kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^15
1 Tani, vëllezër, po ju njoh me ungjillin që ju kam predikuar, të cilin gjithashtu e keni marrë dhe në të cilin po qëndroni.
² Nëpërmjet po këtij ungjilli ju shpëtoheni, nëse i përmbaheni fjalës që ju kam predikuar. Përndryshe keni besuar më kot.
³ Sepse së pari e kam përçuar te ju atë që mora: Krishti vdiq për mëkatet tona sipas Shkrimeve,
⁴ Ai u varros, u ngjall ditën e tretë sipas Shkrimeve,
⁵ dhe iu shfaq Kefës, e pastaj të dymbëdhjetëve.
⁶ Pastaj Ai iu shfaq më shumë se pesëqind vëllezërve njëherësh, pjesa më e madhe e të cilëve janë edhe sot, por disa kanë vdekur.
⁷ Pas kësaj Ai iu shfaq Jakobit, dhe pastaj të gjithë apostujve;
⁸ dhe në fund nga të gjithë, m’u shfaq edhe mua, si një që ka lindur para kohe.
⁹ Sepse unë jam më i vogli i apostujve dhe nuk jam i denjë të quhem apostull, sepse kam përndjekur kishën e Perëndisë.
¹⁰ Por, me hirin e Perëndisë, jam ai që jam dhe hiri i Tij për mua nuk shkoi kot; madje jam munduar më shumë se ata të gjithë, megjithatë jo unë, por hiri i Perëndisë që ishte me mua.
¹¹ Pra, si unë ashtu edhe ata kështu predikojmë dhe ju kështu besuat.
¹² Tani, po të predikohet që Krishti u ngjall prej të vdekurve, atëherë si thonë disa midis jush se nuk ka ngjallje të të vdekurve?
¹³ Por, po të mos ketë ngjallje të të vdekurve, atëherë as Krishti nuk është ngjallur.
¹⁴ Dhe po të mos jetë ngjallur Krishti, atëherë predikimi ynë është i kotë dhe po ashtu i kotë është edhe besimi juaj.
¹⁵ Përveç kësaj, ne dalim edhe dëshmitarë të rremë të Perëndisë, sepse kemi dëshmuar për Perëndinë se Ai e ngjalli Jezusin. Por del që Ai nuk e ka ngjallur, nëse të vdekurit vërtet nuk ngjallen.
¹⁶ Sepse, nëse të vdekurit nuk ngjallen, as Krishti nuk është ngjallur
¹⁷ dhe po të mos jetë ngjallur Krishti, besimi juaj është i kotë; ju jeni ende në mëkatet tuaja.
¹⁸ Kështu, edhe ata që kanë vdekur në Krishtin, janë të humbur.
¹⁹ Pastaj në qoftë se kemi shpresuar në Krishtin vetëm në këtë jetë, jemi për t’u mëshiruar më shumë nga të gjithë njerëzit.
²⁰ Por tani Krishti është ngjallur nga të vdekurit, fryti i parë i atyre që kanë vdekur.
²¹ Sepse, meqë vdekja erdhi për shkak të një njeriu, edhe ngjallja e të vdekurve vjen nëpërmjet një njeriu.
²² Sepse, ashtu si të gjithë vdesin në Adamin, po kështu të gjithë do të marrin jetë në Krishtin.
²³ Por, secili sipas radhës së vet: Krishti, fryti i parë, pastaj, kur Ai të vijë, ata që i përkasin Krishtit.
²⁴ Pastaj vjen fundi, kur Ai do t’ia dorëzojë mbretërinë Perëndisë dhe Atit, pasi t’i ketë dhënë fund çdo sundimi, çdo pushteti dhe çdo fuqie.
²⁵ Sepse Ai duhet të mbretërojë, derisa t’i ketë vënë të gjithë armiqtë nën këmbët e Veta.
²⁶ Armiku i fundit që do të asgjësohet, është vdekja.
²⁷ Sepse, gjithçka e nënshtroi nën këmbët e Veta. Por kur thotë: "Gjithçka i nënshtrohet Atij", është e qartë se këtu nuk hyn Perëndia, i cili bëri që gjithçka t’i nënshtrohet Krishtit.
²⁸ Dhe kur gjithçka t’i jetë nënshtruar Atij, atëherë edhe Vetë Biri do t’i nënshtrohet Perëndisë, që bëri gjithçka t’i nënshtrohet Atij, që Perëndia të jetë gjithçka në gjithçka.
²⁹ Përndryshe, çfarë do të bëjnë ata që pagëzohen për të vdekurit? Nëse të vdekurit nuk ngjallen dot, përse atëherë pagëzohen për ta?
