kap 1
kap 2
kap 3
kap 4
kap 5

Jakobi

^3
1 Mos u bëni shumë prej jush mësues, vëllezërit e mi, sepse e dini që ne, mësuesit, do të marrim gjykim më të ashpër.
² Sepse ne të gjithë gabojmë në shumë gjëra. Nëse dikush nuk gabon kurrë në fjalë, ky është njeri i përkryer, në gjendje ta mbajë nën fre edhe tërë trupin.
³ Nëse u vëmë kuajve gojëz që të na binden, atëherë ne mund ta drejtojmë edhe tërë trupin e tyre.
⁴ Ose merrni si shembull anijet, megjithëse janë shumë të mëdha dhe shtyhen nga erëra të forta, përsëri drejtohen nga një timon shumë i vogël atje ku e do timonieri.
⁵ Po kështu edhe gjuha është një pjesë e vogël e trupit dhe megjithatë mburret për gjëra të mëdha. Ja, një shkëndijë e vogël ndez një pyll të madh!
⁶ Gjuha është zjarr, botë ligësie. Gjuha është vendosur ndër gjymtyrët tona: ajo ndot tërë trupin, i vë zjarrin ecurisë së jetës dhe vetë merr flakë nga ferri.
⁷ Sepse të gjitha llojet e kafshëve e të shpendëve, zvarranikëve e kafshëve të detit, zbuten dhe janë zbutur nga raca njerëzore.
⁸ Por askush prej njerëzve nuk mund të zbutë gjuhën. Është një e keqe e papërmbajtshme, plot me helm vdekjeprurës.
⁹ Me të bekojmë Zotin dhe Atin; me të ne mallkojmë njerëzit që janë bërë sipas shëmbëllimit të Perëndisë.
¹⁰ Nga e njëjta gojë del lëvdimi dhe mallkimi. Këto gjëra, o vëllezërit e mi, nuk duhet të jenë kështu.
¹¹ Mos vallë prej të njëjtët burim del edhe ujë i ëmbël edhe i hidhur?
¹² Mos vallë pema e fikut, o vëllezërit e mi, mund të bëjë ullinj, ose hardhia të bëjë fiq? As burimi i kripur nuk mund të nxjerrë ujë të ëmbël.
¹³ Cili nga ju është i mençur dhe i ditur? Le t’i tregojë me sjelljen e mirë veprat e veta të kryera me zemërbutësi që vjen nga urtësia.
¹⁴ Por nëse keni xhelozi të hidhur dhe shpirtin e grindjes, mos u krekosni dhe mos gënjeni kundër së vërtetës.
¹⁵ Kjo nuk është mençuri që zbret nga lart, por është tokësore, jo prej frymës, por nga demoni.
¹⁶ Sepse ku ka xhelozi dhe shpirt grindjeje, atje ka trazirë dhe çdo gjë të ligë.
¹⁷ Por mençuria që vjen nga lart, së pari, është e pastër, pastaj paqësore, e butë, e arsyeshme, plot mëshirë dhe fryte të mira, e paanshme, pa hipokrizi.
¹⁸ Fryti i drejtësisë mbillet në paqe prej atyre që bëjnë paqe.