kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

Hebrenjve

^3
1 Prandaj, o vëllezër të shenjtë, bashkëpjesëmarrës në thirrjen qiellore, mbajeni mendjen tek Jezusi, Apostulli dhe Kryeprifti i besimit tonë.
² Ai i qëndroi besnik Atij që e ka vënë, siç veproi edhe Moisiu në [tërë] shtëpinë e Perëndisë.
³ Porse Ky u vlerësua të kishte më shumë lavdi se Moisiu, ashtu si ai që e ndërton shtëpinë ka më shumë nder se vetë shtëpia.
⁴ Sepse çdo shtëpi është ndërtuar prej dikujt, por ndërtuesi i të gjitha gjërave është Perëndia.
⁵ Moisiu ishte besnik si shërbyes në tërë shtëpinë e Perëndisë, duke dëshmuar për atë që do të thuhej më vonë.
⁶ Por Krishti ishte besnik si Bir i caktuar në shtëpinë e Perëndisë. Ne jemi shtëpia e Tij, po të mbahemi fort pas bindjes dhe shpresës me të cilën mburremi.
⁷ Prandaj, siç thotë Fryma e Shenjtë: "Sot, po ta dëgjoni zërin e Tij,
⁸ mos i ngurtësoni zemrat siç vepruat kur ngritët krye, gjatë kohës së tundimit në shkretëtirë,
⁹ ku etërit tuaj më tunduan e më vunë në provë, dhe për dyzet vjet i panë veprat e Mia.
¹⁰ Prandaj u zemërova me këtë brez dhe thashë: ‘Gjithmonë gabojnë në zemrën e vet; ata nuk i kanë njohur rrugët e Mia’
¹¹ dhe u betova në zemërimin Tim: ‘Nuk do të hyjnë në prehjen Time’."
¹² Hapni sytë, vëllezër, që asnjë prej jush të mos ketë zemër të ligë mosbesuese, që largohet nga Perëndia i gjallë.
¹³ Por jepini zemër njëri-tjetrit nga dita në ditë, për aq kohë sa quhet "Sot", që asnjë prej jush të mos bëhet i vrazhdë nga mashtrimi i mëkatit.
¹⁴ Sepse jemi bërë pjesëtarë të Krishtit, po të mbajmë fort deri në fund bindjen që kishim në fillim,
¹⁵ siç është thënë: "Sot, po të dëgjoni zërin e Tij, mos i ngurtësoni zemrat si atëherë kur ngritët krye."
¹⁶ Sepse kush ishin ata që, pasi e dëgjuan, ngritën krye? A nuk ishin të gjithë ata që Moisiu i nxori nga Egjipti?
¹⁷ Me kë u zemërua Ai për dyzet vjet? A nuk i hipi zemërimi me ata që mëkatuan, trupat e të cilëve ranë në shkretëtirë?
¹⁸ Kujt iu betua Ai se nuk do të hynin në prehjen e Tij, veçse atyre që nuk iu bindën?
¹⁹ Në të vërtetë shohim se ata nuk mundën të hynin për shkak të mosbesimit të tyre.