kap 1
kap 2
kap 3
kap 4
kap 5

Jakobi

^2
1 Vëllezërit e mi, si besimtarë në Zotin tonë të lavdishëm Jezus Krisht, mos i mbani anën njeriu.
² Sepse po të hyjë dikush në mbledhjen tuaj me unazë ari dhe i veshur me petka të ndritshme dhe aty vjen edhe një i varfër me rroba tërë zhul,
³ dhe ju i kushtoni vëmendje atij që ka veshur petka të ndritshme, duke i thënë: "Ti ulu këtu në vendin e mirë" dhe të varfrit i thoni: "Ti qëndro atje", ose "Ulu pranë stolit të këmbeve të mia,"
⁴ a nuk keni bërë dallim mes jush, duke u bërë gjykatës me mendime të liga?
⁵ Dëgjoni, vëllezërit e mi të dashur. A nuk i zgjodhi Perëndia të varfrit e kësaj bote që të jenë të pasur në besim dhe trashëgimtarë të mbretërisë që Ai ua premtoi atyre që e duan?
⁶ Por ju e keni fyer të varfrin. A nuk janë të pasurit ata që ju shtypin? A nuk janë ata vetë që ju tërheqin zvarrë nëpër gjyqe?
⁷ A nuk e shajnë ata emrin e mirë, të cilit ju i përkisni?
⁸ Nëse e zbatoni vërtet ligjin mbretëror sipas Shkrimit: "Do ta duash të afërmin si veten", atëherë mirë veproni.
⁹ Por nëse i mbani anën njeriu, bëni mëkat dhe dënoheni nga ligji si shkelës të tij.
¹⁰ Sepse, kushdo që i përmbahet tërë ligjit, por gabon në një pikë, ai është bërë fajtor për të gjitha.
¹¹ Sepse Ai që tha: "Mos shkel kurorën", ka thënë edhe: "Mos vra". Nëse nuk shkel kurorën, por vret, je bërë shkelës i ligjit.
¹² Kështu flisni dhe kështu veproni, si ata që do të gjykohen nga ligji i lirisë.
¹³ Sepse gjykimi do të jetë i pamëshirshëm ndaj atij që nuk ka treguar mëshirë. Mëshira ngadhënjen mbi gjykimin.
¹⁴ Ç’dobi ka, o vëllëzërit e mi, nëse dikush e pohon besimin e vet, por nuk ka vepra? A mund ta shpëtojë atë besimi?
¹⁵ Nëse një vëlla ose motër nuk ka ç’të veshë e i mungon ushqimi i përditshëm,
¹⁶ dhe njëri nga ju u thotë: "Shkoni në paqe, ngrohuni dhe nginjuni", por nuk u jepni ato që u duhen për trupin, ç’dobi ka?
¹⁷ Po kështu edhe besimi, po të mos ketë vepra, është i vdekur në vetvete.
¹⁸ Por dikush do të thotë: "Ti ke besim dhe unë kam vepra. Ma trego besimin tënd pa veprat dhe unë do të të tregoj besimin tim nëpërmjet veprave të mia."
¹⁹ Ti beson se ka një Perëndi. Mirë bën. Edhe demonët besojnë dhe dridhen.
²⁰ A do që ta dish, o njeri i marrë, se besimi pa veprat është i vdekur?
²¹ A nuk u shfajësua Abrahami, ati ynë, me anë të veprave, kur ofroi për flijim në altar Isakun, birin e vet?
²² Ti e sheh që besimi vepronte me veprat dhe besimi u bë i përsosur prej veprave.
²³ U përmbush Shkrimi që thotë: "Abrahami i besoi Perëndisë dhe kjo atij iu llogarit si drejtësi" dhe u quajt mik i Perëndisë.
²⁴ E shikoni se njeriu shfajësohet nga veprat dhe jo vetëm nga besimi.
²⁵ Po kështu, a nuk u shfajësua edhe Rahaba, gruaja e përdalë, me anë të veprave, kur i pranoi lajmëtarët dhe i nisi në një drejtim tjetër?
²⁶ Sepse ashtu si trupi është i vdekur pa frymën, po ashtu edhe besimi pa vepra është i vdekur.