9
¹ Duke kaluar, pa një njeri që kishte lindur i verbër.
² Dishepujt e pyetën dhe i thanë: "Rabbi, kush ka mëkatuar, ky apo prindërit e tij, që ka lindur i verbër?"
³ Jezusi u përgjigj: "As ky nuk ka mëkatuar, as prindërit e tij. Por kjo ka ndodhur që tek ai të duken punët e Perëndisë.
⁴ Neve na duhet të kryejmë punët e Atij që më ka dërguar, sa është ditë; vjen nata, kur askush nuk mund të punojë.
⁵ Sa kohë që jam në botë, Unë jam drita e botës."
⁶ Pasi tha këto, pështyu përdhe, bëri baltë prej pështymës, ia leu sytë me të
⁷ dhe i tha: "Shko e lahu në pellg të Siloamit," (që përkthehet, I dërguari). Ai shkoi e u la dhe erdhi duke shikuar.
⁸ Atëherë fqinjët dhe ata që e kishin parë më përpara që ai ishte lypës, thoshin: "A nuk është ky ai që rrinte ulur dhe lypte?"
⁹ Të tjerë thoshin: "Ky është ai" e të tjerë thoshin: "Jo, por i ngjan atij." Ai thoshte: "Unë jam ai."
¹⁰ Ata pra, i thoshin: "Si [pra] t’u hapën sytë?
¹¹ Ai u përgjigj: "Një njeriu që quhet Jezus bëri baltë, më leu sytë dhe më tha: ‘Shko në Siloam dhe lahu’. Shkova dhe me t’u larë, më erdhën sytë."
¹² Ata i thanë: "Ku është Ai?" Ai tha: "Nuk e di."
¹³ Atë që më parë ishte i verbër e çuan te farizejtë.
¹⁴ Ishte e shtunë dita në të cilën Jezusi bëri baltën dhe ia hapi atij sytë.
¹⁵ Pastaj farizejtë po ashtu e pyesnin përsëri, se si i erdhi shikimi. Ai u tha: "Ai vuri baltë mbi sytë e mi, u lava dhe shoh."
¹⁶ Atëherë disa prej farizejve thoshin: "Ky njeri nuk është prej Perëndisë, sepse Ai nuk e mban të shtunën." Por të tjerë thoshin: "Si ka mundësi që një njeri mëkatar të bëjë të tilla shenja?" Midis tyre lindi një përçarje.
¹⁷ Pastaj ata i thanë përsëri të verbrit: "Çfarë thua ti për Të, meqë Ai t’i hapi sytë?" Ai tha: "Ai është profet."
¹⁸ Por, judenjtë nuk besuan që ai kishte qenë i verbër dhe i erdhën sytë, derisa u bënë zë prindërve të atij që i kishte ardhur shikimi.
¹⁹ I pyetën dhe u thanë: "A është ky djali juaj, që thoni se ka lindur i verbër? E si sheh ai tani?"
²⁰ Atëherë prindërit e tij u përgjigjën dhe thanë: "E dimë që ky është djali ynë dhe që ka lindur i verbër.
²¹ Por se si sheh ai tani, nuk e dimë, as kush ia hapi sytë nuk e dimë. Pyeteni, ai është në moshë dhe do të flasë vetë për veten e tij."
²² Prindërit e tij i thanë këto gjëra sepse u druheshin judenjve, sepse judenjtë tashmë kishin rënë në ujdi që kushdo që do të pohonte se Ai ishte Krishti, do të përjashtohej prej sinagogës.
²³ Prandaj prindërit e tij thanë: "Ai është në moshë, pyeteni atë."
²⁴ Pastaj thirrën edhe një herë njeriun që ishte i verbër dhe i thanë: "Jepi lavdi Perëndisë. Ne e dimë që ky njeri është mëkatar."
²⁵ Atëherë ai u përgjigj: "Nëse Ai është mëkatar apo jo, nuk e di; një gjë e di, isha i verbër, tani shikoj."
²⁶ Pastaj ata i thanë: "Çfarë të bëri Ai? Si t’i hapi sytë?
²⁷ Ai iu përgjigj: "Jua thashë tashmë dhe ju nuk e dëgjuat. Përse doni ta dëgjoni përsëri? Mos doni të bëheni edhe ju dishepuj të Tij?"
²⁸ Ata e shanë dhe i thanë: "Ti je dishepull i Atij, kurse ne jemi dishepujt e Moisiut.
²⁹ Ne e dimë që Perëndia i foli Moisiut, por këtë nuk e dimë nga është."
³⁰ Njeriu u përgjigj dhe u tha: "E pra, kjo është çuditshme që ju nuk e ditkeni nga është dhe megjithatë Ai m’i hapi sytë.
³¹ E dimë që Perëndia nuk i dëgjon mëkatarët, por nëse dikush ka frikë Perëndinë dhe bën vullnetin e Tij, këtë e dëgjon.
³² Që prej fillimit të jetës nuk është dëgjuar që ndokush t’i hapë sytë atij që ka lindur i verbër.
³³ Po të mos ishte ky prej Perëndisë, nuk do të mund të bënte asgjë."
³⁴ Ata u përgjigjën dhe i thanë: "Ti i tëri ke lindur në mëkate dhe na mëson ne?" Dhe e flakën jashtë.
³⁵ Jezusi dëgjoi që ata e kishin flakur jashtë dhe, kur e gjeti, tha: "A beson ti në Birin e Njeriut?"
³⁶ Ai u përgjigj dhe tha: "E kush është Ai, Zotëri, që unë të besoj tek Ai?"
³⁷ Jezusi i tha: "Ti e ke parë; është Ai që po flet me ty."
³⁸ Ai tha: "Besoj, Zot" dhe e adhuroi Atë.
³⁹ Jezusi tha: "Për gjykim kam ardhur Unë në këtë botë, që ata të cilët nuk shikojnë të shohin dhe ata që shikojnë të bëhen të verbër."
⁴⁰ Disa prej fariesejve që ishin me ta i dëgjuan këto dhe i thanë: "Mos jemi edhe ne të verbër?"
⁴¹ Jezusi u tha: "Po të ishit të verbër, ju nuk do të kishit mëkat. Por tani thoni: ‘Shohim’, prandaj mëkati juaj mbetet."