kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

1 Korintasve

^1
1 Pali, i thirrur për të qenë apostull i Krishtit Jezus me vullnetin e Perëndisë, dhe vëllai ynë Sosten,
² kishës së Perëndisë që është në Korint, të shenjtëruarve në Krishtin Jezus, të thirrur për të qenë shenjtër, bashkë me të gjithë ata që thërresin në çdo vend emrin e Zotit tonë Jezus Krisht, Zot i tyre dhe yni.
³ Paçi hir dhe paqe nga Perëndia Ati ynë dhe Zoti Jezus Krisht.
⁴ Falënderoj Perëndinë tim gjithmonë për ju, për hirin e Perëndisë që ju është dhënë në Krishtin Jezus.
⁵ Sepse në Krishtin u pasuruat me të gjitha dhuntitë, ato të fjalës dhe të dijes,
⁶ sikurse u vërtetua te ju dëshmia jonë për Krishtin,
⁷ që të mos ju mungonte asnjë dhunti, ndërsa prisni zbulesën e Zotit tonë Jezus Krisht.
⁸ Ai do t’ju përforcojë deri në fund, që të jeni të paqortueshëm në ditën e Zotit tonë Jezus [Krisht].
⁹ Perëndia është besnik; nëpërmjet Tij jeni thirrur në shoqërimin e Birit të Tij, Jezus Krishtit, Zotit tonë.
¹⁰ Tani, o vëllezër, ju bëj thirrje në emër të Zotit tonë Jezus Krisht, që të jeni të gjithë në një fjalë, që midis jush të mos ketë përçarje dhe të jeni plotësisht të bashkuar duke qenë në një mendje dhe duke pasur të njëjtat qëllime.
¹¹ Sepse njerëzit e Kloes, më kanë vënë në dijeni, o vëllezërit e mi, për grindjet që keni me njëri-tjetrin.
¹² Dua të them këtë, që secili prej jush po thotë: "Unë jam i Palit", "Unë i Apolonit", "Unë i Kefës" dhe "Unë i Krishtit."
¹³ A është i ndarë Krishti? Mos u kryqëzua për ju Pali, apo mos u pagëzuat në emër të Palit?
¹⁴ Falënderoj Perëndinë që nuk pagëzova asnjë prej jush, veç Krispit dhe Gait,
¹⁵ që asnjë të mos thotë se u pagëzua në emrin tim.
¹⁶ Unë pagëzova edhe ata të shtëpisë së Stefanait; veç tyre nuk di të kem pagëzuar ndonjë tjetër.
¹⁷ Sepse Krishti nuk më ka dërguar për të pagëzuar, por për të predikuar ungjillin, por jo me fjalë të diturisë së njerëzve, që të mos shkojë kot kryqi i Krishtit.
¹⁸ Sepse fjala e kryqit për ata që humbasin është marrëzi, por për ne që shpëtohemi është fuqi e Perëndisë.
¹⁹ Sepse është shkruar: "Do ta shkatërroj mençurinë e të mençurve dhe do ta hedh poshtë zgjuarsinë e të zgjuarve."
²⁰ Ku është i mençuri? Ku është skribi? Ku është mendimtari i kësaj epoke? A nuk e ktheu në marrëzi Perëndia mençurinë e kësaj bote?
²¹ Sepse meqë, bota në mençurinë e Perëndisë nuk e njohu Perëndinë me anë të mençurinë së saj, Perëndisë i pëlqeu që nëpërmjet marrëzisë së asaj që u predikua të shpëtonte ata që besojnë.
²² Sepse judenjtë kërkojnë shenja dhe grekët kërkojnë mençuri,
²³ por ne predikojmë Krishtin e kryqëzuar, që është shkandull për judenjtë dhe marrëzi për kombet,
²⁴ por atyre që janë thirrur, si judenjve ashtu edhe grekëve, u predikojmë Krishtin, si fuqi e Perëndisë dhe mençuri e Perëndisë.
²⁵ Sepse ajo që është marrëzi e Perëndisë, është më e mençur se njerëzit dhe ajo që është dobësi e Perëndisë, është më e fortë se njerëzit.
²⁶ Sepse, mendoni, o vëllezër, si ishit kur u thirrët; nuk kishte ndër ju shumë të mençur sipas mishit, nuk kishte shumë të fuqishëm, nuk kishte shumë fisnikë,
²⁷ por Perëndia ka zgjedhur marrëzitë e botës për të turpëruar të mençurit; Perëndia ka zgjedhur çka është e dobët në botë për të turpëruar të fortët.
²⁸ Perëndia ka zgjedhur gjërat e ulëta të botës dhe të përbuzurat – gjërat që nuk janë – që të zhdukë ato që janë,
²⁹ që asnjë njeri të mos mburret përpara Perëndisë.
³⁰ Por prej Tij ju jeni në Krishtin Jezus, të cilin Perëndia na e bëri mençuri, drejtësi, shenjtërim dhe shpengim,
³¹ sepse, siç është shkruar: "Ai që krenohet, le të krenohet në Zotin."