kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

Hebrenjve

^5
1 Sepse çdo kryeprift, që përzgjidhet midis njerëzve, caktohet për t’i përfaqësuar njerëzit për gjërat që lidhen me Perëndinë, që të ofrojë dhurata dhe flijime për mëkatet.
² Ai është në gjendje t’i trajtojë me butësi të paditurit dhe ata që janë në rrugë të gabuar, meqë edhe ai është i veshur me dobësi.
³ Për këtë arsye atij i duhet të ofrojë flijime për mëkatet, si për popullin ashtu edhe për veten e vet.
⁴ Askush nuk e merr vetë këtë nder, por e merr kur thirret nga Perëndia, ashtu siç ishte edhe Aaroni.
⁵ Kështu edhe Krishti nuk i dha lavdi Vetes që të bëhej kryeprift. Por Perëndia i tha Atij: "Ti je Biri Im. Sot të kam lindur,"
⁶ siç thotë edhe në një vend tjetër: "Ti je prift përjetë në rendin e Melkizedekut."
⁷ Gjatë ditëve kur Jezusi ishte mbi tokë, Ai i ofroi lutje dhe kërkesa me britma të forta e me lot Atij që mund ta shpëtonte nga vdekja dhe Ai u dëgjua për shkak të përshpirtshmërisë së Vet.
⁸ Edhe pse ishte Bir, Ai e mësoi bindjen nga ato që vuajti.
⁹ Si u bë i përkryer, Ai u bë burim i shpëtimit të përjetshëm, për të gjithë ata që i binden Atij,
¹⁰ i shpallur nga Perëndia si kryeprift në rendin e Melkizedekut.
¹¹ Për këtë kemi shumë për të thënë, por është vështirë të shpjegohet, meqë juve ju është rënduar dëgjimi.
¹² Sepse, megjithëse në këtë kohë duhet të ishit mësues, ju përsëri keni nevojë që dikush t’ju mësojë njohuritë fillestare të fjalës së Perëndisë. Ju tashmë keni nevojë për qumësht dhe jo për ushqime të ngurta.
¹³ Sepse, cilido që jeton vetëm me qumësht, duke qenë ende fëmijë, është pa përvojën e fjalës së drejtësisë.
¹⁴ Ushqimi i fortë është për të rriturit, të cilët, për shkak të përvojës, i kanë ndjenjat të stërvitura për të dalluar të mirën nga e keqja.