kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

1 Korintasve

^6
1 A ka ndonjë prej jush që, kur ka një mosmarrëveshje kundër një tjetri, merr guximin ta çojë çështjen për t’u gjykuar para të padrejtëve dhe jo përpara shenjtërve?
² A nuk e dini se shenjtërit do ta gjykojnë botën? Nëse bota do të gjykohet prej jush, si nuk qenkeni të zotë për të gjykuar gjërat më të vogla?
³ A nuk e dini se do të gjykojmë engjëjt? Aq më tepër gjërat e jetës së përditshme!
⁴ Pra, kur keni gjyqe për çështje të jetës së përditshme, ju a vini gjykatës njerëz pa shumë autoritet në kishë?
⁵ E them për turpin tuaj. Si vallë nuk u gjendka asnjë i mençur midis jush që të mund të sheshojë mosmarrëveshjet midis vëllezërve?
⁶ Përkundrazi vëllai hedh në gjyq vëllanë, dhe këtë e bën përpara atyre që nuk besojnë!
⁷ Megjithatë, fakti që hidhni në gjyq njëri-tjetrin është tashmë humbje për ju. Përse nuk lejoni më mirë t’ju bëjnë padrejtësi? Përse nuk lejoni më mirë që t’ju mashtrojnë?
⁸ Përkundrazi, ju vetë bëni padrejtësi dhe mashtroni, dhe këtë ua bëni vëllezërve tuaj.
⁹ Apo nuk e dini që të padrejtët nuk do të trashëgojnë mbretërinë e Perëndisë? Mos u gënjeni: as të përdalët, as idhujtarët, as shkelësit e kurorës, as burrat si femra, as ata që shkojnë me burra,
¹⁰ as vjedhësit, as të babëziturit, as pijanecët, as përgojuesit, as grabitqarët nuk do ta trashëgojnë mbretërinë e Perëndisë.
¹¹ Të tillë ishin disa prej jush. Por ju u latë, u shenjtëruat, u shfajësuat në emrin e Zotit Jezus Krisht dhe në Frymën e Perëndisë sonë.
¹² Të gjitha më lejohen, por jo të gjitha janë të dobishme. Të gjitha më lejohen, por unë nuk do ta lë veten të sundohem nga hiçi.
¹³ Ushqimi është për barkun dhe barku është për ushqimin; por Perëndia do t’i shkatërrojë të dyja. Trupi nuk është për imoralitet, por për Zotin dhe Zoti për trupin.
¹⁴ Perëndia e ngjalli edhe Zotin prej të vdekurve dhe do të na ngjallë edhe ne nëpërmjet fuqisë së Vet.
¹⁵ A nuk e dini se trupat tuaj janë gjymtyrë të Krishtit? A t’i marr pra, gjymtyrët e Krishtit dhe t’i bashkoj me ato të një femre të përdalë? Larg qoftë!
¹⁶ Apo nuk e dini se ai që bashkohet me femrën e përdalë është një trup me të? Sepse Ai thotë: "Të dy do të bëhen një mish."
¹⁷ Por ai që bashkohet me Zotin, është një frymë me Të.
¹⁸ Largohuni nga imoraliteti. Çdo mëkat tjetër që bën njeriu, është jashtë trupit, por ai që kryen veprime të përdala, mëkaton kundër trupit të vet.
¹⁹ Apo nuk e dini se trupi juaj është tempull i Frymës së Shenjtë që është brenda jush, të cilin ju e keni prej Perëndisë dhe që nuk i përkisni vetvetes?
²⁰ Sepse ju jeni blerë me një çmim; jepini pra, lavdi Perëndisë me trupin tuaj.