kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^10
1 Sepse nuk dua që ju të mos e dini, vëllezër, se etërit tanë ishin të gjithë nën renë dhe të gjithë kaluan detin.
² Të gjithë u pagëzuan në Moisiun, në re dhe në det,
³ dhe të gjithë hëngrën të njëjtin ushqim shpirtëror.
⁴ Të gjithë pinë të njëjtën pije shpirtërore, sepse pinin nga një shkëmb shpirtëror që i ndiqte pas; dhe ai shkëmb ishte Krishti.
⁵ Por me shumicën e tyre Perëndia nuk ishte i kënaqur; prandaj ata u hallakatën nëpër shkretëtirë.
⁶ Këto u bënë shembull për ne, që të mos lakmojmë gjëra të këqija, siç bënë ata.
⁷ Mos u bëni idhujtarë, si disa prej tyre; siç është shkruar: "Populli u ul të hajë e të pijë dhe njërëzit u lëshuan në dëfrime."
⁸ As të mos kryejmë veprime të përdala, siç bënë disa prej tyre dhe njëzet e tre mijë ranë të vdekur në një ditë.
⁹ As të mos e vëmë në provë Krishtin, siç bënë disa prej tyre dhe u zhdukën nga gjarpërinjtë.
¹⁰ As mos u ankoni, siç u ankuan disa dhe u zhdukën nga engjëlli shfarosës.
¹¹ Këto u ndodhnin atyre që të bëheshin shembull dhe u shkruan për të na paralajmëruar ne, për të cilët ka arritur fundi i kohëve.
¹² Prandaj ai që mendon se qëndron më këmbë, të ketë mendjen se mos bjerë.
¹³ Asnjë tundim tjetër nuk ju ka pushtuar veç atij njerëzor; Perëndia është besnik dhe nuk do të lejojë që të tundoheni përtej fuqive tuaja, por me tundimin do t’ju sigurojë edhe rrugëdaljen, që të mund ta duroni.
¹⁴ Prandaj, të dashurit e mi, largohuni nga idhujtaria.
¹⁵ Po flas me ju si me njerëz të mençur; gjykojeni ju vetë atë që them.
¹⁶ A nuk është kupa e bekimit, që ne bekojmë, pjesëmarrje në gjakun e Krishtit? Po buka që ne thyejmë, a nuk është pjesëmarrje në trupin e Krishtit?
¹⁷ Sepse, një bukë është dhe ne, që jemi shumë, jemi një trup; sepse të gjithë marrim pjesë në të vetmen bukë.
¹⁸ Shikoni kombin e Izraelit që jeton sipas mishit; a nuk janë pjesëmarrës në altar ata që hanë flijimet?
¹⁹ Mos vallë dua të them se flijimi për idhujt është diçka, apo që idhulli është diçka?
²⁰ Jo, por po them se flijimet që bëjnë paganët, u ofrohen demonëve dhe jo Perëndisë; nuk dua që ju të bëni pjesë me demonët.
²¹ Nuk mund të pini edhe kupën e Zotit edhe kupën e demonëve; nuk mund të merrni pjesë edhe në tryezën e Zotit edhe në tryezën e demonëve.
²² Apo dashkemi të nxisim xhelozinë e Zotit? Mos jemi më të fortë se Ai?
²³ Gjithçka është e ligjshme, por jo gjithçka është me dobi. Gjithçka është e ligjshme, por jo gjithçka shërben për të ndërtuar.
²⁴ Askush të mos kërkojë të mirën e vet, por të mirën e tjetrit.
²⁵ Hani çdo gjë që shitet në dyqanin e mishit, pa bërë pyetje për hir të ndërgjegjes.
²⁶ Sepse toka dhe gjithçka që ajo ka, janë të Zotit.
²⁷ Nëse ndonjë nga ata që nuk janë besimtarë ju thërret dhe ju doni të shkoni, hani çdo gjë që ju vënë përpara, pa bërë pyetje për hir të ndërgjegjes.
²⁸ Por po t’ju thotë dikush: "Ky është flijuar për idhujt", mos e hani, si për hir të atij që jua tregoi, ashtu edhe për hir të ndërgjegjes.
²⁹ Nuk e kam fjalën për ndërgjegjen tënde, por për atë të tjetrit; sepse për ç’arsye kjo liria ime duhet t’i nënshtrohet gjykimit të ndërgjegjes së dikujt tjetër?
³⁰ Nëse unë marr pjesë në tryezë duke falënderuar, përse shahem për çka i shpreh mirënjohje Perëndisë?
³¹ Pra, nëse hani, pini ose çfarëdo që të bëni, gjithçka bëjeni për lavdinë e Perëndisë.
³² Mos u bëni fyes ndaj judenjve, ndaj grekëve dhe ndaj kishës së Perëndisë,
³³ ashtu si edhe unë që përpiqem t’u pëlqej të gjithëve në gjithçka, pa kërkuar përfitimin tim, por atë të shumë njerëzve, që të shpëtohen,