kap 1
kap 2
kap 3
kap 4

Kolosianeve

^1
1 Pali, apostull i Krishtit Jezus me vullnetin e Perëndisë, dhe Timoteu vëllai ynë,
² shenjtërve dhe vëllezërve besnikë në Krishtin në Kolosë: Hir dhe paqe nga Perëndia Ati ynë.
³ Falënderojmë Perëndinë, Atin e Zotit tonë Jezus Krisht, duke u lutur gjithmonë për ju,
⁴ pasi dëgjuam për besimin tuaj në Krishtin Jezus dhe për dashurinë që ju keni për të gjithë shenjtërit,
⁵ për shkak të shpresës që është ruajtur për ju në qiej, për të cilën keni dëgjuar më parë në fjalën e së vërtetës, në ungjillin,
⁶ që ka ardhur te ju. Ashtu si në gjithë botën ky ungjill po jep fryt e po rritet edhe tek ju, që nga dita që ju e dëgjuat dhe e morët vesh hirin e Perëndisë në vërtetësi.
⁷ Ju e mësuat nga Epafra, bashkëshërbëtori ynë i dashur, i cili është shërbëtor besnik i Krishtit për ju,
⁸ i cili edhe na e bëri të qartë dashurinë tuaj në Frymë.
⁹ Prandaj edhe ne, që nga dita që e dëgjuam, nuk kemi pushuar së luturi për ju duke kërkuar që ju të mbusheni me njohjen e vullnetit të Tij me çdo mençuri dhe zgjuarsi shpirtërore,
¹⁰ që ju të mund të jetoni në mënyrë të denjë për Zotin, për ta kënaqur në gjithçka, duke dhënë fryt në çdo vepër të mirë dhe duke u rritur në njohjen e Perëndisë,
¹¹ duke u forcuar me çdo fuqi, sipas pushtetit të lavdisë së Tij, që të ngulmoni e të keni durim të madh,
¹² duke falënderuar me gëzim Atin, që ju ka bërë të mundur të merrni pjesë në trashëgimin e shenjtërve në mbretërinë e dritës.
¹³ Ai na ka shpëtuar nga pushteti i errësirës dhe na ka sjellë në mbretërinë e Birit të Vet të dashur,
¹⁴ në të cilin ne kemi shpengim, domethënë faljen e mëkateve.
¹⁵ Ai është shëmbëllesa e Perëndisë së padukshëm, i parëlinduri i gjithë krijimit.
¹⁶ Sepse prej Tij u krijuan të gjitha gjërat, si në qiej edhe mbi tokë, të dukshmet dhe të padukshmet, qofshin frone, zotërime, principata, a pushtete, të gjitha gjërat u krijuan prej Tij dhe për Të.
¹⁷ Ai është përpara gjithçkaje dhe gjithçka qëndron e bashkuar në Të.
¹⁸ Ai është gjithashtu koka e trupit, domethënë e kishës; Ai është fillimi, i parëlinduri i atyre që ngjallen nga të vdekurit, që Ai Vetë të zërë vendin e parë në gjithçka.
¹⁹ Sepse Atit i pëlqeu që në Të të banojë e gjithë plotësia e Tij
²⁰ dhe nëpërmjet Tij të pajtojë me Veten e Vet të gjitha gjërat mbi tokë, dhe ato në qiej, duke bërë paqe me anë të gjakut që Ai derdhi në kryq, [nëpërmjet Tij].
²¹ Megjithëse edhe ju dikur ishit kthyer në të huaj dhe armiq me mendje duke bërë punë të liga,
²² por tani Ai ju ka pajtuar në trupin e Vet prej mishi nëpërmjet vdekjes, për t’ju paraqitur para Tij të shenjtë, pa të meta dhe pa të sharë,
²³ nëse vërtet vazhdoni në besim të ngritur mbi themele dhe të patundur, duke mos luajtur nga shpresa e ungjillit që keni dëgjuar, ungjillit që i është shpallur të gjithë krijimit nën qiell dhe për të cilin unë, Pali, u bëra shërbyes.
²⁴ Tani gëzohem me vuajtjet e mia për ju dhe i plotësoj në mishin tim ato që u mungojnë vuajtjeve të Krishtit, për hir të trupit të Tij, që është kisha.
²⁵ Për këtë jam bërë shërbyes sipas misionit që më ka besuar Perëndia, që t’ju predikoj në mënyrë të plotë fjalën e Perëndisë,
²⁶ misterin që ka qenë fshehur për shekuj dhe breza të tërë, por që tani u është shfaqur shenjtërve të Tij.
²⁷ Këtyre Perëndia deshi t’u bënte të njohur ndër kombet sa e madhe është pasuria e lavdisë së këtij misteri, që është Krishti në ju, shpresa e lavdisë.
²⁸ Atë po shpallim ne, duke paralajmëruar çdo njeri dhe duke mësuar gjithkënd me çdo mençuri, për ta bërë secilin të përkryer në Krishtin.
²⁹ Për këtë edhe po mundohem, duke u përpjekur me gjithë energjinë e Tij, që vepron fuqishëm tek unë.