kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^12
1 Sa për dhuntitë shpirtërore, vëllezër, nuk dua që ju të mos i dini.
² E dini se, kur ishit paganë, shkonit pas idhujve memecë, siç ju drejtonin.
³ Prandaj, po jua bëj të ditur se askush që flet nga Fryma e Perëndisë, nuk thotë: "Mallkuar qoftë Jezusi" dhe askush nuk mund të thotë: "Jezusi është Zot", po të mos jetë nga Fryma e Shenjtë.
⁴ Ka larmi dhuntish, por Fryma është një e vetme.
⁵ Ka larmi shërbesash, por vetëm një është Zoti.
⁶ Ka larmi veprimtarish, por Perëndia, që i bën të gjitha gjërat në gjithkënd, është një i vetëm.
⁷ Secilit i jepet shfaqja e Frymës për dobinë e përbashkët.
⁸ Sepse njërit i jepet fjala e mençurisë nëpërmjet Frymës dhe tjetrit fjala e dijes sipas së njëjtës Frymë;
⁹ një tjetri, besimi me anë të të njëjtës Frymë dhe një tjetri dhuntitë e shërimit me anë të po asaj Fryme,
¹⁰ dikujt, fuqia për mrekulli, një tjetri dhuntia e profecisë, një tjetri aftësia për të dalluar frymët, tjetrit larmia e gjuhëve dhe një tjetri interpretimi i gjuhëve.
¹¹ Por të gjitha këto i kryen e njëjta Frymë, duke ia shpërndarë secilit veçan, siç do vetë.
¹² Sepse të gjitha gjymtyrët e trupit, megjithëse janë shumë, përbëjnë një trup të vetëm dhe ashtu si trupi, që ka shumë gjymtyrë, është një, po ashtu është edhe Krishti.
¹³ Sepse ne të gjithë u pagëzuam nga një Frymë në një trup, qoftë judenj apo grekë, skllevër apo të lirë dhe të gjithëve na është dhënë të pimë në një Frymë të vetme.
¹⁴ Sepse trupi nuk përbëhet nga një por nga shumë gjymtyrë.
¹⁵ Sikur këmba të thotë: "Meqenëse nuk jam dorë, nuk jam pjesë e trupit", kjo nuk do të thotë se për këtë arsye ajo nuk është më pjesë e trupit.
¹⁶ Sikur veshi të thotë: "Meqenëse nuk jam sy, nuk jam pjesë e trupit", kjo nuk do të thotë se për këtë arsye ai nuk është më pjesë e trupit.
¹⁷ Po të ishte i tërë trupi sy, ku do të ishte dëgjimi? Po të ishte i tëri vesh, ku do të ishte të nuhaturit?
¹⁸ Por në fakt Perëndia i ka vënë gjymtyrët, secilën prej tyre, në një trup, ashtu siç deshi Ai.
¹⁹ Po të ishin të gjitha një gjymtyrë, ku do të ishte trupi?
²⁰ Përkundrazi, vërtet gjymtyrët janë shumë, por trupi është një i vetëm.
²¹ Syri nuk mund t’i thotë dorës: "Nuk ta kam nevojën"; as koka këmbëve: "Nuk jua kam nevojën."
²² Përkundrazi, gjymtyrët e trupit që duken më të dobëta, janë të domosdoshme,
²³ dhe atyre pjesëve të trupit që ne mendojmë se janë më pak të nderuara, atyre u bëjmë më shumë nderim. Gjymtyrët tona më pak të hijshme trajtohen me kujdes më të madh,
²⁴ ndërsa gjymtyrët tona të hijshme nuk kanë nevojë për gjë. Por Perëndia e ka ndërtuar trupin në mënyrë të atillë që t’u jepet më shumë nderim pjesëve që ky u mungon,
²⁵ që të mos kishte përçarje në trup, por që gjymtyrët të kishin të njëjtin kujdes për njëra-tjetrën.
²⁶ Nëse një gjymtyrë vuan, të gjitha gjymtyrët vuajnë bashkë me të; nëse një gjymtyrë merr lavdi, të gjitha gjymtyrët gëzojnë bashkë me të.
²⁷ Tani ju jeni trupi i Krishtit dhe secili prej jush është gjymtyrë e tij.
²⁸ Perëndia ka caktuar në kishë, së pari apostuj, së dyti profetë, së treti mësues, pastaj ata që bëjnë mrekulli, pastaj ata që kanë dhunti për të shëruar, për të ndihmuar, për të qeverisur, ata që flasin lloje të ndryshme gjuhësh.
²⁹ Mos janë të gjithë apostuj? Mos janë të gjithë profetë? Mos janë të gjithë mësues? Mos vallë të gjithë bëjnë mrekulli?
³⁰ Mos kanë të gjithë dhunti shërimi? Mos flasin të gjithë gjuhë të ndryshme? Mos janë të gjithë interpretues?
³¹ Por kërkoni me zell dhuntitë më të mëdha. Dhe unë do t’ju tregoj një rrugë edhe më të përkryer.