kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13

Hebrenjve

^13
1 Ngulmoni në dashurinë vëllazërore.
² Mos harroni mikpritjen ndaj të huajve, sepse disa, duke vepruar kështu, pa e ditur janë treguar mikpritës ndaj engjëjve.
³ Kujtoni të burgosurit, sikur të ishit të burgosur me ta, ashtu edhe për ata që keqtrajtohen, sikur ju vetë të ishit duke vuajtur.
⁴ Le të mbahet martesa me nder nga të gjithë dhe shtrati martesor i papërlyer; sepse Perëndia do t’i gjykojë të përdalët dhe shkelësit e kurorës.
⁵ Mos t’ju hyjë lakmia për para në jetën tuaj dhe kënaquni me çka keni tani, sepse Vetë Ai ka thënë: "Kurrë nuk do të të lë, as nuk do të të braktis."
⁶ Kështu mund të themi me bindje: "Zoti është ndihmësi im, [dhe] nuk do të kem frikë. Çfarë mund të më bëjë njeriu mua?"
⁷ Kujtoni ata që ju udhëhoqën, të cilët ju folën fjalën e Perëndisë. Shikoni me kujdes përfundimin e mënyrës së tyre të jetesës dhe imitoni besimin e tyre.
⁸ Jezus Krishti është i njëjti si dje edhe sot, e përjetë.
⁹ Mos u largoni duke rendur pas gjithfarë doktrinash të huaja, sepse është mirë që zemra të forcohet prej hirit, jo prej ushqimeve ceremoniale, të cilat nuk kanë asnjë vlerë për ata që i përdorën.
¹⁰ Ne kemi një altar, prej të cilit ata që shërbejnë në tabernakull, nuk kanë të drejtë të hanë.
¹¹ Sepse trupat e këtyre kafshëve, gjakun e të cilave e çon një kryeprift në Vendin më të Shenjtë si flijim për mëkatet, digjen jashtë kampit.
¹² Prandaj edhe Jezusi, që të shenjtëronte popullin nëpërmjet gjakut të Vet, vuajti jashtë portave të qytetit.
¹³ Le të shkojmë pra, tek Ai jashtë kampit, duke mbajtur poshtërimin që mbajti Ai.
¹⁴ Sepse këtu nuk kemi një qytet të përhershëm, por kërkojmë qytetin që do të vijë.
¹⁵ Nëpërmjet Tij, pra, le t’i ofrojmë vazhdimisht një flijim lëvdimi Perëndisë, domethënë, frytin e buzëve që pranojnë emrin e Tij.
¹⁶ Mos lini pas dore bamirësinë dhe bujarinë, sepse me të këtilla flijime kënaqet Perëndia.
¹⁷ Bindjuni atyre që ju prijnë dhe nënshtrojuni pushtetit të tyre, sepse ata vigjëlojnë mbi shpirtrat tuaj, si ata që do të japin llogari. Bindjuni atyre që puna e tyre të jetë gëzim e jo trishtim, sepse kjo nuk do ketë dobi për ju.
¹⁸ Lutuni për ne, sepse jemi të bindur që e kemi ndërgjegjen të mirë, dhe dëshirojmë të bëjmë jetë të ndershme në çdo drejtim.
¹⁹ Por më tepër ju bëj thirrje që të luteni të kthehem sa më shpejt te ju.
²⁰ Perëndia i paqes, që ngjalli nga të vdekurit Bariun e madh të dhenve nëpërmjet gjakut të besëlidhjes së përjetshme, Zotin tonë Jezus,
²¹ ju bëftë të aftë në çdo gjë të mirë që të kryeni vullnetin e Tij, duke bërë te ne atë që është e pëlqyeshme përpara Tij, nëpërmjet Jezus Krishtit, të cilit i qoftë lavdia për jetë të jetëve. Amen.
²² Ju lutem, o vëllezër, ta duroni këtë fjalë që ju jep zemër, sepse ju kam shkruar vetëm një letër të shkurtër.
²³ Dua ta dini se vëllai ynë, Timoteu, u lirua dhe po të vijë shpejt, do të vij t’ju shoh bashkë me të.
²⁴ Përshëndetni të gjithë ata që ju prijnë dhe të gjithë shenjtërit. Ju përshëndesin ata nga Italia.
²⁵ Hiri qoftë me ju të gjithë.