kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^4
1 Kështu pra, njerëzit duhet të na konsiderojnë si shërbëtorë të Krishtit dhe mbarështues të mistereve të Perëndisë.
² Këtu, për më tepër, kërkohet që mbarështuesit të jenë të besës.
³ Për mua nuk ka shumë rëndësi nëse gjykohem nga ju apo nga ndonjë gjykatë njerëzish; ç’është e vërteta as veten time nuk e gjykoj.
⁴ Sepse nuk kam gjë për të cilën të më vrasë ndërgjegjja, megjithatë kjo nuk më shfajëson. Ai që më gjykon mua, është Zoti.
⁵ Prandaj mos gjykoni asgjë para kohe, derisa të vijë Zoti, i cili do t’i nxjerrë në dritë të fshehtat e errësirës dhe do të shfaqë synimet e zemrave; atëherë secilit do t’i vijë lëvdata nga Perëndia.
⁶ Këto, o vëllezër, i zbatova te vetja ime dhe tek Apoloni për të mirën tuaj, që të mësoni prej nesh se çdo të thotë të mos shkosh përtej asaj që është shkruar, që asnjë të mos krekoset duke i mbajtur anën njërit kundër tjetrit.
⁷ Sepse, kush të bën të jesh ndryshe nga të tjerët? Çfarë ke tënden që nuk e ke marrë? Por nëse e ke marrë, përse mburresh sikur nuk e ke marrë?
⁸ Tashmë jeni të ngopur. Tashmë jeni bërë të pasur. Pa ne u bëtë mbretër. Sa do të doja që vërtet të bëheshit mbretër, që të mbretëronim edhe ne bashkë me ju.
⁹ Sepse, mendoj që Perëndia na ka vënë ne apostujt në fund të të gjithëve, si të dënuar me vdekje; sepse jemi bërë shfaqje për botën, për engjëjt si dhe për njerëzit.
¹⁰ Ne jemi të marrë për Krishtin, por ju jeni të mençur në Krishtin; ne jemi të dobët, por ju jeni të fortë; ju jeni të nderuar, por ne jemi të përbuzur.
¹¹ Deri në këtë çast vuajmë nga uria dhe etja, na godisin me pëllëmbë, jemi të zhveshur dhe pa strehë.
¹² Robtohemi duke punuar me duart tona; kur na mallkojnë, ne bekojmë; kur na përndjekin, ne durojmë;
¹³ kur na shajnë, ne përgjërojmë. Deri tani jemi bërë si fundërritë e botës, mbeturinat e të gjithëve.
¹⁴ Nuk i shkruaj këto që t’ju turpëroj, por t’ju paralajmëroj si fëmijët e mi të dashur.
¹⁵ Sepse, edhe po të keni mijëra mësues në Krishtin, megjithatë nuk do të kishit shumë etër; sepse unë u bëra ati juaj në Krishtin Jezus nëpërmjet ungjillit.
¹⁶ Prandaj ju bëj thirrje të bëheni imituesit e mi.
¹⁷ Për këtë arsye ju kam dërguar Timoteun, birin tim të zemrës dhe besnik në Zotin. Ai do t’ju kujtojë udhët e mia në Krishtin Jezus, që përputhen me ato që mësoj kudo në çdo kishë.
¹⁸ Disa filluan të fryhen nga krenaria, sikur unë nuk do të vija më te ju.
¹⁹ Por do të vij shpejt te ju, në dashtë Zoti, dhe do të marr vesh jo vetëm si krekosen këta njerëz, por edhe ç’fuqi kanë.
²⁰ Sepse mbretëria e Perëndisë nuk qëndron në fjalë, por në fuqi.
²¹  Si doni ju? A të vij te ju me shkop apo me dashuri dhe frymë zemërbutësie?