kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^11
1 Ndiqni shembullin tim, siç ndjek edhe unë shembullin e Krishtit.
² Ju lëvdoj, sepse më kujtuat për çdo gjë dhe u përmbaheni udhëzimeve siç jua përcolla unë.
³ Dua që ju ta dini se koka e çdo burri është Krishti, koka e gruas është burri dhe koka e Krishtit është Perëndia.
⁴ Çdo burrë që, kur lutet ose profetizon, e mban kokën të mbuluar, turpëron kryet e vet.
⁵ Por, çdo grua që lutet ose profetizon me kokën të zbuluar, turpëron kryet e vet; sepse është njësoj si ta kishte kokën të rruar.
⁶ Sepse, në qoftë se gruaja nuk e mbulon kokën, le ta qethë; por, meqë për gruan është turp të qethet apo të rruhet, atëherë le ta mbulojë kokën.
⁷ Sepse burri nuk duhet ta mbulojë kokën, meqë ai është shëmbëlltyra dhe lavdia e Perëndisë; kurse gruaja është lavdia e burrit.
⁸ Sepse nuk vjen burri prej gruas, por gruaja prej burrit.
⁹ As nuk u krijua burri për gruan, por gruaja për burrin.
¹⁰ Prandaj gruaja, për shkak të engjëjve, duhet të mbajë mbi kokë një shenjë të vartësisë së saj.
¹¹ Megjithatë, në Zotin, nuk ka as grua të pavarur nga burri, as burrë të pavarur nga gruaja.
¹² Sepse, siç erdhi gruaja nga burri, po ashtu edhe burri lind nëpërmjet gruas; por të gjitha gjërat vijnë nga Perëndia.
¹³ Gjykoni vetë: a është e përshtatshme për një grua t’i lutet Perëndisë me kokën të zbuluar?
¹⁴ A nuk ju mëson natyra vetë se po të mbajë burri flokë të gjatë, çnderon veten e vet,
¹⁵ por po të mbajë gruaja flokë të gjatë, është lavdi për të? Sepse flokët e gjatë i janë dhënë si mbulojë.
¹⁶ Por, nëse ndokush mendon të grindet për këtë, ne nuk e kemi një zakon të tillë, as kishat e Perëndisë.
¹⁷ Ndërsa ju jap këtë porosi, nuk mund t’ju lëvdoj, sepse mbledhjet tuaja nuk bëhen për mirë, por për keq.
¹⁸ Sepse, së pari, dëgjoj se, kur mblidheni si kishë, midis jush ka përçarje dhe, deri diku, këtë e besoj.
¹⁹ Pa dyshim që midis jush duhet të ketë ndarje, që të dalin në pah besimtarët e vërtetë midis jush.
²⁰ Pra, kur mblidheni së bashku, këtë nuk e bëni për të ngrënë darkën e Zotit,
²¹ sepse gjatë ngrënies secili nxiton të hajë darkën e vet pa pritur të tjerët; njëri ka uri dhe tjetri dehet.
²² A nuk keni shtëpitë tuaja që të hani e të pini? Apo përbuzni kishën e Perëndisë dhe i bëni me turp ata që nuk kanë? Çfarë t’ju them? T’ju lëvdoj? Për këtë nuk ju lëvdoj.
²³ Sepse unë kam marrë nga Zoti atë që jua dhashë juve: Zoti Jezus, në natën që u tradhtua, mori bukën
²⁴ dhe, si falënderoi, e theu dhe tha: "Ky është trupi Im, i cili është për ju; bëjeni këtë për të më kujtuar Mua."
²⁵ Po ashtu, pas darkës, mori edhe kupën dhe tha: "Kjo kupë është besëlidhja e re në gjakun Tim; bëjeni këtë, sa herë që të pini prej saj, për të më kujtuar Mua."
²⁶ Sepse sa herë që të hani nga kjo bukë dhe të pini nga kjo kupë, shpallni vdekjen e Zotit derisa Ai të vijë.
²⁷ Prandaj, kushdo që të hajë bukën ose të pijë kupën e Zotit në mënyrë të padenjë, do të jetë fajtor për mëkat kundër trupit dhe gjakut të Zotit.
²⁸ Por, le ta shqyrtojë më parë njeriu veten e vet dhe pastaj le të hajë nga kjo bukë dhe të pijë nga kjo kupë.
²⁹ Sepse ai që ha dhe pi, pa e njohur trupin e Zotit, ha dhe pi dënimin për veten e vet.
³⁰ Prandaj, ka shumë midis jush që janë të dobët dhe të sëmurë dhe një numër i mirë kanë rënë në gjumë.
³¹ Por, po ta gjykonim drejt veten tonë, nuk do të gjykoheshim.
³² Pastaj, kur gjykohemi, Zoti na qorton si të sillemi që të mos dënohemi bashkë me botën.
³³ Kështu, o vëllezërit e mi, kur mblidheni për të ngrënë, prisni njëri-tjetrin.
³⁴ Nëse dikush ka uri, le të hajë më parë në shtëpi, që të mos mblidheni për dënimin tuaj. Gjërat e tjera do t’i rregulloj kur të vij.