kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

Hebrenjve

^2
1 Për këtë arsye ne duhet t’i kushtojmë edhe më shumë vëmendje atyre që kemi dëgjuar, se mos dalim nga rruga.
² Sepse kur fjala e folur nëpërmjet engjëjve doli se është e patundur dhe çdo shkelje e mosbindje mori dënimin e merituar,
³ si do të shpëtohemi nëse lëmë pas dore një shpëtim kaq të madh? Ky shpëtim, që u shpall në fillim nëpërmjet Zotit, na u vërtetua nga ata që e dëgjuan.
⁴ Edhe Perëndia dëshmoi bashkë me ta, si me shenja e me çudira ashtu edhe me mrekulli të ndryshme e dhurata të Frymës së Shenjtë të përndara sipas vullnetit të Tij.
⁵ Sepse Ai nuk ua nënshtroi engjëjve botën që po vinte, për të cilën flasim.
⁶ Por dikush ka dëshmuar diku, duke thënë: "Ç’është njeriu, që Ti të kujtohesh për të, ose biri i njeriut, që Ti të kujdesesh për të?
⁷ E bëre atë pak më të vogël se engjëjt; me lavdi dhe nder e kurorëzove;
⁸ gjithçka nën këmbët e tij e nënshtrove." Sepse duke ia nënshtruar gjithçka atij, Perëndia nuk la gjë pa ia nënshtruar atij. Por tani ende nuk shohim që gjithçka t’i jetë nënshtruar atij.
⁹ Por shohim Jezusin, që u bë pak më i vogël se engjëjt, tani të kurorëzuar me lavdi e nder për shkak të vuajtjes së vdekjes, që nëpërmjet hirit të Perëndisë të shijonte vdekjen për të gjithë.
¹⁰ Duke sjellë shumë bij në lavdi, Atij, për të cilin dhe nëpërmjet të cilit ekziston gjithçka, i duhej të bënte të përsosur autorin e shpëtimit të tyre nëpërmjet vuajtjeve.
¹¹ Sepse, si Ai që shenjtëron edhe ata që shenjtërohen, të gjithë kanë të njëjtën zanafillë. Prandaj Jezusi nuk e ka për turp t’i quajë ata vëllezër,
¹² duke thënë: "Do t’ua shpall emrin Tënd vëllezërve të Mi, në mes të të mbledhurve në kishë do të thur lavde për Ty."
¹³ Dhe përsëri: "Unë do ta vë besimin Tim në Të." Dhe përsëri: "Ja, Unë dhe bijtë që më ka dhënë Perëndia."
¹⁴ Meqenëse bijtë kanë të përbashkët gjakun dhe mishin, edhe Ai vetë po ashtu u bë pjesëmarrës në ta, që nëpërmjet vdekjes të shfuqizonte atë që ka pushtetin e vdekjes, domethënë djallin,
¹⁵ dhe të çlironte të gjithë ata, që nga frika e vdekjes, ishin mbajtur në skllavëri gjatë gjithë jetës.
¹⁶ Sepse Ai, pa dyshim, nuk u jep ndihmë engjëjve, por pasardhësve të Abrahamit.
¹⁷ Prandaj, Atij iu desh të bëhej si vëllezërit e Tij në gjithçka, që të bëhej kryeprift i mëshirshëm dhe besnik në gjërat që i përkasin Perëndisë, për të shlyer mëkatet e popullit.
¹⁸ Meqenëse Ai vetë vuajti kur u tundua, Ai është në gjendje t’i ndihmojë ata që tundohen.