kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^3
1 Dhe unë, vëllezër, nuk munda t’ju flas siç do t’u flisja njerëzve shpirtërorë, por njerëzve të mishit, foshnjave në Krishtin.
² Qumësht ju dhashë për të pirë, dhe jo gjellë, sepse ende nuk ishit gati. Por as tani nuk jeni ende gati.
³ Ende i përkisni mishit. Sepse, përderisa midis jush ka smirë dhe grindje, a nuk i përkisni mishit dhe a nuk veproni siç bëjnë njerëzit?
⁴ Sepse kur dikush thotë: "Unë jam i Palit" dhe një tjetër: "Unë jam i Apolonit", a nuk jeni vetëm njerëz?
⁵ Kush është pra, Apoloni? Kush është Pali? Shërbëtorë, nëpërmjet të cilëve ju besuat, secilit sipas mundësisë që i dha Zoti.
⁶ Unë mbolla, Apoloni ujiti, por Perëndia e bëri të rritet.
⁷ Kështu pra, as ai që mbjell, as ai që ujiti nuk është gjë, por vetëm Perëndia që e bën të rritet.
⁸ Ai që mbjell dhe ai që ujit kanë një qëllim; por secili do ta marrë shpërblimin sipas mundit të vet.
⁹ Sepse ne jemi bashkëpunëtorë të Perëndisë; ju jeni ara e Perëndisë, ndërtesa e Perëndisë.
¹⁰ Sipas hirit që Perëndia ma dha mua, si një arkitekt i mençur hodha themelin dhe një tjetër po ndërton mbi të. Por secili të ketë kujdes se si ndërton mbi të.
¹¹ Sepse askush nuk mund të hedhë themel tjetër, veç atij që është hedhur, që është Jezus Krishti.
¹² Nëse dikush ndërton mbi këtë themel duke përdorur ar, argjend, gurë të çmuar, dru, sanë, kashtë,
¹³ puna e secilit do të dalë në pah; sepse dita do ta tregojë. Ajo do të zbulohet me anë të zjarrit dhe vetë zjarri do ta provojë se ç’punë ka bërë secili.
¹⁴ Nëse vepra që ka ndërtuar dikush mbetet, ai do të marrë shpërblimin.
¹⁵ Nëse vepra e dikujt digjet, ai do të pësojë humbje; ai vetë do të shpëtojë, por si ai që shpëton prej zjarrit.
¹⁶ A nuk e dini se jeni tempull i Perëndisë dhe se Fryma e Perëndisë banon në ju?
¹⁷ Nëse dikush prish tempullin e Perëndisë, Perëndia do ta shkatërrojë atë, sepse tempulli i Perëndisë, që jeni ju, është i shenjtë.
¹⁸ Askush të mos gënjejë veten. Nëse dikush midis jush mendon se është i mençur në këtë jetë, le të bëhet i marrë, që të mund të bëhet i mençur.
¹⁹ Sepse mençuria e kësaj bote është marrëzi para Perëndisë. Sepse është shkruar: "Ai i zë të mençurit në dinakërinë e tyre",
²⁰ dhe përsëri: "Zoti i di mendimet e të mençurve, që janë të kota."
²¹ Prandaj askush të mos mburret mes njerëzve. Sepse gjithçka është juaja:
²² qoftë Pali, qoftë Apoloni, qoftë Kefa, qoftë bota, qoftë jeta, qoftë vdekja, qoftë gjërat që janë, apo gjërat që do të vijnë – gjithçka është juaja
²³ dhe ju jeni të Krishtit dhe Krishti është i Perëndisë.