kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

1 Korintasve

^7
1 Tani, për sa më keni shkruar, është mirë për burrin të mos prekë grua.
² Por, meqë ka kaq shumë imoralitet, secili të ketë gruan e vet dhe secila grua të ketë burrin e vet.
³ Burri te kryejë detyrën e vet ndaj gruas e po ashtu edhe gruaja ndaj burrit.
⁴ Nuk e urdhëron gruaja trupin e vet, por burri; po ashtu nuk e urdhëron burri trupin e vet, por gruaja.
⁵ Mos iu shmangni njëri-tjetrit, veçse kur keni rënë në një mendje për njëfarë kohe, që t’i përkushtoheni lutjes. Pastaj bashkohuni përsëri, që të mos ju tundojë Satani për shkak të mospërmbajtjes suaj.
⁶ Por këtë e them si lëshim, jo si urdhër.
⁷ Do të doja që të gjithë njerëzit të ishin si vetja ime. Por secili ka dhuntinë e vet nga Perëndia, njëri ka këtë dhunti dhe tjetri ka një tjetër.
⁸ U them të pamartuarve dhe vejushave, që mirë është për ta të mbeten siç jam unë.
⁹ Por nëse nuk e përmbajnë dot veten, le të martohen, sepse më mirë është të martohesh sesa të digjesh përbrenda.
¹⁰ Por të martuarve u bëj thirrje, jo unë, por Zoti, që gruaja të mos ndahet nga burri;
¹¹ (po u nda, le të mbetet e pamartuar, përndryshe të pajtohet me të shoqin) dhe burri të mos e lërë gruan e vet.
¹² Por të tjerëve u them, unë dhe jo Zoti, që nëse ndonjë nga vëllezërit nuk e ka gruan besimtare dhe ajo pranon të jetojë me të, të mos e lërë.
¹³ Gruaja, që nuk e ka burrin besimtar, kur ky pranon të banojë me të, të mos e lërë burrin.
¹⁴ Sepse burri që nuk është besimtar, shenjtërohet nëpërmjet gruas së vet dhe gruaja që nuk është besimtare, shenjtërohet nëpërmjet burrit; përndryshe fëmijët tuaj nuk do të ishin të pastër, por tani janë të shenjtë.
¹⁵ Megjithatë, nëse jobesimtari kërkon të ndahet, le të ndahet. Vëllai ose motra nuk janë të lidhur në raste të këtilla; Perëndia ju ka thirrur të jetoni në paqe.
¹⁶ Sepse ku e di ti, o grua, a do ta shpëtosh burrin tënd? Ku e di ti, o burrë, a do ta shpëtosh gruan tënde?
¹⁷ Por secili, siç ia ka caktuar Zoti dhe siç e ka thirrur Perëndia, ashtu le të ecë në jetë. Dhe ky është urdhri që u jap të gjitha kishave.
¹⁸ A u thirr dikush kur ishte rrethprerë? Le të mbetet i rrethprerë. A u thirr dikush kur nuk ishte rrethprerë? Të mos bëhet i rrethprerë.
¹⁹ Rrethprerja nuk është asgjë dhe parrethprerja nuk është asgjë, por ajo që ka rëndësi, është të mbash urdhërimet e Perëndisë.
²⁰ Secili të mbetet në atë gjendje në të cilën ishte kur e thirri Perëndia.
²¹ U thirre kur ishe skllav? Mos e prish gjakun për këtë; por po të kesh mundësi të fitosh lirinë, më mirë shfrytëzoje këtë.
²² Sepse ai që u thirr në Zotin kur ishte skllav, është i liruar i Zotit; po ashtu, ai që u thirr kur ishte i lirë, është skllav i Krishtit.
²³ Ju jeni blerë me një çmim; mos u bëni skllevër të njerëzve.
²⁴ Le të mbetet, o vëllezër, secili me Perëndinë në atë gjendje në të cilën është thirrur.
²⁵ Dhe sa për ato që janë të virgjra, nuk kam urdhër nga Zoti, por një mendim e jap si një njeri që ka fituar mëshirën e Zotit për të qenë besnik.
²⁶ Për shkak të kohës së vështirë tani, mendoj se më mirë është për njeriun të mbetet ashtu siç është.
²⁷ Je i lidhur me ndonjë grua? Mos kërko të lirohesh. A je i pamartuar? Mos kërko grua.
²⁸ Por, po të martohesh, nuk ke mëkatuar; po të martohet vajza e re, nuk ka mëkatuar. Por njerëz të këtillë do të përjetojnë mundim në mish dhe unë do të doja t’ju kursej.
²⁹ Dua të them këtë, o vëllezër, që koha është e shkurtër. Që sot e tutje edhe ata që kanë gra, të jetojnë sikur të mos kishin;
³⁰ ata që qajnë, sikur të mos qanin; ata që gëzojnë, sikur të mos gëzonin; ata që blejnë, sikur të mos e kishin pronë të vetën,
³¹ dhe ata që e gëzojnë këtë botë, sikur të mos e gëzonin; sepse kjo botë, në formën që ka tani, po kalon.
³² Dua që ju të mos shqetësoheni. I pamartuari përkujdeset për gjërat e Zotit, se si të kënaqë Zotin,
³³ ndërsa i martuari përkujdeset për gjërat e botës, se si të kënaqë gruan
³⁴ dhe i ka interesat të ndara. Gruaja e pamartuar ose virgjëresha përkujdeset për gjërat e Zotit, që të jetë e shenjtë si në trup edhe në frymë; por ajo që është e martuar, përkujdeset për gjërat e botës, se si të kënaqë burrin.
³⁵ Këtë jua them për të mirën tuaj, jo që t’ju vë kufizime, por që të silleni në mënyrë të hijshme dhe ta përqendroni vëmendjen te Zoti.
³⁶ Nëse dikush mendon se nuk po sillet hijshëm me vajzën e virgjër me të cilën ka të bëjë dhe po të jetë se asaj po i kalon lulja e rinisë dhe ai mendon të martohet, atëherë le të bëjë atë që dëshiron; ai nuk bën mëkat. Le të martohen.
³⁷ Por ai që qëndron pa u tundur në zemrën e vet, që nuk e detyron gjë, por ka forcë mbi vullnetin e vet, dhe e ka vendosur në zemrën e vet, që ta ruajë vajzën e vet të virgjër, mirë do të bëjë.
³⁸ Kështu që, ai që e marton vajzën e vet të virgjër mirë bën, dhe ai që nuk e marton, do të bëjë edhe më mirë.
³⁹ Gruaja është e lidhur për aq kohë sa i rron i shoqi, por po t’i vdesë burri, ajo është e lirë të martohet me atë që dëshiron, me kusht që të jetë në Zotin.
⁴⁰ Por, sipas mendimit tim, ajo është më e lumtur po të mbetet ashtu siç është; mendoj se edhe unë kam Frymën e Perëndisë.