kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^16
1 Përsa i përket grumbullimit të ndihmave për shenjtërit, veproni edhe ju siç i kam porositur kishat e Galacisë.
² Të parën ditë të çdo jave, secili prej jush të vërë diçka mënjanë dhe ta kursejë, sipas të ardhurave, që kur të vij unë, të mos bëhen mbledhje ndihmash.
³ Pastaj, kur të vij, atyre që do të miratoni ju, do t’u jap letra rekomandimi dhe do t’i dërgoj që të çojnë dhuratën tuaj në Jeruzalem,
⁴ dhe po ta shoh të arsyeshme që të shkoj edhe unë, ata do të nisen bashkë me mua.
⁵ Do të vij te ju kur të kaloj nga Maqedonia, sepse më bie rruga nëpër Maqedoni.
⁶ Ndoshta mund të qëndroj me ju, ose edhe mund të kaloj dimrin, që ju të më nxirrni njeri për të më përcjellë kudo që shkoj.
⁷ Sepse nuk dua t’ju shoh tani kalimthi; shpresoj të qëndroj me ju për njëfarë kohe, në dashtë Zoti.
⁸ Por do të qëndroj në Efes deri në Rrëshajët,
⁹ sepse më është hapur një derë e madhe për punë të frytshme, megjithëse kundërshtarë ka shumë.
¹⁰ Po të vijë Timoteu, kujdesuni që të qëndrojë me ju pa druajtje, sepse ai, ashtu si unë, bën punën e Zotit.
¹¹ Prandaj, askush të mos e përçmojë. Por përcilleni në paqe, që të kthehet tek unë; po e pres bashkë me vëllezërit.
¹² Sa për Apolonin, vëllanë tonë, iu luta shumë që të vinte te ju me vëllezërit. Nuk kishte fare dëshirë të vinte tani, por do të vijë kur t’i dalë rasti.
¹³ Hapni sytë, qëndroni të patundur në besim, silluni si burra, bëhuni të fortë.
¹⁴ Gjithçka që bëni, ta bëni me dashuri.
¹⁵ Ju e dini shtëpinë e Stefanait, që është fryti i parë i Akaisë dhe e dini që ata ia kanë kushtuar veten shërbesës së shenjtërve. Po ju lutem, o vëllezër
¹⁶ që edhe ju të viheni në shërbim të njerëzve të këtillë dhe të kujtdo që ndihmon dhe mundohet.
¹⁷ Gëzohem për ardhjen e Stefanait, të Fortunatit dhe të Akaikut, sepse ata plotësuan atë që ju mungonte juve.
¹⁸ Sepse ata na qetësuan shpirtin tim dhe tuajin. Prandaj t’ua dini për nder njerëzve të këtillë.
¹⁹ Ju përshëndesin kishat e Azisë. Akuila dhe Priska ju përshëndesin përzemërsisht në Zotin, bashkë me kishën që mblidhet në shtëpinë e tyre.
²⁰ Të gjithë vëllezërit ju përshëndesin. Përshëndetni njëri-tjetrin me një puthje të shenjtë.
²¹ Këtë përshëndetje e shkrova me dorën time unë, Pali.
²² Nëse ndokush nuk e do Zotin, i mallkuar qoftë. Marana tha!
²³ Hiri i Zotit Jezus qoftë me ju.
²⁴ Dashuria ime në Krishtin Jezus qoftë me ju të gjithë.