kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^2
1 Edhe unë o vëllezër, kur erdha te ju për t’ju shpallur dëshminë për Perëndinë, nuk erdha me epërsi në shprehje ose në mençuri.
² Sepse vendosa që të mos di gjë tjetër ndër ju veç Jezus Krishtit, dhe Ky i kryqëzuar.
³ Erdha te ju me dobësi, me frikë dhe duke m’u dredhur zemra.
⁴ Fjala ime dhe predikimi im nuk u bënë me fjalë bindëse mençurie, por duke shfaqur fuqinë e Frymës,
⁵ që besimi juaj të mos mbështetet në mençurinë e njerëzve, por në fuqinë e Perëndisë.
⁶ Megjithatë, ne flasim për mençuri në mes njerëzve të pjekur, por jo për mençurinë e kësaj epoke, as të sunduesve të kësaj bote, që po përfundojnë në hiçgjë.
⁷ Ne flasim për mençurinë e Perëndisë, që është mister, atë që është fshehur, të cilën Perëndia e kishte paracaktuar për lavdinë tonë përpara se të fillonte koha.
⁸ Atë nuk e kuptuan asnjë nga sunduesit e kësaj bote, sepse, po ta kishin kuptuar, nuk do ta kishin kryqëzuar Zotin e lavdisë.
⁹ Por, siç është shkruar: "Ato që syri nuk ka parë, veshi nuk ka dëgjuar, ato që nuk kanë hyrë në zemrën e njeriut, janë ato që Perëndia ka përgatitur për ata që e duan."
¹⁰ Por neve Perëndia na i zbuloi nëpërmjet Frymës. Sepse Fryma heton gjithçka, madje edhe thellësitë e Perëndisë.
¹¹ Sepse cili prej njerëzve i di mendimet e njeriut përveç frymës së njeriut, që është në të? Kështu edhe mendimet e Perëndisë askush nuk i di përveç Frymës së Perëndisë.
¹² Ne nuk kemi marrë frymën e botës, por frymën që vjen nga Perëndia, që të dimë gjërat që na janë dhënë falas nga Perëndia.
¹³ Ato i themi jo me fjalët që na ka mësuar mençuria njerëzore, por me ato që na ka mësuar Fryma, duke shtjelluar punët e Frymës me fjalët e Frymës.
¹⁴ Por njeriu natyror nuk i pranon punët e Frymës së Perëndisë, sepse ato janë marrëzira për të. Ai nuk mund t’i kuptojë, sepse ato vlerësohen shpirtërisht.
¹⁵ Por ai që është sipas Frymës, gjykon gjithçka dhe ai vetë nuk gjykohet prej askujt.
¹⁶ Sepse kush e ka njohur mendjen Zotit, që ta udhëzojë? Por ne kemi mendjen e Krishtit.