kap 1
kap 2
kap 3
kap 4

Kolosianeve

^4
1 Ju zotërinj, u siguroni drejtësi dhe barazi shërbëtorëve tuaj, duke ditur që edhe ju keni një Zot në qiell.
² T’i përkushtoheni lutjes, duke qenë syçelë në të dhe mirënjohës.
³ Në të njëjtën kohë lutuni edhe për ne, që Perëndia të na hapë një derë për fjalën, që të shpallim misterin e Krishtit, për të cilin gjendem i burgosur.
⁴ Lutuni që ta paraqes atë qartë ashtu siç duhet ta predikoj.
⁵ Silluni me mençuri ndaj atyre që janë jashtë, duke shfrytëzuar çdo rast.
⁶ Fjala juaj të jetë gjithmonë plot hir, e rregulluar me kripë, që të dini si duhet t’i përgjigjeni gjithësecilit.
⁷ Për sa më takon mua, të gjitha do t’jua bëjë të njohura Tikiku, vëllai i dashur, shërbyesi besnik dhe bashkëshërbëtori në Zotin,
⁸ të cilin jua kam dërguar pikërisht për këtë, që t’i dini rrethanat tona dhe që t’ju japë zemër.
⁹ Ai po vjen bashkë me Onesimin, vëllanë besnik dhe të dashur, i cili është nga tuajt. Ata do t’ju njoftojnë për të gjitha punët e këtushme.
¹⁰ Ju përshëndet Aristarku, i burgosur bashkë me mua, dhe Marku, kushëriri i Barnabës (për të cilin keni marrë porosi; po të vijë tek ju, mirëpriteni),
¹¹ si edhe Jezusi, që quhet Just. Këta janë të vetmit nga rrethprerja që më ndihmuan për mbretërinë e Perëndisë, dhe që kanë qenë ngushëllim për mua.
¹² Ju përshëndet Epafra, që është nga tuajt, shërbëtor i Krishtit [Jezus], që mundohet gjithmonë për ju në lutjet e veta, që ju të qëndroni të përkryer dhe plotësisht të bindur ndaj gjithë vullnetit të Perëndisë.
¹³ Po dëshmoj për të se ai po mundohet shumë për ju, për ata në Laodiki dhe për ata në Hierapolis.
¹⁴ Ju përshëndet Lluka, mjeku i dashur, si edhe Dema.
¹⁵ Përshëndetini vëllezërit që janë në Laodiki, Nimfën si edhe kishën që mblidhet në shtëpinë e saj.
¹⁶ Dhe kur të lexohet kjo letër midis jush, kujdesuni që të lexohet edhe në kishën e laodikianëve. Edhe ju po ashtu ta lexoni letrën nga Laodikia.
¹⁷ I thoni Arkipit: "Shiko që ta plotësosh shërbesën që ke marrë në Zotin."
¹⁸ Përshëndetja u shkrua me dorën time, të Palit. Kujtoni burgimin tim. Hiri qoftë me ju.