kap 1
kap 2
kap 3
kap 4

Kolosianeve

^2
1 Sepse dua që ta dini se ç’luftë të madhe po bëj për ju, për ata në Laodiki dhe për të gjithë ata që nuk më kanë parë mua vetë,
² që të marrin zemër e të lidhen së bashku në dashuri, që të kenë gjithë pasurinë që i lejon ta kuptojnë plotësisht, për të njohur kështu misterin e Perëndisë, domethënë Krishtit,
³ në të cilin janë të fshehura të gjitha thesaret e mençurisë dhe të dijes.
⁴ E them këtë që askush të mos ju mashtrojë me fjalime joshëse.
⁵ Edhe pse me trup nuk jam aty, megjithatë jam bashkë me ju në frymë dhe gëzohem kur shoh sa të rregullt jeni dhe sa i qëndrueshëm është besimi juaj në Krishtin.
⁶ Prandaj, siç e pranuat Krishtin Jezus si Zot, ashtu të ecni në Atë,
⁷ të rrënjosur fort e të ndërtuar në Të, të forcuar në besim, ashtu siç ju kanë mësuar, duke qenë plot mirënjohje.
⁸ Hapni sytë se mos ju zë dikush rob me anë të filozofisë dhe mashtrimeve të kota, që mbështeten në traditën e njerëzve dhe në parimet themelore të botës dhe jo në Krishtin.
⁹ Sepse në Të banon trupërisht e gjithë plotësia e Hyjnisë,
¹⁰ dhe në Të juve ju është dhënë plotësia e Tij, e Atij që është kreu i çdo sundimi dhe pushteti.
¹¹ Tek Ai morët rrethprerjen, jo me rrethprerje të kryer nga duar njerëzish, duke hequr mish nga trupi ynë, por me anë të rrethprerjes së bërë nga Krishti,
¹² duke u varrosur bashkë me Të në pagëzim, në të cilin ju gjithashtu u ngjallët bashkë me Të nëpërmjet besimit në fuqinë e Perëndisë, që e ngjalli Atë nga të vdekurit.
¹³ Kur ishit të vdekur në shkeljet tuaja dhe në parrethprerjen e mishit tuaj, Perëndia ju bëri të gjallë bashkë me Krishtin. Ai na i fali të gjitha shkeljet,
¹⁴ duke e fshirë dokumentin që ishte kundër nesh bashkë me urdhërimet që ishin në dëmin tonë; Ai e zhduku fare, duke e gozhduar në kryq.
¹⁵ Pasi i zhveshi nga armët sunduesit dhe autoritetet, Ai i nxori hapur në shesh, duke ngadhënjyer mbi ta në Kryq.
¹⁶ Prandaj askush të mos ju gjykojë për ato që hani e pini, apo për festën, hënën e re ose të shtunat,
¹⁷ të cilat janë hije e atyre që do të vijnë, kurse realiteti është në Krishtin.
¹⁸ Askush të mos ju mashtrojë e t’ju marrë shpërblimin, duke u zbavitur me përvujtëri të rreme dhe me adhurim engjëjsh, duke u marrë me vegime vetjake, duke u krekosur më kot me mendjen e tij të mishit,
¹⁹ duke humbur lidhjen me kokën, prej nga i gjithë trupi, që qëndron dhe lidhet bashkë nga nyjat dhe lidhëset, rritet siç e bën të rritet Perëndia.
²⁰ Përderisa vdiqët bashkë me Krishtin për të qenë të vdekur për parimet themelore të botës, përse atëherë veproni sikur të jetonit në botë, duke iu nënshtruar urdhërimeve si,
²¹ "Mos e merr këtë, mos e shijo atë, mos prek atë"?
²² Këto u përkasin gjërave që prishen nga përdorimi, sepse mbështeten në urdhëresa dhe mësime njerëzish.
²³ Këto vërtet kanë një pamje mençurie, me një lloj fetarie të vetëdëshiruar, me përvujtëri të rreme dhe trajtim të ashpër të trupit, por në të vërtetë nuk vlejnë për të përmbajtur kënaqësitë e mishit.