kap 1
kap 2
kap 3
kap 4

Kolosianeve

^3
1 Pra, nëse jeni ngjallur bashkë me Krishtin, kërkoni gjërat lart, aty ku është Krishti, i ulur në të djathtën e Perëndisë.
² Mendoni për gjërat lart, jo për gjërat mbi tokë.
³ Sepse ju keni vdekur dhe jeta juaj tani është fshehur bashkë me Krishtin te Perëndia.
⁴ Kur të shfaqet Krishti, që është jeta juaj, atëherë edhe ju do të shfaqeni bashkë me Të në lavdi.
⁵ Prandaj bëjini të vdekura gjymtyrët tuaja që janë mbi tokë: imoralitetin, ndyrësinë, pasionin, dëshirën e keqe dhe lakminë, që është idhujtari.
⁶ Të gjitha këto gjëra sjellin zemërimin e Perëndisë (mbi bijtë e mosbindjes).
⁷ Edhe ju dikur kështu jetonit, të zhytur në këto vese.
⁸ Por tani edhe ju lërini mënjanë të gjitha këto, zemërimin, mërinë, ligësinë, sharjen, fjalët e ndyra nga goja juaj.
⁹ Mos gënjeni njëri-tjetrin, sepse ju keni zhveshur njeriun e vjetër bashkë me veprimet e tij
¹⁰ dhe keni veshur të riun që ripërtërihet me një njohje të vërtetë sipas shëmbëllesës së Atij që e krijoi atë,
¹¹ ku nuk ka as grek as jude, as të rrethprerë as të parrethprerë, barbar, skit, skllav ose të lirë, por Krishti është gjithçka e në të gjithë.
¹² Vishuni pra, si të zgjedhur të Perëndisë, të shenjtë dhe të dashur, me zemërdhembshuri, me mirësi, përvujtëri, butësi, zemërgjerësi dhe durim,
¹³ duke e duruar dhe duke e falur njëri-tjetrin, në paçi ndonjë ankesë kundër njëri-tjetrit. Siç ju fali Zoti, ashtu të bëni edhe ju.
¹⁴ Pastaj mbi të gjitha këto, vishuni me dashurinë që i bashkon ato në një lidhje të përsosur.
¹⁵ Le të sundojë paqja e Krishtit në zemrat tuaja, për të cilën edhe u thirrët në një trup; të jeni mirënjohës.
¹⁶ Le të banojë begatshëm fjala e Krishtit midis jush, duke e mësuar dhe këshilluar me çdo mençuri njëri-tjetrin, duke i kënduar Perëndisë me psalme, himne dhe këngë të përshpirtshme me mirënjohje në zemrat tuaja.
¹⁷ Çfarëdo që të bëni, me fjalë ose me vepra, bëjeni në emër të Zotit Jezus, duke e falënderuar nëpërmjet Tij Perëndinë Atë.
¹⁸ Gra, t’i nënshtroheni burrave tuaj, siç ka hije në Zotin.
¹⁹ Burra, duajini gratë tuaja dhe mos jini të vrazhdë ndaj tyre.
²⁰ Fëmijë, bindjuni prindërve tuaj në gjithçka, sepse kjo i pëlqen Zotit.
²¹ Etër, mos i acaroni fëmijët tuaj, që të mos u ligështohet zemra.
²² Shërbëtorë, bindjuni në gjithçka zotërinjve tuaj sipas mishit, jo me shërbime sa për t’u dukur, si ata që kënaqin njerëzit, por me thjeshtësinë e zemrës, duke pasur frikë Zotin.
²³ Çfarëdo që të bëni, ta kryeni me gjithë zemër, si për Zotin dhe jo për njerëzit,
²⁴ duke e ditur se nga Zoti do të merrni shpërblimin e trashëgimisë. Është Zoti Krisht Ai të cilit po i shërbeni.
²⁵ Sepse ai që bën paudhësira, do të vuajë pasojat e paudhësive që ka bërë pavarësisht se kush është.