kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

1 Korintasve

^5
1 Gjithandej flitet për imoralitet midis jush, një imoralitet të tillë që nuk është parë as ndër paganët, deri atje sa dikush mban gruan e babait të tij.
² Dhe ju krekoseni! A nuk do të ishte më mirë të vajtonit, që të shporret prej jush ai që e ka kryer një gjë të tillë.
³ Sepse unë, që vërtet nuk jam aty me trup, por jam me frymë, e kam gjykuar atë që veproi në atë mënyrë, sikur të isha i pranishëm aty.
⁴ Kur të mblidheni në emrin e Zotit tonë Jezus, ju bashkë me mua me frymë dhe me fuqinë e Zotit tonë Jezus,
⁵ dorëzojani këtë njeri Satanit që t’i shkatërrohet mishi dhe t’i shpëtojë fryma në ditën e Zotit.
⁶ Mburrja juaj nuk është e mirë. A nuk e dini se pak maja e mbrun tërë brumin?
⁷ Pastrohuni nga majaja e vjetër, që të bëheni brumë i ri, siç jeni në të vërtetë. Sepse edhe Krishti, Pashka jonë, u flijua për ne.
⁸ Prandaj le të festojmë jo me majanë e vjetër, as me majanë e së keqes dhe të së ligës, por me bukën e ndorme të sinqeritetit dhe të së vërtetës.
⁹ Ju shkrova në letrën time që të mos përziheni me njerëzit e përdalë.
¹⁰ Nuk e kisha kurrsesi fjalën për të përdalët e kësaj bote, për të babëziturit dhe mashtruesit, apo për idhujtarët; sepse atëherë duhet të iknit nga bota.
¹¹ Por tani, ju shkrova që të mos përziheni me këdo që e quan veten vëlla, por që është i përdalë, ose lakmitar, ose idhujtar, ose shpifës, ose pijanec, ose mashtrues. Madje as të mos hani me një të këtillë.
¹² Sepse ç’punë kam unë të gjykoj ata që janë jashtë kishës? A nuk i gjykoni ju ata që janë brenda?
¹³ Por ata që janë jashtë, i gjykon Perëndia. Shporreni të ligun nga vetja juaj.