kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

Hebrenjve

^8
1 Thelbi i atyre që po themi, është ky: ne kemi një kryeprift të tillë, i cili ka zënë vend në të djathtë të fronit të Madhërisë në qiej,
² një që shërben në shenjtërore, në tabernakullin e vërtetë, të cilin e ka ngritur Zoti, jo njeriu.
³ Sepse çdo kryeprift caktohet për të ofruar dhurata dhe flijime. Prandaj është e nevojshme që edhe ky të ketë diçka që të ofrojë.
⁴ Po të ishte Ai mbi tokë, nuk do të ishte prift, meqë ka tashmë njerëz që ofrojnë dhurata sipas Ligjit.
⁵ Këta shërbejnë në një shenjtërore që është sipas modelit dhe hijes së asaj që është në qiell, siç u paralajmërua Moisiu kur kishte ndër mend të ngrinte tabernakullin. "Shiko", i tha Ai: "që gjithçka ta bësh sipas modelit që t’u tregua në mal."
⁶ Por shërbesa që ka marrë Jezusi është edhe më e shkëlqyer, meqë besëlidhja, në të cilën Ai është ndërmjetës, është shumë më e mirë, dhe mbështetet mbi premtime më të mira.
⁷ Sepse po të ishte pa të meta besëlidhja e parë, nuk kishte përse të kërkohej një e dytë.
⁸ Perëndia, duke i fajësuar njerëzit, tha: "Ja, ditët po vijnë, thotë Zoti, kur do të vendos një besëlidhje të re me shtëpinë e Izraelit dhe me shtëpinë e Judës.
⁹ Jo sipas besëlidhjes që kam bërë me etërit e tyre në ditën kur i mora për dore për t’i nxjerrë nga toka e Egjiptit, sepse ata nuk i qëndruan besnik besëlidhjes Sime dhe Unë u largova prej tyre, thotë Zoti.
¹⁰ Sepse kjo është besëlidhja që do të bëjë me shtëpinë e Izraelit pas asaj kohe, thotë Zoti: do t’u shtie në mendje ligjet e Mia dhe në zemrat e tyre do t’i shkruaj ato. Do të jem Perëndia i tyre dhe ata do të jenë populli Im.
¹¹ Askush të mos e mësojë bashkëvendësin e vet, askush vëllanë e vet, duke thënë: ‘Ta njohësh Zotin,’ sepse të gjithë do të më njohin, nga më i vogli deri te më i madhi i tyre.
¹² Sepse do të kem mëshirë për padrejtësitë e tyre dhe nuk do t’i kujtoj mëkatet e tyre."
¹³ Kur thotë: "Besëlidhje e re", Ai e ka vjetruar të parën, dhe ajo që vjetrohet dhe plaket, do të zhduket shpejt.