³⁰ Përse rrezikojmë veten edhe ne në çdo orë?
³¹ Unë vdes çdo ditë, dhe kjo është e vërtetë, o vëllezër, siç është edhe krenaria që kam për ju, të cilën e kam në Krishtin Jezus Zotin tonë.
³² Nëse u përlesha me bishat e egra në Efes thjesht si njeri, ku qëndron dobia? Nëse të vdekurit nuk ngjallen, le të hamë e të pimë, sepse nesër do të vdesim.
³³ Mos u mashtroni: "Shoqëritë e këqija i prishin zakonet e mira."
³⁴ Ejani në vete e silluni siç duhet. Mos mëkatoni; sepse disa nuk e njohin Perëndinë, dhe këtë e them për turpin tuaj.
³⁵ Por dikush do të thotë: "Si ngjallen të vdekurit? Me çfarë trupi vijnë ata?"
³⁶ I marrë! Ajo që ti mbjell, nuk del në jetë po të mos vdesë më parë.
³⁷ Kur mbjell, ti nuk mbjell trupin që do të bëhet, por një kokërr të zhveshur, qoftë kokërr gruri ose diçkaje tjetër.
³⁸ Por Perëndia i jep trup siç do Ai, dhe secilës farë i jep trupin e vet.
³⁹ Jo çdo mish është i të njëjtit lloj, por tjetër është mishi i njerëzve, tjetër mishi i kafshëve, tjetër mishi i zogjve dhe tjetër ai i peshqve.
⁴⁰ Ka trupa qiellorë dhe trupa tokësorë, por tjetër është lavdia e qiellorëve dhe tjetër ajo e tokësorëve.
⁴¹ Tjetër është lavdia e diellit, tjetër lavdia e hënës dhe tjetër është lavdia e yjeve; sepse ndryshon ylli nga ylli në lavdi.
⁴² Kështu ndodh edhe me ngjalljen e të vdekurve. Trupi që mbillet i kalbshëm, ngrihet i pakalbshëm;
⁴³ mbillet i çnderuar, ngrihet me lavdi; mbillet i dobët, ngrihet me fuqi;
⁴⁴ mbillet trup lëndor, ngrihet trup shpirtëror. Nëse ka trup lëndor, ka edhe shpirtëror.
⁴⁵ Kështu është shkruar: "Njeriu i parë, Adami, u bë një shpirt që jeton." Adami i fundit u bë një frymë që jep jetë.
⁴⁶ Megjithatë, e para nuk është ajo që është e frymës, por ajo e lëndës, pastaj vjen ajo e frymës.
⁴⁷ Njeriu i parë është prej dheu, tokësor; njeriu i dytë vjen prej qiellit.
⁴⁸ Siç ishte njeriu i dheut, po ashtu janë edhe ata të dheut dhe siç është njeriu i qiellit, po ashtu janë edhe ata të qiellit.
⁴⁹ Ashtu siç kemi mbajtur shëmbëllimin e njeriut të dheut, po ashtu do të mbajmë edhe shëmbëllimin e atij të qiellit.
⁵⁰ Këtë po them, vëllezër, se mishi dhe gjaku nuk mund të trashëgojnë mbretërinë e Perëndisë; as e kalbshmja nuk trashëgon të pakalbshmen.
⁵¹ Ja, po ju them një mister: nuk do të biem në gjumë të gjithë, por të gjithë do të shndërrohemi
⁵² në një çast, sa hap e mbyll sytë, në borinë e fundit. Sepse boria do të bjerë, të vdekurit do të ngjallen të pakalbshëm dhe ne do të shndërrohemi.
⁵³ Sepse ky trup që është i kalbshëm, duhet të vishet me atë që është e pakalbshme dhe ky trup i vdekshëm, duhet të vishet me pavdekësinë.
⁵⁴ Pastaj kur ky trup që është i kalbshëm, do të vishet me atë që është e pakalbshme dhe ky që është i vdekshëm, do të vishet me pavdekësinë, atëherë do të përmbushet thënia që është shkruar: "Vdekja u përpi në fitore."
⁵⁵ "Ku është, o vdekje, fitorja jote? Ku e ke, o vdekje, thumbin tënd?"
⁵⁶ Thumbi i vdekjes është mëkati dhe fuqia e mëkatit është ligji.
⁵⁷ I qofshim falë Perëndisë, që na jep fitoren nëpërmjet Zotit tonë Jezus Krishtit.
⁵⁸ Prandaj, vëllezërit e mi të dashur, të jeni të fortë, të patundur, gjithmonë duke ia përkushtuar veten plotësisht veprës së Zotit, sepse e dini se mundi juaj në Zotin nuk është i kotë.