kap 1
kap 2
kap 3
kap 4
kap 5

Jakobi

^4
1 Nga vijnë luftërat dhe nga vijnë grindjet midis jush? A nuk vijnë prej dëshirave tuaja që bëjnë luftë në gjymtyrët tuaja?
² E lakmoni diçka, por nuk e merrni; vrisni dhe keni smirë, por nuk mund ta arrini atë që kërkoni; ziheni dhe bëni luftë; nuk keni, sepse nuk kërkoni.
³ Kërkoni por nuk merrni, sepse kërkoni me motive të këqija, që t’i shpenzoni ndër qejfe.
⁴ Ju, o njerëz që shkelni kurorën, a nuk e dini se miqësia me botën është armiqësi me Perëndinë? Prandaj, kushdo që dëshiron të jetë mik me botën, do të kthehet në armik me Perëndinë.
⁵ Apo mendoni se Shkrimi thotë më kot: "Frymën që Ai futi të banojë ndër ne, e lakmon deri në smirë"?
⁶ Por Ai na jep një hir edhe më të madh. Prandaj thotë: "Perëndia është kundër atyre që krekosen, por u jep hir të përvuajturve."
⁷ Prandaj nënshtrojuni Perëndisë. Kundërshtojeni djallin dhe ai do të ikë prej jush.
⁸ Afrojuni te Perëndia dhe Ai do t’ju afrohet juve. Pastrojini duart, o mëkatarë. Të kthjellëta bëjini zemrat tuaja, o njerëz me dy mendje.
⁹ Vajtoni, mbani zi dhe qani. Le t’ju kthehet e qeshura në vajtim dhe gëzimi në trishtim.
¹⁰ Përuluni përpara Zotit dhe Ai do t’ju lartësojë.
¹¹ Vëllezër, mos përgojoni njëri-tjetrin. Ai që flet kundër vëllait apo gjykon vëllanë e vet, flet kundër ligjit dhe gjykon ligjin. Por nëse gjykoni ligjin, nuk jeni zbatues të ligjit, por gjykatës.
¹² Ka vetëm një Ligjvënës dhe Gjykatës, Ai që mund të shpëtojë dhe të shkatërrojë. Por kush je ti që gjykon të afërmin tënd?
¹³ Dëgjoni tani pra, ju që thoni: "Sot ose nesër, do të shkojmë në atë qytet, do të kalojmë atje një vit, do të merremi me tregti e do të bëjmë fitime."
¹⁴ Ju nuk e dini ç’sjell e nesërmja e si do të jetë jeta juaj. Sepse jeni si avulli që shfaqet për pak kohë dhe pastaj zhduket.
¹⁵ Në vend të kësaj ju duhet të thoni: "Po të dojë Zoti, do të jetojmë dhe do të bëjmë këtë apo atë."
¹⁶ Por tani ju mburreni e krekoseni. E gjithë kjo mburrje është punë e ligë.
¹⁷ Prandaj, kushdo që e di të mirën që duhet ta bëjë dhe nuk e bën, mëkaton.