isha nën Ligjin, megjithëse vetë nuk jam nën Ligjin, që të fitoja ata që janë nën Ligjin.
²¹ Me ata që s’kanë ligj, u bëra sikur jam pa ligj, megjithëse nuk jam pa ligjin e Perëndisë, por nën ligjin e Krishtit, që të fitoja ata që janë pa ligj.
²² Me të dobëtit u bëra i dobët, që të fitoja të dobëtit; për të gjithë u bëra gjithçka, që të shpëtoja me çdo kusht disa.
²³ Gjithçka e bëj për ungjillin, që të kem pjesë në bekimet e tij.
²⁴ Nuk e dini se vërtet të gjithë vrapuesit në stadium vrapojnë, por vetëm një e merr çmimin? Kështu vraponi edhe ju, që të merrni çmimin.
²⁵ Çdo njeri që merr pjesë në garë e përmban veten në gjithçka. Ata vërtet e bëjnë këtë që të marrin një kurorë që prishet, ndërsa ne një kurorë që nuk prishet kurrë.
²⁶ Pra, unë vrapoj, jo si ai që nuk di ku shkon; qëlloj me grusht jo si ai që godet ajrin.
²⁷ Por e mundoj trupin tim dhe e nënshtroj si skllav, që pasi t’u kem predikuar të tjerëve, të mos bëhem i papërshtatshëm për çmimin.